تالدىقورعان قالاسىنداعى نازارباەۆ زياتكەرلىك مەكتەبىنىڭ وقۋشىلارى World Robot Olympiad – 2024 تۇركيادا وتكەن روبوتوتەحنيكا الەم چەمپيوناتىندا ءۇشىنشى ورىن مەن ارنايى نوميناتسياعا يە بولدى.
الەمنىڭ 90 ەلىنەن 3500 جاس ينجەنەر قاتىسقان دودادا قازاقستان نامىسىن قورعاعان كوماندالار ەكى سانات بويىنشا جۇلدەگەر اتاندى.
بەدەلدى بايقاۋعا ەلىمىزدىڭ اتىنان 13 قاتىستى. ولاردىڭ بارلىعى قازاقستاندىق جانە حالىقارالىق روبوتوتەحنيكا جارىستارىنىڭ جەڭىمپازدارى مەن جۇلدەگەرلەرى.
تالدىقورعاندىق NIS مەكتەبىنىڭ 11-12 سىنىپ وقۋشىلارى ىڭكار قۇرمانباەۆا مەن ايىم باۋىرجانقىزى «Future Innovators Senior» نوميناتسياسىندا ونەر كورسەتتى. ولار ورماندى قالپىنا كەلتىرۋگە ارنالعان اۆتونومدى روبوت جاسادى. ءبىر تسيكلدە روبوت 60 كوشەت وتىرعىزا الادى، ول شىنجىر تاباندى ءشاسسيدىڭ ارقاسىندا كەز كەلگەن توپىراقتا جۇمىس اتقارىپ، قيىن جەرلەردە جۇرە الادى.
بۇل جوبا - تولىق ولشەمدى، دايىن روبوت، ونى ءدال قازىر پراكتيكا جۇزىندە ورمان وتىرعىزۋ قاجەت جەرلەردە قولدانۋعا بولادى. روبوتتى باسقارۋ جاساندى ينتەللەكت نەگىزىندە اۆتونومدى تۇردە جۇزەگە اسىرىلادى، — دەيدى ىڭكار مەن ايىم.
سنىمەن قاتار بۇل جوبا تەك اعاش وتىرعىزىپ قانا قويماي، ورماننىڭ قالاي وسەتىنى تۋرالى بولجام جاسايدى ءارى تابيعاتتى قوقىستاردان تازارتادى. ەگەر قوقىس تابىلسا، روبوت اۆتوماتتى تۇردە مانيپۋلياتوردىڭ كومەگىمەن قوقىستى جينايدى.
10 - سىنىپ وقۋشىلارى سەرجان قادىلبەك، اقنيەت مولداكەرىموۆ Future Innovators Junior ساناتىندا جوعارى پيلوتاجدى كورسەتتى. ولار ارنايى «Technical solution award» نوميناتسياسىنا يە بولدى.
زياتكەرلەر قۇتقارۋ روبوت قايىعىن جاسادى. جوبا كاتاماران قايىعىنىڭ ءپروتوتيپى بولىپ تابىلادى، ول جاساندى ينتەللەكت ارقىلى قيىندىقتا قالعان ادامداردى اۆتوماتتى تۇردە تابا الادى جانە جىلجىمالى باسپالداقتار ارقىلى ادامداردى سۋدان نەمەسە شاتىردان شىعارىپ قۇتقارا الادى. قايىقتىڭ بورتىندا العاشقى كومەك قۇرالدارى بار.
وسى كوكتەمدە قازاقستان بۇرىن-سوڭدى بولماعان سۋ تاسقىنىنا تاپ بولدى، كوپتەگەن ەلدى مەكەندەر تولىعىمەن سۋ استىندا قالدى. روبوت سۋ باسقان ەلدى مەكەندەردى اۆتونومدى تۇردە كۇزەتىپ، ادامداردى قۇتقارا الادى، — دەپ قورىتىندىلادى جوبا اۆتورلارى.
تۇركيادا وتكەن روبوتوتەحنيكادان الەم چەمپيوناتى World Robot Olympiad – 2024 جارىسىنىڭ قورىتىندىسى بويىنشا جەڭىمپازدار يزمير ساپارىنىڭ شىنىمەن دە تاريحي بولعانىن اتاپ ءوتتى.
قازاق وقۋشىلارى ءوز مەكتەپتەرىنىڭ زەرتحانالارىندا كوپ ۋاقىتىن وتكىزىپ، روبوتتارىن قۇراستىرۋعا ايلار بويى ەڭبەك ەتتى. جاس ونەرتاپقىشتار روبوت بولشەكتەرىن وزدەرى مودەلدەپ، كەيىن مەكتەپ شەبەرحانالارىندا جابدىقتالعان 3D پرينتەر مەن لازەرلىك ماشينالاردا جوبالارىن جۇزەگە اسىردى.
روبوتوتەحنيكانىڭ ارقاسىندا ءبىز الەمدى تانۋعا، ساياحاتتاۋعا جانە باسقا ەلدەردىڭ وزىق وقۋشىلارىمەن كەزدەسۋگە مۇمكىندىك الدىق. بۇل ساپار ءوز قابىلەتىمىزگە سەنىمدىلىك بەردى – ءبىز الەمنىڭ ەڭ مىقتى كوماندالارىمەن ەل نامىسى ءۇشىن كۇرەستىك. بۇل ءبىز ءۇشىن قىزىقتى ءارى مارتەبەلى بولدى. سونداي-اق باپكەرلەرىمىزگە شىدامدىلىق تانىتىپ، بولاشاعىمىزعا قوسقان ۇلەستەرى ءۇشىن العىس ايتامىز، - دەپ ءوز پىكىرىن سەرجان قادىلبەك ءبىلدىردى.
ايتا كەتسەك، «نازارباەۆ زياتكەرلىك مەكتەپتەرى» دببۇ – 2014 جىلدان بەرى World Robot Olympiad حالىقارالىق روبوتوتەحنيكا وليمپياداسىنىڭ قازاقستانداعى ۇلتتىق ۇيىمداستىرۋشىسى. 10 جىل ىشىندە NIS ەلىمىزدەگى روبوتوتەحنيكا سالاسىنىڭ دامۋىنا جانە وتاندىق كوماندالاردىڭ حالىقارالىق دەڭگەيدەگى جەتىستىكتەرىنە ايتارلىقتاي ۇلەس قوستى.
