قازاقستاندىق بلوگەرلەر 53,3 ملرد تەڭگە كىرىسىن جاسىرعان. بۇل تۋرالى مەملەكەتتىك كىرىستەر كوميتەتى جاريالادى، دەپ حابارلايدى “ادىرنا” ۇلتتىق پورتالى.
مەملەكەتتىك كىرىستەر كوميتەتى ءارتۇرلى دەرەككوزدەردەن الىنعان مالىمەتتەردى سالىق دەكلاراتسيالارىنىڭ دەرەكتەرىمەن سالىستىرۋ ناتيجەسىندە 594 تۇلعادا 53,3 ملرد تەڭگەگە سايكەسسىزدىكتەر انىقتادى.
وسىعان بايلانىستى، 13-14 اقپان كۇندەرى ارالىعىندا "كىرىستەردى تومەندەتۋ" بۇزۋشىلىقتارى بويىنشا كامەرالدىق باقىلاۋ حابارلامالارى جىبەرىلدى.
"بۇل حابارلامالاردى ورىنداۋ ءۇشىن تۇلعالاردان نە قوسىمشا ەسەپتەلگەن سالىقتاردى تولەي وتىرىپ، جاڭارتىلعان سالىق ەسەپتىلىگىن تاپسىرۋى، نە حابارلاماعا كەلىسپەۋشىلىگىن دالەلدەيتىن تۇسىندىرمە ۇسىنۋى تالاپ ەتىلەدى. حابارلامانىڭ ورىندالۋ مەرزىمى 30 جۇمىس كۇنىن قۇرايتىنىن ەسكەرۋ كەرەك", – دەلىنگەن مەملەكەتتىك كىرىستەر كوميتەتىنىڭ حابارلاماسىندا.
ايتا كەتەيىك، مەملەكەتتىك كىرىستەر ورگاندارى سالىق مىندەتتەمەلەرىن تولىق ورىنداۋدى قامتاماسىز ەتۋ ءۇشىن بلوگەرلەردى قوسقاندا، جەكە تۇلعالارعا تۇراقتى سالىقتىق باقىلاۋدى جۇزەگە اسىرىپ كەلەدى. باقىلاۋ شارالارى كەزىندە ولار ۋاكىلەتتى مەملەكەتتىك ورگاندارمەن، ۇيىمدارمەن جانە وزگە تۇلعالارمەن ءتيىمدى ىقپالداسىپ، اقپارات الماسۋدا.
