«سامۇرىق-قازىنا» ۇلتتىق ءال-اۋقات قورى قايرات بورانباەۆتىڭ بۇرىنعى كومپانياسى «ازياگاز چۋندجا» جشس-نىڭ 100% اكتسياسىن ساتىپ الۋ تۋرالى شەشىم قابىلدادى. بۇل تۋرالى KASE سايتىندا جاريالاندى، دەپ حابارلايدى “ادىرنا” ۇلتتىق پورتالى.
ايتا كەتسەك، «ازياگاز چۋندجا» كومپانياسى 2014 جىلى قۇرىلعان. گاز تاسىمالداۋمەن جانە وتكىزۋمەن اينالىسادى. بۇعان دەيىن قارجىلىق مونيتورينگ اگەنتتىگى كومپانيانىڭ قۇنىن 14 ملرد تەڭگەگە باعالاعان. قازىرگى تاڭدا «ازياگاز چۋندجا» جشس قر قارجى مينيسترلىگىنىڭ مەملەكەتتىك مۇلىك جانە جەكەشەلەندىرۋ كوميتەتىنە تيەسىلى.
2023 جىلى قايرات بورانباەۆ اسا ءىرى مولشەردەگى مەملەكەت قارجىسىن جىمقىردى جانە كولەڭكەلى كىرىستى زاڭداستىردى دەگەن ايىپپەن ۇستالعان بولاتىن. تەرگەۋ مالىمەتىنشە، 2019 جىلى «ازياگاز چۋندجا» جشس ارقىلى گاز تاسىمالداۋ كەزىندە QazaqGaz ۇلتتىق كومپانياسىنىڭ قاراجاتى ۇرلانعان.
بۇعان دەيىن قايرات بورانباەۆ مۇناي سالاسىنداعى كەن ورىندارىن، قىزمەت كورسەتۋ كاسىپورىندارىن، قوناق ءۇي، ساۋدا – ويىن-ساۋىق كەشەندەرىن، فيتنەس-ورتالىق جەلىلەرىن، كەڭسە عيماراتتارىن جانە باسقا دا كوپتەگەن اكتيۆتەرىن مەملەكەت مەنشىگىنە وتكىزگەن بولاتىن. اتاپ ايتقاندا «ازياگاز چۋندجا» جشس، Comfort Hotel Astana, FitNation فيتنەس-كلۋب جەلىسى، «قازتۋربورەمونت» زاۋىتى، «المالى» ساۋدا – ويىن-ساۋىق كەشەنى بار.
