Qaraǧandy oblysynyŋ Şet audanynda elektrmen jabdyqtaudaǧy mäselelerge bailanysty jergılıktı auqymdaǧy tötenşe jaǧdai rejimı engızıldı, dep habarlaidy “Adyrna” ūlttyq portaly Tengrinews.kz-ke sıltep.
Oblystyq äkımdıktıŋ mälımetınşe, “Şet-Energo” kompaniiasy “Jezqazǧan taratu elektr jelılık kompaniiasynyŋ” elektr energiiasyn beru jönındegı talaptaryn oryndamaǧan. Sonyŋ saldarynan audanda elektr quatyn beru şektelıp, tūrǧyndar jaryqsyz jäne jylusyz qaluda.
Būl turaly Şet audanynyŋ äkımı äleumettık jelıdegı paraqşasynda mälımdedı.
Äkımdıktıŋ aituynşa, “Şet-Energo” kompaniiasy jyldar boiy elektr jelılerın jaŋǧyrtuǧa qarjy salmaǧan, būl jüielı türde apattyq jaǧdailardyŋ tuyndauyna sebep bolǧan.
“Tūrǧyndar jiı jaryqtyŋ sönuımen qatar, jyludyŋ da bolmauynan zardap şegude. Tūraqty eskertulerge qaramastan, “Şet-Energo” qyzmet körsetu sapasyn jaqsarta almady”, – delıngen Qaraǧandy oblysy äkımdıgınıŋ habarlamasynda.Aita keteiık, būǧan deiın Qaraǧandy oblysy äkımdıgı “Şet-Energo” kompaniiasynyŋ mülkın memlekettık menşıkke beru jospary baryn mälımdegen bolatyn. 2024 jyldyŋ jeltoqsanynda kompaniiany sotqa berıp, onyŋ mülkın memleket menşıgıne alu turaly şeşım qabyldanǧany habarlanǧan. “Kompaniia tarapynan jiı apatty jaǧdailar oryn aldy. Tūrǧyndardyŋ ömırı men densaulyǧyna ziian kelmeuı üşın “Şet-Energo” mülkın memleket menşıgıne qaitaru turaly sotqa jügınu turaly şeşım qabyldandy”, – delıngen äkımdık mälımdemesınde.
Ūqsas jaŋalyqtar
