شىمكەنت–الماتى باعىتىنداعى رەيستىڭ جولاۋشىسى FlyArystan اۋە كومپانياسىنان مورالدىق زيان ءۇشىن وتەماقى ءوندىرىپ الدى، دەپ حابارلايدى “ادىرنا”.
سوت تاسىمالداۋشىنى جولاۋشىنىڭ سوت شىعىندارىن تولىق وتەۋگە دە مىندەتتەدى.
وقيعا بيىل شىلدە ايىندا شىمكەنت اۋەجايىندا بولعان. زاڭگەر ابىلاي بايتەنوۆتىڭ ايتۋىنشا، سىرتتاعى اۋا تەمپەراتۋراسى 40 گرادۋسقا جەتكەن كەزدە جولاۋشىلار كونديتسيونەرى قوسىلماعان، ەسىكتەرى جابىق ۇشاقتىڭ ىشىندە شامامەن 45 مينۋت وتىرعان.
جولاۋشى اۋە كومپانياسىنىڭ قىزمەت كورسەتۋ ساپاسىنا بايلانىستى سوتقا تالاپ ارىز تۇسىرگەن. ءىس بويىنشا دالەلدەردىڭ ءبىرى رەتىندە وقيعا كەزىندە سمارتفونعا تۇسىرىلگەن بەينەجازبالار ۇسىنىلعان.
ابىلاي بايتەنوۆ الەۋمەتتىك جەلىدەگى پاراقشاسىندا وقيعانىڭ ساعات 17:00 شاماسىندا بولعانىن جازدى. ونىڭ سوزىنشە، سوت وتىرىسىندا اۋە تاسىمالداۋشىسى جاعدايدى زاڭبۇزۋشىلىق دەپ مويىنداماعان.
ءبىرىنشى ساتىداعى سوت جولاۋشىنىڭ تالابىن قاناعاتتاندىرىپ، FlyArystan كومپانياسىنان مورالدىق زيان ءۇشىن وتەماقى ءوندىرىپ الۋ تۋرالى شەشىم شىعارعان. سونداي-اق كومپانيا جولاۋشىنىڭ سوت شىعىندارىن تولىق وتەۋگە مىندەتتەلگەن.
زاڭگەردىڭ ايتۋىنشا، ءىس ءالى جالعاسۋى مۇمكىن. ول اۋە كومپانياسى اپەللياتسيالىق شاعىم تۇسىرەدى دەپ كۇتىپ وتىرعانىن جەتكىزدى. قازىرگى ۋاقىتتا ءىستىڭ بۇدان ءارى قالاي ءوربيتىنى بەلگىسىز.
