گرۋزيا پارلامەنتى پرەزيدەنتتىڭ «شەتەلدىك ىقپالدىڭ اشىقتىعى تۋرالى» زاڭعا قويعان ۆەتوسىن جوققا شىعاردى، دەپ حابارلايدى "ادىرنا" ۇلتتىق پورتالى.
شەتەلدىك زاڭنىڭ ەلدە قابىلدانۋىنا گرۋزين قوعامىنىڭ باسىم بولىگى نارازىلىعىن تۋدىرعان. اقش پەن ەۋروپالىق وداق تاراپىنان سىنعا ۇشىراپ، تبيليسيدە اۋقىمدى نارازىلىق تولقىنى ءجۇردى.
28 مامىر كۇنى پرەزيدەنتتىڭ ۆەتو قويۋ ماسەلەسى قارالعان پارلامەنتتىڭ جالپى وتىرىسىندا پارلامەنتتىك كوپشىلىك وكىلدەرى مەن وپپوزيتسيالىق دەپۋتاتتار اراسىندا تاعى دا قىزۋ داۋ تۋدى. «گرۋزين ارمانى» پارتياسىنىڭ 84 دەپۋتاتى پرەزيدەنت ۆەتوسىن جويۋعا داۋىس بەرگەن.
وپپوزيتسيالىق «بىرىڭعاي ۇلتتىق قوزعالىس» پارتياسىنىڭ دەپۋتاتى اننا تسيتليدزە «شەتەل اگەنتتەرى تۋرالى» زاڭ كوپتەگەن ماسەلەلەرگە اكەلەتىنىن ايتتى.
«بىزگە ەۋروپالىق وداققا كىرۋگە تىيىم سالىنادى; باتىس ەلدەرىنىڭ بىزگە قارسى سانكتسيالار سالاتىنى انىق، بۇل گرۋزيا ەكونوميكاسىنا تىكەلەي اسەر ەتەدى»، - دەلىنگەن دەپۋتات سوزىندە.
پارلامەنت توراعاسىنىڭ پىكىرىنشە، قازىرگى بيلىكتىڭ ويلانباي جۇرگىزگەن ساياساتى قوعامدا تەكەتىرەس تۋعىزعان.
«ءسىز ءوز ەلىڭىزدىڭ مۇددەسى ءۇشىن ەمەس، شەت ەلدەردىڭ مۇددەسى ءۇشىن ارەكەت ەتىپ جاتىرسىز. بۇل – اشىقتان-اشىق ساتقىندىق»، - دەدى پارلامەنت توراعاسى شالۆا پاپۋاشۆيلي وپپوزيتسيالىق دەپۋتاتتار الدىندا سويلەگەن سوزىندە.
ايتا كەتەيىك، 19 مامىر كۇنى گرۋزيا پرەزيدەنتى سالومە زۋرابيشۆيلي اپتا باسىندا ەل پارلامەنتى قابىلداعان «شەتەلدىك ىقپالدىڭ اشىقتىعى تۋرالى» زاڭعا ۆەتو قويعانى تۋرالى حابارلاعان بولاتىنبىز. بۇل تۋرالى پرەزيدەنت فەيسبۋك پاراقشاسىندا جاريالاعان.
