Cۋرەت: جي
تاجىكستان ۇكىمەتى 2026 جىلدىڭ سوڭىنا دەيىن تمد ەركىن ساۋدا ايماعىنا كىرمەيتىن ەلدەردەن اكەلىنەتىن بەنزين، ديزەل وتىنى، سۇيىتىلعان گاز جانە وزگە دە مۇناي ونىمدەرىنە سالىناتىن كەدەندىك باج سالىعىن نولگە ءتۇسىردى. بۇل شەشىم يران، تۇركىمەنستان جانە ازەربايجاننان جانارمايدى جەڭىلدەتىلگەن شارتتارمەن يمپورتتاۋعا مۇمكىندىك بەرەدى، دەپ حابارلايدى «ادىرنا» ءتىلشىسى «ازيا-پليۋس» باسىلىمىنا سىلتەمە جاساپ.
ءتيىستى №744 قاۋلى 10 قاراشادا قابىلدانىپ، 13 قاراشادا «دجۋمحۋريات» رەسمي گازەتىندە جاريالانعان. كەدەندىك باجدىڭ نولدىك مولشەرلەمەسى 31 جەلتوقسانعا دەيىن كۇشىندە بولادى. ول سۇيىتىلعان گازدى قوسا العاندا، مۇناي ونىمدەرى مەن مۇناي گازدارىنا قولدانىلادى. الايدا شيكى مۇناي بۇل قۇجاتتىڭ اياسىنان تىس قالعان.
رەسەي، قازاقستان جانە تمد ەركىن ساۋدا ايماعىنا كىرەتىن وزگە دە مەملەكەتتەردەن اكەلىنەتىن ونىمدەرگە نولدىك كەدەندىك باج سالىعى بۇعان دەيىن دە قولدانىلعان. ال جاڭا جەڭىلدىك بالاما جەتكىزۋشىلەردەن جانارماي ساتىپ الۋدى جەڭىلدەتىپ، تاجىكستاننىڭ رەسەي يمپورتىنا تاۋەلدىلىگىن ازايتۋدى كوزدەيدى.
مونوپولياعا قارسى قىزمەتتىڭ مالىمەتىنشە، 2026 جىلدىڭ العاشقى جارتىسىندا رەسپۋبليكا 494,7 ميلليون دوللارعا 599,5 مىڭ توننا مۇناي ونىمدەرىن يمپورتتاعان. ونىڭ 91 پايىزى رەسەيگە تيەسىلى. بەلارۋس جەتكىزىلىمنىڭ 2,8 پايىزىن، تۇركىمەنستان 1,9 پايىزىن، قازاقستان 1 پايىزىن قامتاماسىز ەتكەن. ال وزبەكستان مەن قىرعىزستاننىڭ ۇلەسى 0,9 پايىزدان بولعان.
جازدا رەسەيدەن كەلەتىن جەتكىزىلىمدەردىڭ ىركىلۋىنە بايلانىستى رەسپۋبليكادا جانارماي تاپشىلىعى تۋىندادى. شىلدە ايىندا دۋشانبە قالاسىنداعى كەيبىر جانارماي قۇيۋ بەكەتتەرىندە ديزەل وتىنىن ءبىر كولىككە 20 ليتردەن ارتىق ساتۋعا شەكتەۋ قويىلدى. تامىز ايىنىڭ سوڭىنا قاراي ديزەل وتىنى ماۋسىمنىڭ باسىمەن سالىستىرعاندا 50 پايىزعا، ال اي-92 ماركالى بەنزين شامامەن 25 پايىزعا قىمباتتادى.
سونىمەن قاتار تامىزدا رەسەيدەن جەتكىزىلگەن ديزەل وتىنىنىڭ كولەمى شىلدەدەگى 16 مىڭ توننادان 56 مىڭ تونناعا دەيىن ءوستى. بۇل جاعدايدى ءبىرشاما تۇراقتاندىرۋعا مۇمكىندىك بەردى.
ىشكى نارىقتى جانارمايمەن قامتاماسىز ەتۋدەگى قيىندىقتارعا بايلانىستى دۋشانبە بالاما جەتكىزۋشىلەردى ىزدەي باستادى. تامىز ايىندا تاجىكستان يرانعا مۇناي مەن مۇناي ونىمدەرىن ءىرى كولەمدە جەتكىزۋ تۋرالى ۇسىنىس جاساپ، ايدىڭ سوڭىندا وسى ەلدەن يمپورت باستالدى. الايدا كەلىسسوزدەردە قاراستىرىلعان كولەمنىڭ ەداۋىر بولىگىن قۇرايتىن شيكى مۇناي جاڭا كەدەندىك جەڭىلدىككە جاتپايدى.
تاجىكستان بۇعان دەيىن دە ەلدى جانارمايمەن قامتاماسىز ەتۋ ءۇشىن كەدەندىك جەڭىلدىكتەردى پايدالانعان.
«فەرعانا» باسىلىمىنىڭ جازۋىنشا، 2025 جىلدىڭ ساۋىرىندە ۇكىمەت مەملەكەتتىك رەزەرۆتەر ءۇشىن 100 مىڭ تونناعا دەيىن بەنزين مەن ءدال وسىنشا كولەمدە ديزەل وتىنىن باج سالىعىنسىز يمپورتتاۋعا رۇقسات بەرگەن. سونىمەن قاتار قوسىلعان قۇن سالىعى مەن اكتسيز مولشەرلەمەلەرىن 50 پايىزعا تومەندەتۋ كوزدەلگەن.
