قاراعاندى وبلىسىنىڭ شەت اۋدانىندا ەلەكترمەن جابدىقتاۋداعى ماسەلەلەرگە بايلانىستى جەرگىلىكتى اۋقىمداعى توتەنشە جاعداي رەجيمى ەنگىزىلدى، دەپ حابارلايدى “ادىرنا” ۇلتتىق پورتالى Tengrinews.kz-كە سىلتەپ.
وبلىستىق اكىمدىكتىڭ مالىمەتىنشە، “شەت-ەنەرگو” كومپانياسى “جەزقازعان تاراتۋ ەلەكتر جەلىلىك كومپانياسىنىڭ” ەلەكتر ەنەرگياسىن بەرۋ جونىندەگى تالاپتارىن ورىنداماعان. سونىڭ سالدارىنان اۋداندا ەلەكتر قۋاتىن بەرۋ شەكتەلىپ، تۇرعىندار جارىقسىز جانە جىلۋسىز قالۋدا.
بۇل تۋرالى شەت اۋدانىنىڭ اكىمى الەۋمەتتىك جەلىدەگى پاراقشاسىندا مالىمدەدى.
اكىمدىكتىڭ ايتۋىنشا، “شەت-ەنەرگو” كومپانياسى جىلدار بويى ەلەكتر جەلىلەرىن جاڭعىرتۋعا قارجى سالماعان، بۇل جۇيەلى تۇردە اپاتتىق جاعدايلاردىڭ تۋىنداۋىنا سەبەپ بولعان.
“تۇرعىندار ءجيى جارىقتىڭ سونۋىمەن قاتار، جىلۋدىڭ دا بولماۋىنان زارداپ شەگۋدە. تۇراقتى ەسكەرتۋلەرگە قاراماستان، “شەت-ەنەرگو” قىزمەت كورسەتۋ ساپاسىن جاقسارتا المادى”، – دەلىنگەن قاراعاندى وبلىسى اكىمدىگىنىڭ حابارلاماسىندا.
ايتا كەتەيىك، بۇعان دەيىن قاراعاندى وبلىسى اكىمدىگى “شەت-ەنەرگو” كومپانياسىنىڭ مۇلكىن مەملەكەتتىك مەنشىككە بەرۋ جوسپارى بارىن مالىمدەگەن بولاتىن. 2024 جىلدىڭ جەلتوقسانىندا كومپانيانى سوتقا بەرىپ، ونىڭ مۇلكىن مەملەكەت مەنشىگىنە الۋ تۋرالى شەشىم قابىلدانعانى حابارلانعان.
“كومپانيا تاراپىنان ءجيى اپاتتى جاعدايلار ورىن الدى. تۇرعىنداردىڭ ءومىرى مەن دەنساۋلىعىنا زيان كەلمەۋى ءۇشىن “شەت-ەنەرگو” مۇلكىن مەملەكەت مەنشىگىنە قايتارۋ تۋرالى سوتقا جۇگىنۋ تۋرالى شەشىم قابىلداندى”، – دەلىنگەن اكىمدىك مالىمدەمەسىندە.
