Qaraǵandy oblysynyń Shet aýdanynda elektrmen jabdyqtaýdaǵy máselelerge baılanysty jergilikti aýqymdaǵy tótenshe jaǵdaı rejımi engizildi, dep habarlaıdy “Adyrna” ulttyq portaly Tengrinews.kz-ke siltep.
Oblystyq ákimdiktiń málimetinshe, “Shet-Energo” kompanııasy “Jezqazǵan taratý elektr jelilik kompanııasynyń” elektr energııasyn berý jónindegi talaptaryn oryndamaǵan. Sonyń saldarynan aýdanda elektr qýatyn berý shektelip, turǵyndar jaryqsyz jáne jylýsyz qalýda.
Bul týraly Shet aýdanynyń ákimi áleýmettik jelidegi paraqshasynda málimdedi.
Ákimdiktiń aıtýynsha, “Shet-Energo” kompanııasy jyldar boıy elektr jelilerin jańǵyrtýǵa qarjy salmaǵan, bul júıeli túrde apattyq jaǵdaılardyń týyndaýyna sebep bolǵan.
“Turǵyndar jıi jaryqtyń sónýimen qatar, jylýdyń da bolmaýynan zardap shegýde. Turaqty eskertýlerge qaramastan, “Shet-Energo” qyzmet kórsetý sapasyn jaqsarta almady”, – delingen Qaraǵandy oblysy ákimdiginiń habarlamasynda.
Aıta keteıik, buǵan deıin Qaraǵandy oblysy ákimdigi “Shet-Energo” kompanııasynyń múlkin memlekettik menshikke berý jospary baryn málimdegen bolatyn. 2024 jyldyń jeltoqsanynda kompanııany sotqa berip, onyń múlkin memleket menshigine alý týraly sheshim qabyldanǵany habarlanǵan.
“Kompanııa tarapynan jıi apatty jaǵdaılar oryn aldy. Turǵyndardyń ómiri men densaýlyǵyna zııan kelmeýi úshin “Shet-Energo” múlkin memleket menshigine qaıtarý týraly sotqa júginý týraly sheshim qabyldandy”, – delingen ákimdik málimdemesinde.
