قازاقستاندا 5 قىركۇيەكتە «ادام ساۋداسىنا قارسى ءىس-قيمىل تۋرالى» زاڭ كۇشىنە ەندى. قىلمىستىق كودەكسكە «سەكسۋالدىق سيپاتتاعى وزگە دە قىزمەتتەر»، ونىڭ ىشىندە قاشىقتان، «ناقتى ۋاقىت رەجيمىندە ينتەرنەت ارقىلى» دەگەن جاڭا ۇعىم ەنگىزىلدى. بۇل تۋرالى بقو پد ۇققكب جەدەل ۋاكىلى پوليتسيا اعا لەيتەنانتى ءادىل سماعۇلوۆ ايتىپ بەردى.
ەندى ادامداردى، ونىڭ ىشىندە كامەلەتكە تولماعانداردى سەكسۋالدىق سيپاتتاعى وزگە دە قىزمەتتەر كورسەتۋگە تارتۋ، جەڭگەتاي بولۋ، جەڭگەتايلىق ماقساتىندا جەزوكشەلىكتى، سەكسۋالدىق سيپاتتاعى وزگە دە قىزمەتتەردى ناسيحاتتاۋ جانە جارنامالاۋ، جىنىستىق سيپاتتاعى تۇعىرلاردى ۇيىمداستىرۋ نەمەسە ۇستاۋ، تەلەكوممۋنيكاتسيا جەلىلەرىن، ونىڭ ىشىندە ينتەرنەتتى پايدالانۋ ارقىلى جەزوكشەلىكپەن اينالىسۋ، جىنىستىق سيپاتتاعى وزگە دە قىزمەتتەر كورسەتكەندەرگە قىلمىستىق جاۋاپكەرشىلىك ەنگىزىلدى. بۇدان باسقا، كامەلەتكە تولماعان ادام كورسەتكەن جەزوكشەلىك قىزمەتىن، وزگە دە جىنىستىق سيپاتتاعى قىزمەتتى العانى ءۇشىن قىلمىستىق جاۋاپكەرشىلىك بار. ادام ساۋداسىنا بايلانىستى قىلمىستار بويىنشا تاتۋلاسۋعا بايلانىستى قىلمىستىق جاۋاپتىلىقتان بوساتۋ الىنىپ تاستالدى.
ءادىل سماعۇلوۆتىڭ ايتۋىنشا، باتىس قازاقستان پوليتسياسى باسقارماسىنىڭ ۇيىمداسقان قىلمىسقا قارسى كۇرەس باسقارماسى ورال قالاسىنداعى ساۋنالار مەن جالدامالى پاتەرلەرگە جەدەل-پروفيلاكتيكالىق ءىس-شارالار مەن رەيد جۇرگىزدى. – وتكەن جىلدىڭ قاراشا ايىندا ورال قالاسىنىڭ 1988 جىلى تۋعان تۇرعىنى ۇستالدى، ول بىرنەشە اي بويى قالاداعى ءارتۇرلى جالدامالى پاتەرلەردە تۇرىپ، 2006 جىلى تۋعان كامەلەتتىك جاسقا تولماعان قىزدى ينتەرنەت-سايت ارقىلى جەزوكشەلىككە تارتىپ كەلگەن. كۇدىكتىنىڭ ارەكەتى الداۋ جانە قورقىتۋ تۇرىندە بولعان. اعىمداعى جىلى باتىس قازاقستان وبلىسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىنىڭ ۇكىمىمەن كۇدىكتى 134-باپتىڭ 2-بولىگىمەن، قازاقستان رەسپۋبليكاسى قىلمىستىق كودەكسىنىڭ 191-بابى 1-بولىگىمەن 7 جىلعا باس بوستاندىعىنان ايىرىلدى، – دەيدى اعا لەيتەنانت.
سونداي-اق اعىمداعى جىلى 26 ادام قر اقبتك-ءنىڭ 450-بابى «جەزوكشەلىك نەمەسە سۋتەنەرلىك ءۇشىن كورىنەۋ ءۇي-جاي بەرۋ» بويىنشا اكىمشىلىك جاۋاپكەرشىلىككە تارتىلعان. پوليتسەيلەر مۇنداي فاكتىلەردى، سونداي-اق ادام ساۋداسىنا قاتىستى باسقا دا قىلمىستاردى انىقتاۋ بويىنشا تۇراقتى تۇردە شارالار قابىلداۋدا. ەگەر ءسىز وسىنداي قۇقىق بۇزۋشىلىقتاردىڭ كۋاگەرى بولساڭىز بەيجاي قالماۋىڭىز كەرەك. 102 نەمەسە «116 16» سەنىم تەلەفونىنا دەرەۋ قوڭىراۋ شالا الاسىز. سونىمەن بىرگە، ءار وبلىستا زارداپ شەككەندەرگە تەگىن كومەك كورسەتۋگە جانە قۇجاتتارىن قالپىنا كەلتىرۋگە، ۋاقىتشا تۇرۋعا جانە باسقا دا ارناۋلى الەۋمەتتىك قىزمەتتەردى كورسەتۋگە كومەكتەسۋگە دايىن ۇكىمەتتىك ەمەس ۇيىمدار بار ەكەنىن ەسكە سالامىز.
كاۋسار بايعاليەۆا
