راديكالدىق «تاليبان» قوزعالىسىنىڭ وكىلدەرى جيھاد قۇندىلىقتارىن ساقتاۋ باسقارماسىن قۇرۋ تۋرالى مالىمدەمە جاسادى، دەپ حابارلايدى "ادىرنا" ۇلتتىق پورتالى جەرگىلىكتى Ariana News باسىلىمىنا سىلتەمە جاساپ.
تاليب ۇكىمەتىنىڭ اقپارات جانە مادەنيەت ءمينيسترى مىندەتىن اتقارۋشى حايرۋللا حايرحۆا جۋرناليستەرگە جاڭا دەپارتامەنتتىڭ مىندەتى «جيھاد قۇندىلىقتارىن جانە ونىڭ تاريحىن ساقتاۋ» ەكەنىن مالىمدەدى.
باسقارمانىڭ ءۇش نەگىزگى باعىتى بەلگىلەندى: اۋديوۆيزۋالدى كونتەنت ءوندىرىسى، جيھاد مۇراجايىن قۇرۋ جانە تاريحي وقيعالاردى قۇجاتتاندىرۋ. ساراپشىلار ۇلىبريتانياعا، كسرو-عا جانە اقش-قا قارسى اۋعان قارۋلى قاقتىعىستارىنا بايلانىستى ارتەفاكتىلەردى جيناپ، ارحيۆتەيتىن بولادى.
ءمينيستردىڭ ايتۋىنشا، جيھاد مۇراجايلارى تەك كابۋلدا عانا ەمەس، اۋعانستاننىڭ پروۆينتسيالارىندا دا سالىنادى.
اۋعانستاندا باسقىنشىلارعا قارسى كۇرەس يسلام جيھادى — مۇسىلمانداردىڭ كاپىرلەرگە قارسى سوعىسى رەتىندە جۇرگىزىلگەن. XIX عاسىردا ۇلىبريتانيا يمپەرياسىمەن، كەيىنگى زاماندا كسرو-مەن، ودان كەيىن اقش جانە ناتو سەرىكتەستەرىمەن بولعان قاقتىعىستار وسىلاي سيپاتتالدى.
اقش اسكەرلەرى 2021 جىلى ەلدەن شىعارىلعاننان كەيىن بيلىكتى راديكالدى ساياسات جۇرگىزىپ، ادام قۇقىقتارىن، اسىرەسە ايەلدەردىڭ قۇقىقتارىن بۇزۋمەن تانىلعان تاليبتەر باسىپ الدى. وسىعان بايلانىستى الەمنىڭ بىردە-ءبىر ەلى «تاليبان» ۇكىمەتىن رەسمي تۇردە مويىندامادى.
سوعان قاراماستان، كەيبىر ەلدەر تاليبتەردى تەرروريستىك ۇيىمدار تىزىمىنەن شىعاردى، اتاپ ايتقاندا قازاقستان مەن قىرعىزستان. رەسەي دە وسىنداي قادام جاساۋ تۋرالى بىرنەشە رەت مالىمدەدى جانە ونى جۇزەگە اسىرۋى مۇمكىن.
بۇعان دەيىن، رەسەي مەملەكەتتىك دۋماسى حالىقارالىق ۇيىمداردى، سونىڭ ىشىندە «تاليباندى» ەلدە تىيىم سالىنعان ۇيىمدار تىزىمىنەن ۋاقىتشا شىعارۋ تۋرالى زاڭ جوباسىن قاراستىرعانىن جازعان ەدىك.
