ۇلتتىق ەكونوميكا ءمينيسترى الىبەك قۋانتىروۆ 30 قاڭتارداعى ۇكىمەت وتىرىسىنىڭ قورىتىندىسى بويىنشا وتكەن ءباسپاسوز ءماسليحاتىندا 2024 جىلى كوممۋنالدىق قىزمەت تاريفتەرىنىڭ شامامەن قانشاعا وسەتىنىن ايتتى، دەپ حابارلايدى “ادىرنا” ۇلتتىق پورتالى.
ونىڭ ايتۋىنشا، تاريفتىك باعدارلاما جەتى جىلعا ەسەپتەلگەندىكتەن، جىل سايىن تاريفتەردى تۇزەتۋ كۇتىلەدى.
«تاريفتەردى تۇزەتۋ ءار جىلى كۇتىلەدى، ويتكەنى تاريفتىك باعدارلاما جەتى جىلعا سوزىلادى. ورتاشا العاندا، كەيبىر سۋبەكتىلەر مەن تكش تۇرلەرى بويىنشا تاريفتەردىڭ ءوسۋى 10-15 پايىز بولادى. بۇل ورتاشا ەسەپپەن 20-30 پايىزدى قۇرايدى. سۋ – ماڭىزدى رەسۋرس. ءبىز ونى ۇنەمدەۋگە تىرىسۋىمىز كەرەك. تەك ينفلياتسيانى ۇستاپ تۇرۋ كەرەك»، - دەدى قۋانتىروۆ.
بۇل وزگەرىس كوممۋنالدىق قىزمەتتەردىڭ بارلىق تۇرلەرىنە ارنالعان، ويتكەنى ءمينيستردىڭ ايتۋىنشا، ينفراقۇرىلىمنىڭ توزۋى قىزمەتتىڭ كەز كەلگەن تۇرىندە بار. تاريفتەردى كوتەرۋ ەسەبىنەن تۇسكەن اقشا ينفراقۇرىلىمدى جاڭارتۋعا باعىتتالادى.
"كوممۋنالدىق قىزمەتتەردىڭ بارلىق تۇرلەرى بويىنشا ينفراقۇرىلىمنىڭ توزۋى بار. توزعان قۇبىرلار، جەلىلەر، سۋ قۇبىرلارى. كارىز جۇيەسى اسىرەسە قاتتى توزعان، ال شوتتار از. ەكى بولمەلى پاتەرگە ورتاشا ەسەپپەن كارىز شوتى - 200 تەڭگە. كوتەرۋ كەرەك", - دەپ ءتۇسىندىردى قۋانتىروۆ.
سونىمەن قاتار مينيستر سۋ باعاسىن كوتەرۋ سەبەپتەرىن دە ءتۇسىندىرىپ ءوتتى.
«بۇل سۋبەكتىنىڭ قۋاتىنا بايلانىستى. سونداي-اق سۋدىڭ ءتاريفى دە وتە تومەن. بىلتىر مەن باتىس قازاقستان وبلىسىندا بولدىم. وندا سۋدىڭ ءبىر تەكشە مەترى – 44 تەڭگە. ارينە، وسىدان كەيىن سۋ ءتيىمسىز پايدالانىلادى. مىسالى، ءسىز مونشاعا بارساڭىز، وندا سۋدىڭ تەككە اعىپ جاتقانىن كورەسىز. ونى ءوشىرۋ كەرەك. وكىنىشكە قاراي، ۇنەمدەۋ جوق. وتە ماڭىزدى رەسۋرس بولعاندىقتان، سۋدى ۇنەمدەۋىمىز كەرەك. تاريف وسەدى. بۇگىندە سۋعا 200-500 تەڭگە تولەيمىز. سوندىقتان مۇندا (سۋ ءتاريفىن) ايتارلىقتاي كوتەرۋگە بولادى. ولاي ىستەمەسەك، ۇنەمدەۋ بولمايدى. بيىل تاريف (باعاسى) وسەدى»، – دەپ ءسوزىن تولىقتىردى مينيستر.
سونداي-اق، مەردىگەرلەر مەن قۇرىلىس ۇيىمدارى ءبارىن جاڭارتىپ ۇلگەرۋى ءۇشىن تاريفتەردى بىرتىندەپ كوتەرۋ جۇمىستارى جۇرگىزىلۋدە.
“ادىرنا” ۇلتتىق پورتالى
