- قوبىزدى وزىڭە سەرىك ەتكەنىڭە 17 جىلدىڭ ءجۇزى بولىپتى. قارا قوبىز سەنى قانداي قاسيەتىمەن باۋراپ الدى؟
- وسى جىلى مەنىڭ قوبىز اسپابىن العاش قولىما الىپ، ونىڭ قىر-سىرىن مەڭگەرە باستاعانىما تۋرا ون جەتى جىل بولادى. مەنىڭ ومىردەن تۇيگەنىم، ءار ادام كىشكەنتايىنان ءوزىنىڭ مىنەزىنە ساي كەلەتىن، جۇرەگىنە جاقىن نارسەمەن شۇعىلداناتىن ءتارىزدى. بۇل، ءسىرا ءومىردىڭ زاڭدىلىعى بولسا كەرەك. ولاي دەيتىنىم، قاراپايىم قارا قوبىز بەن مەنىڭ مىنەزىمدە ءبىر ۇقساستىق، دالىرەك ايتقاندا، ءبىر ۇيلەسىمدىلىك بار. ونىڭ ۇستىنە كيەلى دە قاسيەتتى ءارى اۋليەلى مەكەن — ەجەلگى تۇركىستاندا ومىرگە كەلۋىمنىڭ ءوزى مەنى قورقىت اتامنان قالعان كونە مۇرا- قوبىزعا ەرەكشە «عاشىق» ەتتى. سوندىقتان دا كۇنى بۇگىنگە دەيىن ءوزىمدى قوبىزسىز قابىلداي المايمىن. مىنە، سودان دا بولار، 1995 جىلى احمەت جۇبانوۆ اتىنداعى دارىندى بالالارعا ارنالعان ارنايى مامانداندىرىلعان مۋزىكا مەكتەبىنە وقۋعا ءتۇستىم. وسى مەكتەپتى ۇزدىك اتتەستاتپەن بىتىرگەن سوڭ، 2005 جىلى قۇرمانعازى اتىنداعى قازاق ۇلتتىق كونسەرۆاتورياسىنىڭ حالىق اسپاپتار فاكۋلتەتىنە قوبىز ماماندىعى بويىنشا وقۋعا قابىلداندىم. العاشىندا ءابدىماناپ جۇمابەكۇلىنان ءدارىس السام، ودان كەيىن قۇرمانعازى كونسەرۆاتورياسىنىڭ پروفەسسورى بازارحان قوسباساروۆ سىندى تانىمال ونەر شەبەرىنەن قوبىزدىڭ قىر-سىرىن جان-جاقتى مەڭگەرۋىمە تۋرا كەلدى. قۇدايعا شۇكىر، سودان بەرى قىل قوبىزىمنان ەكى ەلى اجىراعان ەمەسپىن. ءبىر ايتارىم، باسقا مۋزىكا اسپاپتارىمەن سالىستىرعاندا قوبىزدىڭ ارتىقشىلىعى دا، وزىنە ءتان ەرەكشەلىگى دە بار. ەڭ الدىمەن، قوبىزدىڭ ءۇنى ارقىلى قازاقتىڭ كەڭ دالاسىنىڭ ءۇنى، ەلىمىزدىڭ سان عاسىرلار قويناۋىندا قالعان تىنىس-تىرشىلىگى مەن تاريحى كوز الدىڭىزعا كەلەدى. سوندىقتان دا مەن ءبۇلدىرشىن كەزىمنەن باستاپ قوبىزدىڭ ۇنىنە ىنتىق بولدىم. شىندىعى سول، ءدال قازىر قوبىزدىڭ ءۇنىنسىز ءومىردى تۇسىنە المايمىن. سوندىقتان دا مەن قوبىزبەن بىرگە ەرجەتىپ، ەسەيىپ كەلەمىن.
- كۇنى كەشەگى بالا مىنەز اقەركە مەن بويجەتكەن اقەركەنىڭ اراسىندا قانداي ايىرماشىلىق بار دەپ ويلايسىڭ؟
- حالقىمىز «اتا كورگەن وق جونار، انا كورگەن تون پىشەر» دەمەۋشى مە ەدى؟! زەر سالىپ قاراسام، وسى ءسوز تەرەڭنەن، ءومىر شىندىعىنان الىنعان ناقىل ءسوز ەكەن. بارلىق قۇربىلارىم ءتارىزدى مەن دە اتا-انانىڭ، سونداي-اق بۇگىنگى كۇنى سەكسەننىڭ التاۋىنا اياق باسقان اجەمنىڭ ءتالىم-تاربيەسىن بويىما ءسىڭىرىپ ءوستىم. ال ەندى جەكە وزىمە كەلەتىن بولسام، بالا كۇنگى اقەركە مەن قازىرگى اقەركەنىڭ اراسىندا اسپان مەن جەردەي ايىرماشىلىق بار ەكەندىگىن اڭعارامىن. ءبىر ەرەكشەلىگىم، قازىر مەن ومىرگە كوزقاراسىم قالىپتاسقان، جاقسى مەن جاماندى، اسىلدان جاسىقتى ايىرا بىلەتىن جاعدايدامىن. ال بالا كۇنىمنەن وزگەرمەي قالعان ءبىر قاسيەت — قوبىزعا دەگەن ىڭكارلىك.
- قالاي ويلايسىڭ، كادۋىلگى قارا قوبىزدىڭ جاڭا عاسىر ەستراداسىندا قانداي دا ءبىر ۇلەسى بار ما؟ بولسا قانداي؟
- مۇنى دالەلدى بولۋ ءۇشىن ناقتى مىسالمەن ايتايىن. بايقاساڭىز، سوڭعى ۋاقىتتا قايسىبىر جارنامالاردا قوبىزدىڭ ەسترادالىق ۇلگىگە تۇسكەن دىبىسى ءجيى پايدالانىلىپ ءجۇر. ءتىپتى كەيبىر ەسترادا انشىلەرى ماعان وزدەرى ورىندايتىن ءاندى قوبىزبەن سۇيەمەلدەپ بەرۋگە قولقا سالاتىن كەزدەرى دە بار. ناقتى مىسال كەلتىرسەم، مەنىڭ قوبىزىمنىڭ ۇنىمەن ورىلگەن باقىت شاداەۆانىڭ ورىنداۋىنداعى «ءومىر — ارمان» ءانى 2001 جىلى «جىلدىڭ ەڭ ۇزدىك ءانى» اتالىمىن جەڭىپ السا، ءانشى تاڭات مامىرحانۇلىنىڭ ورىنداۋىنداعى «قايران، ءومىر-اي» ءانى «التىن داۋىس» بايقاۋىنىڭ جۇلدەگەرى اتاندى. مۇنى ماقتانىش ءۇشىن ايتىپ وتىرعانىم جوق، شىندىعى سول! رەتى كەلگەندە ايتا كەتەتىن تاعى ءبىر جايت، قوبىزدى ەستراداعا يكەمدەپ، العاش رەت ساحناعا الىپ شىققان دا مەن بولاتىنمىن. وسىدان بىرەر جىل بۇرىن جارىققا شىققان «كوكتەم» دەپ اتالاتىن ءۇنتاسپام مۇنىڭ تولىق دالەلى. مۇندا حالىق كومپوزيتورلارىمەن قاتار، شەتەل سازگەرلەرىنىڭ دە شىعارمالارى بار. دەمەك، مۇنىڭ ءوزى قازىرگى كۇنى ەسترادادا قوبىز اسپابىنىڭ قايتالانباس سازدى اۋەنىنە ايرىقشا سۇرانىس بار ەكەندىگىن كورسەتسە كەرەك. ارينە، مۇنىڭ بارلىعى سازگەر مەن ءاندى ورىندايتىن ءانشىنىڭ تالعامىنا تىعىز بايلانىستى ەكەندىگىن ءتىپتى دە جاسىرۋعا بولمايدى.
- جالپى، شەتەلدەردەگى ونەرسۇيەر قاۋىم قازاقتىڭ قوبىزىن قالاي قابىلدايدى؟ قىزىعۋشىلىق بار ما؟
- شىندىعى سول، مەيلى ءتۇبى ءبىر تۇركيانى الايىق نەمەسە مۇحيتتىڭ ارعى بەتىندەگى ەلدەردى الايىق، مۇنداعى تۇرعىنداردىڭ بارلىعى قوبىزدىڭ ءۇنىن ەرەكشە ىقىلاسپەن تىڭدايدى. ءتىپتى «بيس-بيستەپ» ءوزىڭدى ساحنادان جىبەرمەي، بىرنەشە شىعارما ورىنداۋدى سۇرايدى. بۇل، ارينە — قوبىزدىڭ قاسيەتى! ەكىنشىدەن، ەۋروپا ەلدەرى داڭعازا ەسترادادان ابدەن قاجىپ، مەزى بولعان. سوندىقتان دا ولار قوبىزدىڭ تەرەڭنەن قۇيقىلجىتا شىعاتىن ءۇنىن ەستىگەندە، ورىندارىنان تۇرەگەلىپ، دۋ قول شاپالاقتاپ، ريزاشىلىق سەزىمدەرىن بىلدىرەدى. ءتىپتى كونتسەرتتەن سوڭ كەيبىرەۋلەرى قاسىڭا كەلىپ، قوبىزدى قولىنا ۇستاپ كورىپ، قاراپايىم قىلدان تاياقپەن سۇيكەگەندە نەبىر عالامات دىبىستىڭ قالاي شىعاتىنىن بىلگىلەرى كەلىپ، سان الۋان سۇراقتىڭ استىنا الاتىندارى دا بار. ال قايسىبىرەۋلەرى قوبىزدى سكريپكا اسپابىمەن سالىستىرا قارايدى. مۇنىڭ ءوزى حالقىمىزدىڭ كيەلى اسپابى — قوبىزدىڭ عۇمىرىنىڭ ۇزاق بولاتىندىعىنان حابار بەرگەندەي كورىنەدى ماعان.
مەنىڭ ءبىر بايقاعانىم، ادەتتە حالىقارالىق تۋريزم جارمەڭكەلەرىندە ەل مەن جەردىڭ تەك تابيعي بايلىعى عانا ەمەس، جالپى مادەنيەتى دە حالىققا تانىستىرىلادى. ءبىر قۋانتاتىنى، تۇركىتىلدەس حالىقتار، ونىڭ ىشىندە ءتۇبى ءبىر تۇركيا مەملەكەتىنىڭ تۇرعىندارى قوبىزدى وتە جوعارى باعالايدى. ءتىپتى اڭگىمەلەسە قالساڭىز، ولاردىڭ قاي-قايسىسى بولماسىن «قورقىت — ءبىزدىڭ بابامىز» دەپ قىزۋ پىكىرتالاس تا تۋدىرادى. بۇل — ارينە، ولاردىڭ قورقىت بابامىزعا، قوبىزعا دەگەن كوزقاراسى! تۇركيادا ماعان ءبىر كىسى «بايبۇرت قالاسىنداعى قورقىت مازارىنا باراسىڭ با؟ » دەپ قولقا سالدى. مەن: «بۇل قالاي؟ قورقىت — ەجەلدەن قازاقتىڭ باباسى. كەسەنەسى سىرداريانىڭ جاعاسىندا» دەپ اشىق ايتتىم. ايتسە دە قوبىزدى اسا قادىرلەيتىن تۇرىكتەر مەنى كونتسەرتتەرگە ءجيى شاقىرىپ تۇرادى. ەۋروپا، اسىرەسە، بالتىق جاعالاۋىنداعى ەلدەر ءبىزدىڭ ءداستۇرلى مۋزىكامىزدى ۇناتادى. مىسالى، مەن ءوزىم كونتسەرتتىك ساپاردا بولعاندا ليتۆا، گەرمانيا، تۇركيا، كورەيا، مولدوۆا، قىتاي، رەسەي، يوردان حاشيميتتىك كورولدىگى، تاجىكستان ەلدەرىنىڭ ءبىزدىڭ ەلىمىزگە، ۇلتتىق مادەنيەتىمىزگە دەگەن قوشامەت-قۇرمەتىنە ايرىقشا ريزا بولدىم.
- جوعارىدا «قوبىزدى ەستراداعا يكەمدەپ، العاش رەت ساحناعا الىپ شىققان دا مەن بولاتىنمىن» دەپ قالدىڭ. قوبىزدى قازىرگى زامان تالابىنا ساي يكەمدەيمىن دەپ، ونىڭ وزىنە عانا ءتان قوڭىر اۋەزىنەن ايىرىلىپ قالامىن دەپ قورىقپايسىڭ با؟
- ءالى ەسىمدە، 1999 جىلى العاش رەت ەلەكترونيكانىڭ سۇيەمەلدەۋىمەن قوبىزدا كۇي تارتقان بولاتىنمىن. سول جىلداردا ماعان كەيبىر اعالارىمنىڭ: «قوبىزدىڭ كۇيىن قۇرتىپ جاتىرسىڭ» دەپ ايىپ تاعىپ، سىن ايتقان كەزدەرى دە بولدى. ەگەر سول اعالارىم بىلە بىلسە، ەڭ الدىمەن، مەن كاسىبي مۋزىكانتپىن. وسى سالاداعى ۇلاعاتتى ۇستازىم، پروفەسسور بازارحان قوسباساروۆ ماعان جەڭىل-جەلپى ءان-كۇيگە اۋەس بولماۋىم قاجەتتىگىن ايتىپ، ۇنەمى اقىل-كەڭەس بەرىپ وتىراتىن. قۇدايعا شۇكىر، مەنىڭ دە ونەر سالاسىندا، ونىڭ ىشىندە قوبىزعا باۋىر باسقانىما 17 جىل بولىپتى. ولاي بولسا، وسى جىلدار ىشىندە «قاسىقتاپ» جيناعان ابىروي-بەدەلىمنەن ءبىر-اق ساتتە ايىرىلىپ قالعىم كەلمەيدى. مەن، ەڭ الدىمەن ءوزىم ويناپ جۇرگەن اسپابىمنىڭ تاريحىنا ۇلكەن ءمان بەرەمىن.
كۇيلەردىڭ اۋەنىن بۇزىپ ويناۋدى قاسىرەت دەپ تۇسىنەمىن. دەگەنمەن مەنىڭ قۇربى-قۇرداستارىم، بۇگىنگىنىڭ جاستارى عاسىرلار قويناۋىنان جاڭا زامانعا جەتكەن قوبىز ۇنىنە قۇلاق ءتۇرسىن دەپ جاڭاشىلدىققا ۇمتىلاتىنىم راس. ال رەپەرتۋار ماسەلەسىنە كەلسەم، قانداي شىعارما ورىندايتىنىمدى ونەر كورسەتەتىن ورتانىڭ تالعامىنا قاراي يكەمدەپ وتىرامىن. ەگەر تىڭدارماندار اراسىندا كونەنىڭ كوزى — قارتتار كوپ جينالعان بولسا، وندا قورقىتتىڭ، ىقىلاستىڭ كۇيلەرىن ورىندايمىن. ال جاستار كوپ بولسا، وندا ويناقى كۇيلەردى توگىلتىپ وينايمىن. اسىلىندە، مۋزىكانىڭ جامانى جوق، ورىنداۋشىنىڭ نەمەسە تىڭداۋشىنىڭ جامانى بولۋى مۇمكىن.
قازىرگى ۋاقىتتا القۋات قازاقباەۆ، ءنۇرسات بەيسەقوجاەۆ، مارجان اراپباەۆا سىندى كومپوزيتورلاردىڭ ماعان ارنايى جازعان مۋزىكالىق شىعارمالارىن دا ورىنداپ ءجۇرمىن. وزگە مۋزىكالىق اسپاپتارمەن سالىستىرا العاندا، قوبىزدا ورىندالاتىن شىعارمالار كوپ جاعدايدا از، ياعني شەكتەۋلى عانا. ال دومبىراعا ارنالعان شىعارمالار وتە كوپ. ءبىر ەرەكشەلىگى، قوبىزدا ويناپ-ۇيرەنۋ ۇلكەن ەڭبەكتى، قاجىماي-تالماي ماڭداي تەردى توگۋدى قاجەت ەتەدى. بۇعان قوسا، ادامنىڭ ىشكى جان دۇنيەسى كىرشىكسىز تازا بولعانى ءلازىم. مەنىڭشە، قوبىزدىڭ قۇدىرەتىن جانى تازا ادام عانا تۇسىنەدى.
- مەنىڭ بىلەتىنىم، و باستا ءوزىڭ قوبىزعا قوسىلىپ ءان دە ورىندايتىن ەدىڭ. قازىرگى ۋاقىتتا بۇل ءۇردىستى ۇمىت قالدىرعان جوقسىڭ با؟
- دۇرىس ايتاسىز، مەن و باستا ۇلكەن ونەر تابالدىرىعىن «ىڭكارىم-اي» دەگەن انمەن اتتاعانمىن. وسى ءاندى ايتىپ، مەكتەپتە جۇرگەن كەزىمدە تالاي بايقاۋلارعا قاتىسىپ، بىرنەشە مارتە جۇلدەلى ورىنداردى جەڭىپ العانىم بار. بۇل ءان كوپشىلىك قاۋىمعا حالىق ءارتيسى، كۇمىس كومەي ءانشى روزا باعلانوۆا اپامىزدىڭ ورىنداۋىمەن بەلگىلى بولعان. تۋعان جەرىم — قاسيەتتى تۇركىستاندا جۇرگەنىمدە جەرگىلىكتى ءان بايقاۋلارىنا قاتىسىپ، ماقتانعانىم ەمەس، جۇلدەسىز قالعان كەزىم بولعان ەمەس. سول جىلداردىڭ وزىندە مەنىڭ ونەرىمدى قۇرمەتتەپ، ماعان ءۇمىت ارتقان اعا-اپكەلەرىم «بۇل قىزدى الماتىعا جىبەرۋ كەرەك قوي» دەپ سان مارتە پىكىر دە ايتقان بولاتىن. وكىنىشكە قاراي، اتا-انام «قىزىمىز ءالى كىشكەنتاي» دەپ مەنى ۇيدەن الىسقا جىبەرگىسى كەلمەدى. دەسە دە ءبىر جىلى جاز ايلارىندا الماتىعا دەمالۋعا كەلگەنىمدە اتا-اناما ايتپاستان «باعىمدى سىناپ كورەيىن» دەپ، احمەت جۇبانوۆ اتىنداعى مۋزىكا مەكتەبىنە سىناق تاپسىردىم. ءسويتىپ، وسىنداعى ونەر يەلەرى — ۇستاز اعا-اپالارىم ونەرىمدى «وتە جاقسى» باعالاپ، مەنى مۋزىكا مەكتەبىنە وقۋعا قابىلداۋعا شەشىم شىعاردى. سودان ەلگە ورالىپ، الماتىعا مۋزىكا مەكتەبىنە وقۋعا كەتۋىم قاجەتتىگىن ايتقانىمدا، اتا-انام ءبىراز كەلىسپەدى. ال بولاشاقتا قوبىزشى بولاتىنىمدى ەستىگەندە ۇيدەگىلەر قارسىلىقتارىن ودان سايىن ۇدەتتى. ولار ماعان قىلقوبىز ويناۋدىڭ وڭاي ەمەستىگىن ءتۇسىندىرىپ الەك بولدى. «قىلقوبىزبەن الىسقا بارمايسىڭ» دەپ جولىمدى كەسكىسى كەلگەن اعايىندار دا تابىلدى. مەن سوندا دا العان بەتىمنەن قايتپادىم. قۇدايعا شۇكىر، قازىر وسى قارا قوبىزىممەن نان تاۋىپ جەپ ءجۇرمىن. ەل كورىپ، جەر كورىپ قانا قويماي، الەم ەلدەرىنە تۋعان ەلىم — قازاقستاندى تانىتىپ ءجۇرمىن. اسىلىندە، مەن ۇلتتىق ونەردى دۇنيەنىڭ ءتورت بۇرىشىنا پاش ەتىپ جۇرگەنىمە ءوزىمدى باقىتتى سانايمىن!
- حالقىمىزدا «تۋعان ەل — التىن بەسىك» دەگەن ۇلاعاتتى ءسوز بار. وسى ءسوزدىڭ توركىنىن ءوزىڭ قالاي پايىمدايسىڭ؟
- «تۋعان ەل» دەگەن ءسوزدىڭ ماعىناسى وتە تەرەڭدە جاتىر. ويتكەنى تۋعان ەل — ءوزىڭ تۋىپ-ءوسىپ، ەرجەتكەن ءۇيىڭنىڭ تابالدىرىعىنان باستالادى. اۋىلداعى جۋساننىڭ جۇپار ءيسى، ونىڭ كەۋدەگە قۋات بەرەر ساف ءمولدىر اۋاسى، جوتاعا ورلەگەن جالعىز اياق جولدارى، جانارى جايساڭ ادامدارى، وسىنىڭ ءبارى — تۋعان ەلدىڭ اجىراعىسىز ءبىر بولشەگى. ودان قالا بەرسە، ۇمىتىلماس بالالىق شاق! مەن اۋىلدان وتە ەرتە، جاستايىمنان كەتتىم. قازىر دە قارتايىپ تۇرعانىم جوق. دەگەنمەن قازىر ويلاپ قاراسام، اۋىلدا ءومىر سۇرگەن ازعانا جىلدارىم، مەن ءۇشىن ۇلكەن ساباق، ۇلكەن مادەنيەت ورتاسى بولعان ەكەن. ۇلكەن ونەرگە جول اشقان ءومىرىمنىڭ ماڭگى ۇمىتىلماس قيماس كەزەڭدەرى. ويتكەنى مەنىڭ بەس جاسىمدا بالاباقشادا، التى جاسىمدا مەكتەپ قابىرعاسىندا العاش «ونەر» دەگەن قۇدىرەتتى ءتۇيسىنىپ، كوزگە كورىنبەيتىن قيال الەمىنە تولى ارماندى-شاتتىقتى كۇندەرىمدى وتكىزگەنىم ءالى ەسىمدە. العاش رەت «ءانشى بالاپان»، «ۋترەننيايا زۆەزدا» بايقاۋلارىنا قاتىسىپ، باس جۇلدەنى جەڭىپ الىپ، الماتىعا جولداما العانىم ءالى كۇنگە كوز الدىمدا. اتا-انادان الشاق كەتىپ، احمەت جۇبانوۆ اتىنداعى ارنايى مۋزىكا مەكتەبىندە وقي ءجۇرىپ، رەسپۋبليكالىق، حالىقارالىق بايقاۋلارعا قاتىسىپ، جۇلدەلى ورىندارعا يە بولدىم. ونەردىڭ باسقا دا تۇرلەرى ءتارىزدى كۇيشىلىك ونەر — ادام بالاسىنىڭ وي-ءورىسىن، دۇنيەتانىمىن، وي-قيالىن بارىنشا دامىتىپ، ادامنىڭ سۇلۋلىققا ىڭكارلىگىن اناعۇرلىم ارتتىرا تۇسەتىن ماڭگى وشپەس ونەردىڭ ءبىر سالاسى. ولاي دەيتىنىم، 12 جىلدىق مۋزىكا مەكتەبىن ۇزدىك ءبىتىرىپ، قۇرمانعازى اتىنداعى قازاق ۇلتتىق كونسەرۆاتورياسىنا گرانتپەن وقۋعا ءتۇسىپ، ونى دا ۇزدىك ءبىتىرىپ، تاعى دا گرانت ارقىلى ماگيستراتۋراعا ءتۇسۋىم، قازاق حالقىنىڭ كونە مۇراسى، جادىگەرى — قىلقوبىزعا دەگەن سۇيىسپەنشىلىكتەن، ۇلتتىق ونەرگە دەگەن پاتريوتتىق سەزىمنەن تۋىنداپ وتىر دەپ اشىق ايتا الامىن. ادام بويىنداعى ەڭبەكسۇيگىشتىك، ۇستامدىلىق، ءتوزىمدى بولا ءبىلۋدىڭ ءوزى ادام بالاسىنىڭ ادامگەرشىلىك قاسيەتتەرىنىڭ نەگىزگى ولشەمدەرىنىڭ ءبىرى ەكەنىنە كوزىم انىق جەتەدى. اسىلىندە، ونەر ءۇشىن اۋىلدىڭ ۇلەسى زور. ءوز باسىم اۋىل مەن ونەردىڭ اراسىندا تامىرى تەرەڭ بايلانىس بار دەپ ۇعامىن. تۋعان اۋىلىمدى ۇنەمى اڭساپ تۇرامىن. سوندىقتان بۇگىنگى كۇنى ونەر سالاسىندا قانداي دا ءبىر جەتىستىككە قول جەتكىزسەم، سول جەتىستىكتە مەنى ومىرگە اكەلگەن اتا-انامنىڭ، ءبىلىم بەرگەن مەكتەبىمنىڭ، ءوزىم ءونىپ-وسكەن ورتاداعى ۇلگى-ونەگە بولعان ادامداردىڭ، كىندىك قانىم تامعان كيەلى دە قاسيەتتى تۋعان جەرىمنىڭ زور ۇلەسى بار دەپ سانايمىن. قورقىت اتادان قالعان قاسيەتتى قوبىزىم ارقىلى قانشاما الىس-جاقىن شەتەلدەردە بولدىم. بىراق تۋعان-جەرىم — قازاقستانىم — التىن بەسىگىم! مەن ءۇشىن وركەندى دە وركەنيەتتى تاۋەلسىز ەلىمىزگە ەش نارسە جەتپەيدى. بۇل مەنىڭ جۇرەك تۇكپىرىندەگى سىرىم!
- شىعارماشىلىق جوسپارلارىڭ قانداي؟
- بۇعان دەيىن تۇركىستاندا جانە الماتىدا جەكە شىعارماشىلىق كونتسەرتىمدى وتكىزدىم. قازىرگى ۋاقىتتا الدىما قويىپ وتىرعان ۇلكەن ماقساتىمنىڭ ءبىرى — ومىرىمە ماڭگىلىككە سەرىك ەتكەن قىلقوبىزدىڭ قايتالانباس اسەم سازدى ءۇنىن، كۇي ورىنداۋداعى ەرەكشەلىگى مەن ارتىقشىلىقتارىن جان-جاقتى زەرتتەپ، ۇلكەن ءبىر عىلىمي جۇمىس جازسام با دەيمىن. شىنىمدى ايتسام، جوسپار دا، ارمان دا كوپ. ەڭ باستىسى، الدا تۇرعان بيىك تە زور اسۋلاردى باعىندىرۋ ءۇشىن كۇش-قايرات، زور ەڭبەك، ۇلكەن ءبىلىم، ەرىنبەي ىزدەنۋ قاجەت ەكەنىن جاقسى سەزىنەمىن. مەن ءۇشىن ماقسات-جوسپاردىڭ ەڭ بيىگى — قاي ۋاقىتتا دا ءبىلىم بەرگەن ۇستازدارىمنىڭ، قوبىزدىڭ ۇنىنە ىنتىق كورەرمەندەرىمنىڭ سەنىمىن، ءۇمىتىن اقتاۋ دەپ بىلەمىن. ءبىر قۋانتاتىنى، حالقىمىزدىڭ ۇلتتىق مۋزىكاعا دەگەن قۇمارلىعى كۇن سايىن ارتىپ كەلەدى. مىسالى، كوپشىلىك تىڭدارماننىڭ سۇراۋى جانە «ەير استانا» اۋە كومپانياسىنىڭ تالعامى بويىنشا وسى كومپانيا جاقىندا ماعان ۇشاق بورتتارى ارقىلى «ءسىزدىڭ قوبىزدا ورىنداعان كۇيلەرىڭىزدى سان مىڭداعان جولاۋشىلاردىڭ نازارىنا ۇسىنساق» دەگەن ۇسىنىس ايتتى. وسىلايشا وسى اۋە كومپانياسىمەن كەلىسىمشارتقا وتىرۋىمنىڭ ناتيجەسىندە مەنىڭ تارتقان كۇيلەرىم تىڭداۋشىلارعا جەتەتىن بولادى.
- اڭگىمەڭە راقمەت!
سۇحباتتاسقان جومارت مولداحمەتۇلى
«ايقىن».
