كابۋل بيلىگىندەگى «تاليبان» قوزعالىسى ەلدەگى جالعىز مەملەكەتتىك كينو مەكەمەسى – Afghan Film كينوستۋدياسىنىڭ جۇمىسىن توقتاتتى، دەپ حابارلايدى «ادىرنا» ۇلتتىق پورتالى Amu.tv-عا سىلتەپ.
رەسمي مالىمدەمە جاسالماعانىمەن، ستۋديا قىزمەتكەرلەرىنە مەكەمەنىڭ قۇرىلىمى تاراتىلعانى جانە قىزمەتى توقتاتىلعانى ەسكەرتىلگەن.
Afghan Film كينوستۋدياسى 1968 جىلى اۋعانستان كورولى مۇحاممەد زاحير شاحتىڭ تۇسىندا قۇرىلعان بولاتىن. ول ەلدەگى كينەماتوگرافيا مەن دەرەكتى فيلمدەر ءوندىرىسىنىڭ نەگىزى سانالىپ كەلدى. 2021 جىلى «تاليبان» كابۋلدى باسىپ العاننان كەيىن، ستۋديا قىسقارتىلعان رەجيمدە جۇمىس ىستەپ، جاڭا جوبالار قولعا الىنبادى.
كينوستۋديادا 1990-جىلدارداعى العاشقى «تاليبان» بيلىگى كەزىندە امان ساقتالىپ قالعان قۇندى كينوارحيۆ بار. الايدا قازىرگى ۋاقىتتا ونىڭ تاعدىرى بەلگىسىز. مادەني مۇرالاردى ساقتاۋ ماماندارى ءارحيۆتىڭ قاراۋسىز قالۋىنان، تسەنزۋراعا ۇشىراۋىنان نەمەسە مۇلدە جويىلىپ كەتۋىنەن قاۋىپتەنۋدە.
ۇقساس جاڭالىقتار
