قازاقستان پرەزيدەنتى قاسىم-جومارت توقاەۆتىڭ تاپسىرماسى اياسىندا «حايراتون» تەمىرجول ستانتسياسىنىڭ اۋماعىنا (اۋعانستان، بالح پروۆينتسياسى) اۋعانستاننىڭ گەرات پروۆينتسياسىنداعى جەر سىلكىنىسىنەن زارداپ شەككەندەرگە قازاقستاننان جىبەرىلگەن گۋمانيتارلىق كومەكتىڭ كەزەكتى پارتياسى جەتكىزىلدى، دەپ حابارلايدى «ادىرنا» ۇلتتىق پورتالى.
قر سىرتقى ىستەر مينيسترلىگى ءباسپاسوز قىزمەتىنىڭ مالىمەتىنشە، قازاقستاننان اۋعانستانعا گۋمانيتارلىق جۇك جالپى سالماعى 1662 توننا بولاتىن 27 ۆاگوننان تۇرادى. وندا كۇرىش، ۇن، وسىمدىك مايى، ءسۇت كونسەرۆىلەرى، ماتراتستار، كورپەلەر، جايمالار، جاستىقتار، جىلى كيىمدەر، شاتىرلار، زىعىر ماتالار، جاستىق قاپتارى مەن كەرەۋەتتەر بار.
بالح پروۆينتسياسى گۋبەرناتورىنىڭ ورىنباسارى ا.يدريسس اۋعان حالقى اتىنان قازاقستان پرەزيدەنتى قاسىم-جومارت توقاەۆقا، قر ۇكىمەتى مەن قازاق حالقىنا تۇراقتى جانە جەدەل گۋمانيتارلىق كومەك كورسەتكەنى ءۇشىن العىس ءبىلدىرىپ، ەكى ەل حالقى اراسىندا بەرىك دوستىق بايلانىس بار ەكەنىن اتاپ ءوتتى.
«ادىرنا» ۇلتتىق پورتالى
