قازاقستانداعى Burger King مەيرامحانالار جەلىسى ەكى شەتەلدىك باسشىنى جۇمىستان بوساتۋ تۋرالى شەشىم قابىلدادى، دەپ حابارلايدى "ادىرنا" ۇلتتىق پورتالى.
كومپانيا الەۋمەتتىك جەلىلەردە رەسمي مالىمدەمە جاريالاپ، ىشكى تەكسەرىس ناتيجەسىندە اۋماقتىق مەنەدجەرلەر سەرگەي مەن اناستاسيانىڭ قىزمەتتەن بوساتىلعانىن مالىمدەدى. كومپانيا وكىلدەرىنىڭ ايتۋىنشا، بۇل شەشىم قىزمەتكەرلەردىڭ ار-نامىسى مەن قادىر-قاسيەتىنە نۇقسان كەلتىرەتىن كەز كەلگەن ارەكەتكە جول بەرمەۋ قاعيداتىنا نەگىزدەلگەن.
Burger King جەلىسىنىڭ قازاقستاندىق بولىمشەسى كەمسىتۋ، قۇرمەتتەمەۋ نەمەسە ازاماتتاردىڭ ابىرويىنا تيەتىن سوزدەرگە قارسى ەكەنىن اتاپ ءوتتى. سونىمەن قاتار ىشكى تەرگەۋ جۇمىستارى ءالى جالعاسىپ جاتقانى حابارلاندى.
كومپانيا مالىمەتىنشە، قازىرگى ۋاقىتتا بارلىق دەرەك جان-جاقتى تەكسەرىلىپ، كوماندا ىشىندەگى جۇمىس پروتسەسى مەن ءوزارا قارىم-قاتىناس قوسىمشا تالدانۋدا. كومپانيا قىزمەتكەرلەردى جۇمىسقا قابىلداۋ مەن كادر ساياساتى كەزىندە تەڭ مۇمكىندىك پەن ينكليۋزيۆتىلىك قاعيدالارىن ۇستاناتىنىن مالىمدەدى.
ايتا كەتەيىك، الەۋمەتتىك جەلىلەردە اتالعان جاعدايعا بايلانىستى قىزۋ پىكىرتالاس ءجۇرىپ جاتىر. قولدانۋشىلاردىڭ ءبىر بولىگى باسشىلىق قۇرامدا جەرگىلىكتى مامانداردىڭ ۇلەسىن ارتتىرۋ قاجەت ەكەنىن ايتسا، ەندى ءبىرى قىزمەتكەرلەر اراسىندا تۇراقتى ءانونيمدى ساۋالناما جۇرگىزۋدى ۇسىندى.
داۋدىڭ تۋىنداۋىنا الەۋمەتتىك جەلىدەگى جازبا سەبەپ بولعان. وندا ايەل ادام Burger King مەيرامحانالارىنىڭ بىرىندە جۇمىس ىستەگەن ۇلىنىڭ جاعدايى تۋرالى جازعان. ونىڭ ايتۋىنشا، جاڭا باسشىلىق كەلگەننەن كەيىن قىزمەتكەردىڭ پسيحولوگيالىق جاعدايى وزگەرگەن.
كومپانيا رەسمي ۇستانىمىندا قىزمەتكەر جۇمىستان شىعارىلماعانىن جانە ءالى دە جۇمىس ورنىندا تىركەلگەنىن مالىمدەدى. سونىمەن قاتار ەڭبەك قاتىناسىن توقتاتۋ تۋرالى ءوتىنىشتى قىزمەتكەردىڭ ءوزى جازۋى ءتيىس ەكەنى ءتۇسىندىرىلدى.
قازاقستان زاڭناماسىنا سايكەس، ەڭبەك شارتىن توقتاتۋ تۋرالى ءوتىنىشتى ءۇشىنشى تۇلعا راسىمدەي المايدى. كومپانيا قىزمەتكەرگە باسقا فيليالعا اۋىسۋ سياقتى بالاما نۇسقالار ۇسىنىلعانىن دا اتاپ ءوتتى.
