قازاقستاندىق مودەل گۇلسەزىم التايبەكوۆا بالي ارالىندا ۇستالعانى تۋرالى اقپارات تارادى، دەپ حابارلايدى "ادىرنا" ۇلتتىق پورتالى.
وعان رەسەي بلوگەرى كارينا فادەەۆاعا باردا شابۋىل جاسادى دەگەن كۇدىك تاعىلعان. بۇعان دەيىن الەۋمەتتىك جەلىلەردە التايبەكوۆانىڭ تەرگەۋ ءجۇرىپ جاتقان ارالىقتا 60 كۇنگە قامالعانى حابارلانعان.
بلوگەردىڭ ايتۋىنشا، التايبەكوۆامەن كيكىلجىڭ كارينا گۇلسەزىمگە ۋكراينانىڭ مۋزىكاسىن تىڭداماۋىن ەسكەرتكەن كەزدە تۋىنداعان. سول ساتتە گۇلسەزىم «سلاۆا ۋكراينە» دەپ جاۋاپ بەرگەن، ودان كەيىن توبەلەس باستالعان. وقيعا بارىسىندا كارينا فادەەۆا باسىنا زاقىم الىپ، ەسىن جوعالتقان. باسىنداعى جاراقاتتى تىگۋگە تۋرا كەلگەن.
قازاقستاننىڭ سىرتقى ىستەر مينيسترلىگىنىڭ رەسمي مالىمەتىنشە:
«قازاقستان رەسپۋبليكاسىنىڭ سىرتقى ىستەر مينيسترلىگى يندونەزيادا قازاقستاندىق ازاماتشا ۇستالعانىن بىلەدى. وقيعانىڭ ءمان-جايى مەن قىلمىستىق پروتسەسسۋالدىق دەرەكتەر جاريالانبايدى. پروتسەسسۋالدىق مارتەبە مەن قولدانىلاتىن شارالار تەك يندونەزيانىڭ ءتيىستى ورگاندارى مەن ۇلتتىق زاڭناماسىنا سايكەس انىقتالادى»، - دەپ جازىلعان.
سىرتقى ىستەر مينيسترلىگى قازاقستاننىڭ يندونەزياداعى ەلشىلىگى ازاماتقا ءوزىنىڭ قۇزىرەتى شەگىندە كونسۋلدىق-قۇقىقتىق كومەك كورسەتىپ جاتقانىن حابارلادى.
