- سىزگە سۇحبات الماق نيەتپەن حابارلاسقانىمدا، «مەنەن بە؟» دەپ قايىرا سۇرادىڭىز. نەگە تاڭداندىڭىز؟
- كوپ جاعدايدا ارىپتەستەرىڭىز مەن ارقىلى بىرقاتار انشىلەرگە شىعىپ، تىلدەسىپ جاتادى. سوندىقتان تابان استى، ءدال بۇگىن مەنەن بىرەۋ سۇحبات الا قويار دەپ كۇتپەگەن ەدىم.
- جالپى، سۇحباتتاسۋدان قاشپايسىز عوي…
- ەگەر سۇراق تىكەلەي ماعان قاتىستى بولسا، مەنىڭ بىلەتىن سالاممەن بايلانىستى قويىلسا، ءوز ويىمدى ورتاعا سالىپ، بولىسۋگە ارقاشان دايىنمىن.ال مەنىڭ شامام كەلمەيتىن دۇنيەگە جانىمدى جەپ، شىرقىراپ العا شىعۋعا تىرىسپايمىن. كورپەمە قاراي كوسىلەمىن. وندا دا ءساتى ءتۇسىپ، رەتى كەلىپ تۇرسا… ءجون-جوسىقسىز اتىمدى شىعارايىن دەگەن ولەرمەندىكپەن كيلىكپەيتىن جەرگە كىرىسپەيمىن. جالعان جارناما ماعان قاجەت ەمەس.
- قازاق راديوسىنداعى «نازقوڭىر»، «سال دومبىرا» اۆتورلىق حابارىڭىزدا ءوزىڭىز دە ونەر ادامدارىمەن ءبىر كىسىدەي سۇحبات جۇرگىزەسىز… ءوز سالاڭىز بولعاننان كەيىن اسا قيىندىق تۋدىرمايتىن سياقتى…
- قازاق راديوسىنان 1 مامىردان باستاپ قىسقارتۋعا ۇشىراپ، جۇمىستان كەتتىم. وعان دەيىن ءداستۇرلى ءان ونەرىنىڭ وكىلدەرىن جاقسى تانىعاننان سوڭ، كىمنىڭ بەيىمى قاي باعىتتا ەكەنىن ءبىلىپ جۇرگەننەن كەيىن، ءوز قازانىمدا قايناپ، ەمىن-ەركىن كوسىلۋ وڭايىراق بولعانى راس. بارلىق حابارلارىمدا تالاي توپتى جارىپ شىققان كىل جۇيرىكتەردى سويلەتىپ، ۇزەڭگىلەستەرىمدى اڭگىمەگە تارتىپ، تالپىنىپ جۇرگەن جاستاردىڭ دا تۇساۋىن كەسىپ، بار مۇمكىندىگىمشە ءداستۇردىڭ دارىپتەلۋىن ماقسات تۇتتىم دەپ ايتا الامىن.
- ۇلتتىق مۇراعا ارنالعان حاباردىڭ جابىلۋىنا نە سەبەپ بولدى؟
- «باعدارلاما نەگە جابىلدى؟» دەگەن سۇراق راديونىڭ باسشىلىعىنا قويىلاتىن سۇراق سەكىلدى. ءوز باسىم «نەگە بۇلاي؟» دەپ تۇسىندىرۋلەرىن سۇراپ، ادىلدىك ىزدەگەن جوقپىن. سەبەبى پايعامبارىمىز «ارالارىڭداعى امىرشىگە قارادان شىققان قۇل بولسا دا باعىنىڭدار» دەيدى. مەن وسى قاعيدانى ۇستانامىن. ءامىرشىم بولعاننان كەيىن قازاق راديوسىنداعى باسشىلىققا باعىنۋىم كەرەك. ولار سولاي شەشكەن ەكەن، مەن كەلىستىم. قالعانىن وزدەرى بىلەدى.
- ال كەزىندە تەلەارنادان نەگە كەتتىڭىز؟
- وندا دا قىسقارتۋ ءجۇردى. بىراق اراعا ۋاقىت سالماي، ءبىر جۇمانىڭ ىشىندە ءجۇرسىن ەرمانوۆ اعامىز شاقىرىپ، «ۇلتتىق ونەرگە قاتىستى حالىققا كەرەك حابارلاردى دۇنيەگە اكەلەرسىڭ» دەپ راديوعا قابىلداعان ەدى…
- بىراق ايتەۋىر ناپاقاسىز قالماعان كورىنەسىز. ت.جۇرگەنوۆ اتىنداعى ونەر اكادەمياسىندا ءدارىس بەرەتىنىڭىزدى بۇگىن ءبىلىپ وتىرمىن…
- جۇمىسسىز قالدىم دەپ ەش قايعىرمايمىن. مەنى اسىرايتىن دا، باعاتىن دا، قولدايتىن دا الەمدى اسىراۋشى — اللا تاعالا. قازاق راديوسىنان كەتە سالىسىمەن، جامبىل اتىنداعى قازاق مەملەكەتتىك فيلارمونياسى ۇسىنىس ءبىلدىرىپ، وسى ۇجىمعا ءانشى رەتىندە جۇمىسقا ورنالاستىم. ال اكادەمياعا كەلۋىمە سەبەپشى بولعان — ءارى كۋرستاسىم، ءارى ونەردەگى اعام اقان ءابدۋالى.
2010 جىلدىڭ قىركۇيەگىنەن باستاپ وسىندا ارقانىڭ ءداستۇرلى ءان مەكتەبىنەن ءدارىس بەرۋگە الدىرتتى. قۇداي قالاسا، وسى سالاعا ءبىرجولاتا دەن قويماقپىن.
- شاماسى، ۇستازدىق قىزمەتىڭىز ۇناعان-اۋ…
- ۇنايدى. ءبىر جىلدىڭ ىشىندە قىزىعىن دا، قيىندىعىن دا كورىپ ۇلگەردىم.
ءوزىم جۇسىپبەك ەلەبەكوۆتىڭ كوزىن كورگەن، العاشقى شاكىرتى بولعان ساناق ابەۋوۆ پەن بەكبولات اعامىزدان ءتالىم الدىم. ەكەۋىنىڭ دە ساباق بەرۋ ءادىسى تىلگە جەڭىل، جۇرەككە قونىمدى. ونىڭ ۇستىنە، جۇرگەن جەرىمدە نەبىر مىقتى دومبىراشىلار مەن ءانشى-جىراۋلارمەن ەتەنە ارالاستىم. قازىر سونىڭ پايداسى ءتيىپ، ونەردەگى اعالارىمنان كورگەن-بىلگەن، جيعان-تەرگەن تاجىريبەمدى وزىمنەن كەيىنگىلەرگە ۇيرەتىپ جاتقان جايىم بار. الدىما كەلگەن ءار بالاعا ءاننىڭ ناقىشىن بۇزدىرماۋعا كۇش سالىپ، تالانتىنا قاراي تاپسىرما بەرۋگە تىرىسامىن. جەكە ءوز ءانىڭ بولسا، نە ىستەيمىن دەسەڭ دە ءوزىڭ بىلەسىڭ. ال قازاقتىڭ ءانى — ۇلتتىڭ بەت پەردەسى، ايناسى، تاريحى. قالاعان جەرىڭنەن ءيىرىمىن الىپ تاستاپ، ءوز جانىڭنان قالاعانىڭشا قوسا المايسىڭ. قازاق انىنە، قازاق ونەرىنە نەمقۇرايلىلىق تانىتۋ- ۇلتتىڭ تامىرىنا بالتا شاپقانمەن بىردەي دەپ بىلەمىن.
- «مولدابايدىڭ انىنە» ادەمى ءيىرىم، ەرەكشە ناقىش الىپ كەلدىڭىز. وسى ءان ءسىزدى تانىمالدىلىق شىڭىنا كوتەردى دەسەك، قاتەلەسپەيتىن شىعارمىز…
- بۇل ءاندى جەتكىزۋشى نەگىزى اقتوبەلىك اتاقتى ءانشى-تەرمەشى ءالي قۇرمانوۆ. ودان كەيىن بۇگىنگى زامانعا لايىقتاپ، وڭدەپ، بىزگە تۇرلەندىرىپ تانىستىرعان- بەكبولات تىلەۋحانوۆ. مەن ەكىنشى نۇسقانى ازداپ تولىقتىردىم.
جالپى، مەنىڭ كونسەرۆاتوريا قابىرعاسىنان باستاپ ءداستۇرلى ورتاعا ەرلان رىسقالي رەتىندە تانىلۋىما ىقپال ەتكەن — نياز سەرىنىڭ «بالقۋراي»، جاياۋ مۇسانىڭ «اق سيساسى»، ءۋايىس شوندىبايۇلىنىڭ «بوزقاراعانى» مەن مولدابايدىڭ ءانى «مولداباي». قايدا بارمايىن، كوپشىلىك مولدابايدىڭ ءانىن ءجيى سۇرايدى، جاقسى قابىلدايدى. شىنىندا، ماعان تانىمالدىلىق الىپ كەلدى دەسەك بولادى.
نەگىزى، اتا-انام ونەردەن قۇر الاقان ەمەس. شەشەم — مۇعالىم. اكەم — مال دارىگەرى. بايانمەن، دومبىرامەن ءان ايتادى. كەزىندە جانىبەك كارمەنوۆپەن قويان-قولتىق ارالاسقان. وسىدان ءتورت جىل بۇرىن اۋىلعا بارعانىمىزدا، شەشەم شاي ۇستىندە «قاراعىم، اينالايىن مولدابايدىڭ ءانىن ايتقانىڭ دۇرىس قوي، جاقسى ورىندايسىڭ. بىراق ودان باسقا ءان بىلمەيدى ەمەسسىڭ، نەگە حالىقتىڭ الدىنا باسقاسىن الىپ شىقپايسىڭ؟» دەپ ايتىپ تاستاعانى بار. سودان كەيىن ءبىراز ۋاقىت مولدابايدىڭ ءانىن شىرقاماۋعا تىرىستىم. ويتكەنى شەشەم ۇلكەن سىنشى. ونەردى جاقسى تۇسىنەدى. كوزى ءتىرى كەزىندە اكەم مارقۇم دا ارتىق-كەمىمدى جونىپ، اقىل-كەڭەسىن بەرىپ وتىراتىن. مادەنيەت ەشەكەەۆ، ساناق ابەۋوۆ، جانىبەك كارمەنوۆتەر اكەمدى كورگەندە ««قالامقاس»، «دۋدار-اي» كەلە جاتىر» دەپ قاۋقىلداسىپ قالادى ەكەن. ابايدىڭ «ايتتىم سالەم، قالامقاسى» مەن «ماريام جاگورقىزىنىڭ ءانى» دەپ جۇرگەن ۇدەبايدىڭ «دۋدار-ايىن» ايتقاندا، الدىنا جان سالمايتىن كورىنەدى. اتاعىنان ات ۇركەتىن وسىنداي ايتۋلى كىسىلەر مويىنداعان سوڭ، اكەمنىڭ تەگىن ءانشى بولماعانى عوي. وكىنەتىنىم، ەش جەردە داۋىسى ساقتالمادى. ەندى جازىپ الىپ قالايىق دەپ جۇرگەندە، اياق استىنان ناۋقاسقا شالدىعىپ، ارماندا كەتتى. ۇزىنقۇلاقتان ەستۋىمشە، كەڭەس ۇكىمەتىنىڭ تۇسىندا سەمەي راديوسىنان اندەرى، كونتسەرتتەرى بەرىلىپ تۇرعان كورىنەدى. قازىر ىزدەستىرىپ جاتىرمىن، ازىرگە ناتيجەسىز. سىزدەردىڭ گازەتتەرىڭىزدى پايدالانا وتىرىپ، ەگەر دە اكەم رىسقالي ازىمباەۆتىڭ تاسپالارى ءبىر كىسىلەردىڭ قولىندا ساقتالعان بولسا، حابارلاسۋىن وتىنگىم كەلەدى.
- ءۇيدىڭ ۇلكەنىسىز بە؟
- جوق، كەنجەسىمىن. شەشەم 11 قۇرساق كوتەرگەن. ونىڭ ۇشەۋى قىز، توعىزى ۇل. ءبىر اعامىز جىگىت جاسى — جيىرما بەسكە كەلگەن كەزىندە قايتىس بولدى. ءبىر اپايىم ەرتەرەكتە دۇنيەدەن ءوتىپتى.
- قارا شاڭىراقتىڭ يەسى ەكەنسىز عوي…
- ءيا، قارا شاڭىراقتىڭ يەسى بولۋ — كەنجە ۇلدىڭ موينىنداعى امانات. شەشەم دە ءالى كۇنگە ايتىپ وتىرادى. الايدا قالاعا كەتىپ، ونەردىڭ جولىنا تۇسكەننەن كەيىن اكەم دە، شەشەم دە رۇقساتتارىن بەرگەن. قازىر، انامنىڭ قولىندا ورتانشى اعام ايدىن مەن جەڭگەم جانار بار.
باۋىرلارىمنىڭ بارلىعى ونەرلى. بايان، گيتارا، دومبىرادا وينايدى. بالالىق شاعىمىزدا ءاندى دە، كۇيدى دە بىرىمىزدەن-ءبىرىمىز ۇيرەنىپ وستىك قوي. نەگىزى، ەڭ العاش تۇساۋىمدى كەسىپ، ونەرگە باۋلىپ، ءان قۇدىرەتىن سەزدىرتكەن اكەم. ءبىرجان سالدىڭ «جونىپ الدى» ءانى مەن حالىق ءانى «سۇرجەكەيدى» قۇلاعىما ابدەن ءسىڭىرىپ ەدى. وسىنداي سۇيەكتى اندەرمەن ساۋاتىمدى اشقاننان كەيىن بە، جەڭىل-جەلپى اۋەنگە مۇلدە قۇمارتپادىم. اۋىلدا دا، الماتىدا ا.جۇبانوۆ اتىنداعى مۋزىكالىق مەكتەپتە وقىپ جۇرگەنىمدە دە، كونسەرۆاتوريا قابىرعاسىندا دا تەك حالىق اندەرىن ناسيحاتتايتىنمىن. ءاۋ باستا ىرگە تاسىمنىڭ بەرىك قالانعاندىعىنان شىعار، قازاقتىڭ ۇلتتىق كلاسسيكالىق ونەرىنەن باسقا اۋەنگە مەندە قىزىعۋشىلىق سەزىم بولعان ەمەس.
- جيىن-تويدا جۇرتتى بيلەتۋ ءۇشىن جازىپ قويعان ەسترادالىق ءانىڭىز جوق پا؟
- كەيدە ءوز ورتامىزدا توقتار سەرىكوۆتىڭ رەپەرتۋارىنداعى «سىعان سەرەناداسى» ءانىن سول وڭدەۋمەن ورىندايتىنىم بار. باسقا ارنايى ءان جازدىرتقان ەمەسپىن. «ەسترادالىق ءان ورىنداۋ ماعان كەرەك پە، كەرەك ەمەس پە؟» دەگەن سۇراققا ءالى كۇنگە ويلانىپ، ءبىر شەشىمگە كەلە الماي ءجۇرمىن.
- قارا شاڭىراقتى تاستاپ، قالاعا كەلگەندە «قۇرقىلتايدىڭ ۇياسىنا» قول جەتكىزە الدىڭىز با؟
- كەيدە «اتام قازاقتىڭ ءداستۇرىن ساقتاپ، ۇلتتىق ونەردىڭ سوڭىندا جۇرگەن سوڭ، اندا-مىندا باس ساۋعالاپ، كوشپەلى قازاق بولىپ ءجۇرمىز» دەپ كۇلەمىن. قاراپايىم قازاقتىڭ ءبىر ۇلىمىن. الىپ بارا جاتقان داۋلەتىم جوق. بارىم دا، نارىم دا — قۇداي بەرگەن تالانتىم، داۋىسىم، انشىلىگىم، وتباسىم، دوس-جارانىم. مەنىڭ بار بايلىعىم — وسى. ادام رەتىندە ءوزىمدى باقىتتىمىن دەپ ەسەپتەيمىن. اۋەلى اللا تاعالا ءوزىن تانىتىپ، تۋرا جولىنا سالدى. پايعامباردىڭ سۇننەتىمەن جۇرۋگە ءناسىپ ەتتى. مۇسىلمان بولىپ جاراتىلعانىما شۇكىرشىلىك ەتەمىن. ءۇش جۇرتىم تۇگەل. 2007 جىلى جادىرا جۇماكۇلباي ەسىمدى اباي ءوڭىرىنىڭ قىزىمەن شاڭىراق كوتەردىم. قىزىم بار.
بۇل دۇنيەدە ءۇيسىز جۇرسەم دە، و دۇنيەدە جۇماقتان جاقسى ورىن بۇيىرسا دەپ تىلەيمىن.
- ەلباسىنىڭ الدىندا ءجيى ونەر كورسەتەتىن انشىلەردىڭ ءبىرىسىز. العاشقى كەزدەسۋ قالاي بولىپ ەدى؟
- 2005 جىلى ەلباسىنىڭ الدىنا ءان ايتۋعا باردىق. سەگىز سەرىنىڭ ءانى «عايني» مەن جاياۋ مۇسانىڭ ءانى «اق سيسانى» ايتىپ بەردىم. ول كىسى ريزا بولىپ، جانىنا شاقىرىپ الىپ، قولىمنان قىستى. سوسىن «قازاقتا «اس اساتۋ» دەگەن ۇلاعاتتى ءداستۇر بار. مەن ساعان ءوز قولىممەن اساتايىن» دەپ جايناپ تۇرعان داستارقاننىڭ ىشىنەن ءبىر ءتۇيىر قۇرت الىپ، اۋزىما سالدى. «سەن سونشا ءدامنىڭ ىشىنەن نەگە قۇرتتى عانا بەردى دەپ ويلاپ تۇرعان شىعارسىڭ. بىرىنشىدەن، قۇرت — قازاقتىڭ ۇلتتىق تاعامى. بىراق قاتتى. قۇرتتىڭ قاتتىلىعىمەن ءومىردىڭ قاتتىلىعى بىردەي. ال سەنىڭ جۇرگەن جولىڭ اق، اشىق بولسىن!» دەپ باتاسىن بەرگەن ەدى.
- كوپ جاعدايدا الدىڭعى تولقىن كەيىنگى جاستارعا وسىنداي سەنىم بىلدىرە بەرمەيدى. ءسىز سوڭىڭىزدان ءوسىپ كەلە جاتقان ونەرلى جاستارعا سەنەسىز بە؟
- سەنەمىن. «ەل ءىشى — ونەر كەنىشى» دەگەندەي، وكشەمىزدى باسىپ كەلە جاتقان ءىنى-قارىنداستارىمىز جەتەرلىك. ۇلتتىق ونەر جاقسى دامىپ كەلەدى. اڭگىمە ولاردى دۇرىس تاربيەلەپ، دۇرىس باعىت-باعدار بەرىپ، جاعدايىن جاساۋدا. ءداستۇرلى ونەرگە بەت بۇرعان قازىرگى جاستار جان-جاقتى ءبىلىم الادى. كۇي بولسىن، داۋىس قويۋ، فورتەپيانو، سولفەدجيو دەيسىز بە، ايتەۋىر مۋزىكاعا قاتىستى دۇنيەنىڭ بارلىعىن مەڭگەرىپ جاتىر. ارينە، كەرى كەتىپ جاتقان تۇستارى دا جوق ەمەس. ءاننىڭ تاريحىنا ۇڭىلمەي، كۇيدى تۇسىنبەي، تەحنيكاعا سالىپ، زىرىلداتاتىندار بار. سولاردىڭ اراسىنان ىلۋدە بىرەۋ جارىپ شىعادى عوي. جۇرەكتەرىنە ءسوز، كوكەيلەرىنە ءان قونباسا دا قيىن. مەنىڭ ويىمشا، ءداستۇرلى انشىلىك-جىرشىلىق، كۇيشىلىك مەكتەپتەردى، ولاردىڭ بۇرىنعى، قازىرگى ورىنداۋشىلارىن سالالاپ وتىرىپ، ءان-كۇي ساباعىنان باستاپ وقۋ باعدارلاماسىنا ەنگىزۋ كەرەك. بىزدە، وكىنىشكە قاراي، اۋىل مەكتەپتەرىندە مۋزىكا ساباعىنان ساۋاتتى مامان جوق. ونەرگە ءۇش قايناسا، سورپاسى قوسىلمايتىن، قولى بوس ادام جۇرگىزە بەرەدى. بۇل دۇرىس ەمەس. وقۋشىنىڭ بارلىعى ەرتەڭ ونەر ادامى بولىپ كەتۋى شارت ەمەس، بىراق ءان ساباعى كاسىبي دەڭگەيدە ءوتىپ، تيتتەيىنەن ۇلتتىق ونەردى تانىپ، بىلگەن بالادان وسە كەلە، مىقتى تىڭدارمان شىعاتىنى انىق. تىڭدارمان تۇزەلسە، ونەرپازدان دا سۇرانىس ەكى ەسەگە ارتادى.
وسىنىڭ بارلىعىن تەزگە سالىپ، ءبىر جونگە تۇسىرسە، قازاق ونەرىنىڭ بولاشاعى بۇدان دا جارقىن بولارى ءسوزسىز. بۇلىڭعىر دەپ ايتۋعا اۋزىم بارمايدى.
- كەيدە ءداستۇرلى ءان كەشتەرىندە ميكروفون ىستەمەي قالىپ نەمەسە دۇرىس قويىلماي، ءانشى نەگە ۇياتقا قالىپ جاتادى؟
- ويتكەنى بىزدە ءداستۇرلى ءانشىنىڭ داۋىس مۇمكىندىگىن ايشىقتاپ، ەرەكشەلىگىن ەسكەرىپ، ونى قاداعالاپ، رەتتەپ وتىراتىن دىبىس رەجيسسەرلەرى جوقتىڭ قاسى. ابدەن ءبىر تەتىكتى باسىپ، فونوگرامما قوسىپ ۇيرەنىپ العانداردىڭ بۇعان شاماسى جەتپەيدى. بىردە ءانشىنىڭ داۋىسى، بىردە دومبىرانىڭ داۋىسى باسىم ءتۇسىپ، قيۋى كەتىپ جاتاتىنى، سوندىقتان. ارىپتەستەرىمە ۇلتتىق ونەرپازدارعا ميكروفون قويا بىلەتىن ماقسات مۇحيتدينوۆ، بەيبىت اقوش، ەرمەك كۇسەنوۆ سيياقتى ازاماتتاردىڭ كومەگىنە جۇگىنۋگە كەڭەس بەرەر ەدىم. ماقسات اعامىز ۋاقىتىندا جۇسىپبەكتىڭ، عاريفوللانىڭ، جانىبەكتىڭ داۋىسىن جازعان كىسى. ول بىلمەگەندە كىم بىلەدى؟! وسىنداي بىلىكتى ازاماتتارعا جاعداي جاسالىپ، وقۋ وردالارىندا تاجىريبەسىمەن بولىسەتىن اشىق ساباقتار جۇرگىزىلسە، دۇرىس بولار ەدى. ەرتەڭ كىمنەن ۇيرەنەمىز؟ ونسىز دا جوق رەجيسسەردى قايدان تابامىز؟
- تەلەارناعا، راديوعا توسەلىپ قالدىڭىز. تەلەباعدارلاما اشۋ ويىڭىزدا جوق پا؟
- بىزدە تەلەارنالاردا ۇلتتىق مۇرانى ناسيحاتتاۋ جاعى اقساپ جاتقانى ايتىلماسا دا بەلگىلى. قازىرگى پروديۋسەرلەر شوۋ-باعدارلامالارعا، ارزان، جەڭىل كۇلكىگە بەيىم. سانادا ۇلتتىق ونەرگە قاتىستى نەشە ءتۇرلى باعدارلامالار تۇر. مۇرات ابۋعازى، جاسۇلان بازاربەكوۆ دەگەن ءانشى-كۇيشىلەرمەن بىرىگىپ، ءبىر تەلەباعدارلامانىڭ جوسپارىن جاساپ ەدىك، قولداۋ جوق. ستسەناريىڭىزدى بەرسەڭىز، يدەياڭىزدى الىپ قالادى دا، وزىڭىزگە «ساۋ بول» دەيدى. وكىنىشكە قاراي، ەشقانداي ارنانىڭ ەفيرىنەن شىعارا المادىق.
- قانداي اتاعىڭىز بار دەپ جازايىن…
-مەنىڭ اتاعىم — ەرلان رىسقالي. باسقا اتاق-مانساپتىڭ كەرەگى نە؟! ماعان سول جەتەدى. مەنىڭ اتى-ءجونىمدى ەشكىم تارتىپ الا المايدى. بۇعان قوسىمشا، حالىقارالىق، رەسپۋبليكالىق بايقاۋلاردىڭ جەڭىمپازىمىن. ءوز ورنىمەن، جونىمەن بەرىلگەن اتاقتان قاشپاۋ كەرەك. بىراق ءوزىمدى-ءوزىم ەشقاشان اتاق، قۇرمەتكە ۇسىنبايمىن.
«ات شىعارۋ جولىندا ارىن اتتاپ، انت بۇزعان،
پايعامبار مەن پەرعاۋىن بولۋدان دا دامەلى.
قۇداي باسقا بەرمەسىن،
ونداي كەسەل، پالەنى» دەيدى اقىن اعامىز جارىلقاسىن امانۇلى. ەشكىم اتاقپەن كورگە كىرمەيدى. قانشا اتىڭ دۇرىلدەپ تۇرسا دا، احيرەت كۇنى جانىڭا اراشا بولمايدى. حالىق جىرلارىندا ايتىلعانداي، «بۇل دۇنيەدە اقىن دا، حان دا، قارا دا، باتىر دا وتكەن». بىرەۋىمىز ەرتە، بىرەۋىمىز كەش، ءبىز دە وتەرمىز. حاكىم اباي ەشقانداي نوبەل سىيلىعىنىڭ يەگەرى نەمەسە حالىق قاھارمانى ەمەس قوي. قازاق ءۇشىن قالدىرعان مۇراسىمەن ماڭگىلىك جاساي بەرمەك. اللا تاعالانىڭ «قايدا بارساڭدار دا ۇستايمىن. قايدا بارساڭدار دا اجالدىڭ ءدامىن تاتاسىڭدار» دەگەن ءسوزى بار. قانشا اتاقتى بولساڭ دا اجالدىڭ ءدامىن تاتۋعا تۋرا كەلەدى. ەڭ باستىسى، سونداي ءسات تۋعاندا ارتىڭدا جاقسى امالدارىڭ مەن ۇرپاققا اتالى مۇراڭ قالسا يگى.
اڭگىمەلەسكەن
قانشايىم بايداۋلەت،
«ايقىن».
