قىتاي مەن وزبەكستاندا تۇسىرگەن پرانكتەرى ءۇشىن سىنعا ۇشىراعان بلوگەر ارۋجان ايبەكقىزى KAZINFORM اگەنتتىگىنە بەرگەن سۇقباتىندا ءوز ارەكەتتەرىنەن كەيىن بەلگىلى ءبىر شەشىم قابىلداعانىن ايتتى، دەپ حابارلايدى "ادىرنا" ۇلتتىق پورتالى.
“مەن قازاقستانمەن شەكارالاس ەلدەردە مۇنداي پرانك تۇسىرمەيمىن. ال باسقا مەملەكەتتەرگە بارسام، ويلانىپ كورەمىن”، – دەگەن ول.
بلوگەردىڭ ايتۋىنشا، سوڭعى وقيعالاردان كەيىن ونىڭ جەكە تۇلعاسىنا قاتىستى اۋىر پىكىرلەر مەن بالاعات سوزدەر جازىلعان.
“مەن تۋرالى ءتۇرلى جالعان اقپاراتتار تارادى. ەندى سول پاراقشالارعا قاتىستى قۇقىق قورعاۋ ورگاندارىنا ارىز تۇسىرگىم كەلەدى”، – دەپ اتاپ ءوتتى ول.
بۇعان دەيىن ارۋجان ايبەكقىزى وزبەكستان مەتروسىندا تۇسىرگەن پرانكى ءۇشىن “ۇساق بۇزاقىلىق” بابى بويىنشا 20 ايلىق ەسەپتىك كورسەتكىش (78 مىڭ تەڭگە) كولەمىندە ايىپپۇل تولەگەن بولاتىن.
“العاشىندا تۇسىنبەدىم. ۆيدەو وزبەكستاندا تۇسىرىلسە، نەگە ايىپپۇلدى قازاقستان سالادى دەپ ويلادىم. بىراق مەن قر ازاماتى بولعاندىقتان، شارا وسىندا قابىلدانادى ەكەن. سوت شەشىمىمەن كەلىسەمىن”، – دەيدى بلوگەر.
ونىڭ ايتۋىنشا، سوتتا ۆيدەولاردا حاراسسمەنت بەلگىلەرى بار دەلىنگەن. “مەن ەشكىمگە زورلىق-زومبىلىق كورسەتكەن جوقپىن. پرانكتەرىم ءازىل رەتىندە تۇسىرىلەدى. كەرىسىنشە، اۆتوبۋستا نەمەسە قوعامدىق كولىكتە ايەلدەرگە جاسالاتىن الىمجەتتىككە نازار اۋدارتقىم كەلەدى”، – دەيدى ول.
ەسكە سالا كەتەيىك، ارۋجان ايبەكقىزى قىتايدا دا قوعامدىق ورىندا پرانك جاساعان. ءوزىنىڭ ايتۋىنشا، جەرگىلىكتى قۇقىق قورعاۋ ورگاندارى سول كەزدە ەسكەرتۋ جاساۋمەن شەكتەلگەن.
