اقش پرەزيدەنتى دونالد ترامپ 1 قاراشادان باستاپ قىتايدان كەلەتىن بارلىق تاۋارلارعا 100 پايىزدىق كەدەندىك باج سالىعى ەنگىزىلەتىنىن مالىمدەدى، دەپ حابارلايدى "ادىرنا" ۇلتتىق پورتالى.
بۇل تاريفتەر قازىرگى قولدانىستاعى باج سالىعىنان بولەك ەسەپتەلەدى.
ترامپ بۇل تۋرالى Truth Social الەۋمەتتىك جەلىسىندە جازىپ، قىتايدىڭ “وتە اگرەسسيۆتى ساۋدا ساياساتىن” سىنعا الدى. ونىڭ ايتۋىنشا، قىتاي 2025 جىلدىڭ 1 قاراشاسىنان باستاپ ەكسپورتتالاتىن ونىمدەردىڭ باسىم بولىگىنە جانە كەيبىر وندىرىلمەيتىن تاۋارلارعا دا اۋقىمدى ەكسپورتتىق باقىلاۋ ەنگىزۋدى جوسپارلاپ وتىر.
“بۇل حالىقارالىق ساۋدادا بۇرىن-سوڭدى بولماعان جاعداي جانە باسقا ەلدەرمەن قارىم-قاتىناستاعى مورالدىق ماسقارا”، – دەدى اقش پرەزيدەنتى.
سونىمەن قاتار، ترامپ ستراتەگيالىق ماڭىزى بار باعدارلامالىق قامتاماسىز ەتۋگە دە ەكسپورتتىق شەكتەۋ ەنگىزىلەتىنىن ايتتى.
مالىمدەمە قىتايدىڭ سيرەك كەزدەسەتىن مەتالداردىڭ ەكسپورتىنا جاڭا باقىلاۋ ەنگىزگەنىنەن كەيىن جاسالدى. بۇعان جاۋاپ رەتىندە ترامپ قىتاي يمپورتىنا “كەڭ كولەمدى تاريفتىك شارالار” قولداناتىنىن ەسكەرتكەن ەدى.
ايتا كەتەيىك، دونالد ترامپ پەن قىتاي توراعاسى سي تسزينپين قازان ايىندا وڭتۇستىك كورەيادا وتەتىن اتەس سامميتىندە كەزدەسەدى دەپ جوسپارلانعان بولاتىن. الايدا ترامپ بۇل كەزدەسۋدىڭ قاجەتى جوق ەكەنىن ايتسا، قىتاي تاراپى رەسمي تۇردە راستاماعان.
