ۇبت-دان ۇتقان ۇلاندار. 140 بالل – جەكە جەتىستىكتىڭ باسى

338
Adyrna.kz Telegram
https://adyrna.kz/storage/uploads/I8mIDmYlj9cWiaUmmeFzEjjmcmG1uksdpvqLgeCZ.webp

بيىل ەلىمىزدە 12 تۇلەك ۇبت-دان 140 بالل جينادى. ءبىر قىزىعى، سول 12 رەكوردسمەننىڭ 8-ءى MNU-دى، ياعني م.نارىكباەۆ ۋنيۆەرسيتەتىن تاڭداعان. قازىر ءبارى حالىقارالىق قاتىناستار ماماندىعىندا وقىپ ءجۇر. ءبىز سول 8 ستۋدەنتتەن 140 بالل الۋدىڭ قۇپياسى نەدە ەكەنىن سۇراپ بىلدىك.

«11 سىنىپتى ەرەكشە جەتىستىكپەن اياقتاعىم كەلدى»

تارازدىق نۇرعانات قانات ءۇشىن ۇبت العاشقى ءبىلىم دوداسى ەمەس. ء«بىلىم-يننوۆاتسيا» ليتسەي-ينتەرناتىندا وقىعان ول 7 سىنىپتان باستاپ ءتۇرلى پاندىك جانە شىعارماشىلىق وليمپيادالارعا قاتىسىپ، جەڭىس مەن جەڭىلىستى قاتار كورگەن. ءبىلىم باسەكەلەرىندە ءبىرشاما تاجىريبەسى بار نۇرعانات 11-سىنىپتى ەرەكشە جەتىستىكتپەن اياقتاعىسى كەلىپتى. ءتىپتى سول ءۇشىن ستراتەگيالىق جوسپار قۇرعان. دالىرەك ايتقاندا، ناعىز ۇبت-عا دەيىنگى العاشقى 4 سىناقتا 135-تەن جوعارى الۋدى جوسپارلاعان. وسىلاي بىرتە-بىرتە 140 بالدىڭ بيىگىن باعىندىرۋدى ويلاپتى.

فوتودا نۇرعانات قانات

 ء«دال وسىلاي ماقسات قويۋىما ءوز پوتەنتسيالىما دەگەن سەنىم، تاڭداۋ پاندەرىم بويىنشا بۇرىننان قالىپتاسقان ءبىلىم جانە جاقىندارىمنىڭ قولداۋى اسەر ەتتى دەپ ويلايمىن»، - دەپ ەسكە الدى ول.

نۇرعاناتتىڭ ەرەكشەلىگى جوعارى ناتيجەگە ۇمتىلۋىندا عانا ەمەس. ول ۇبت-مەن قاتار ء«ححى عاسىر كوشباسشىسى» ينتەللەكتۋالدىق سايىسىنا، وبلىستىق جانە رەسپۋبليكالىق وليمپيادالارعا دايىندالعان. ايتا كەتەيىك، بيىل نۇرعانات قانات ء«ححى عاسىر كوشباسشىسى» دوداسىندا ءبىرىنشى ورىن يەلەنىپ، توپ جاردى. ءبىر قاراعاندا ءبارىن قاتار الىپ ءجۇرۋ جۇكتەمەنى كوبەيتەتىندەي كورىنەدى. ال نۇرعانات ءۇشىن ءبىر باعىتتان ەكىنشىسىنە اۋىسۋ تىنىعۋدىڭ وزىندىك تاسىلىنە اينالعان. وسىلايشا ءار سايىسقا دەگەن قىزىعۋشىلىعى ءبىرىن-ءبىرى تولىقتىرىپ، دايىندىق قارقىنىن ساقتاۋعا سەبەپ بولدى.

«ۇبت تاپسىرمالارىنان شارشاعاندا ەكىنشى سالاعا فوكۋس قويىپ، زەرىگۋدىڭ الدىن الدىم دەپ ويلايمىن. ءبىر دۇنيەنى قايتالاي بەرۋ دە ادامدى جالىقتىرۋى مۇمكىن»، - دەپ ءتۇسىندىردى نۇرعانات.

جوعارى ناتيجەنىڭ ارتىندا تەك قىزىعۋشىلىق تۇرعان جوق. نۇرعانات الدىمەن ءبىر ايعا، كەيىن اپتاعا، سوڭىندا ءار كۇنگە ءبولىپ جوسپار قۇرعان. ول ۋاقىتتى ءتيىمدى پايدالانۋ ءۇشىن الەۋمەتتىك جەلىلەرگە دە شەكتەۋ قويعانىن ايتتى.

«الەۋمەتتىك جەلىلەر ۋاقىتىم مەن ەنەرگيامدى الىپ، كىتاپ وقۋعا كۇش قالدىرمايتىن. سوندىقتان مەن TikTok, Instagram سىندى قوسىمشالارداعى بەلسەندىلىگىمدى شەكتەپ، كۇندەلىكتى قولدانۋ ۋاقىتىنا اسا قاتال قارايتىنمىن»، - دەدى ول.

نۇرعانات ساباق كەزىندە تەلەفوندى باسقا بولمەگە قالدىرىپ، 25 مينۋت وقىپ، 5 مينۋت ءۇزىلىس جاسايتىن. بۇل – پومودورو دەگەن ءادىس. بولاشاق تۇلەكتەرگە دە نۇرعانات وسى ءتاسىلدى قولدانۋدى ۇسىنادى. دەگەنمەن كوپشىلىك ءتيىمدى سانايتىن ادىستەردىڭ بارلىعى بىردەي وعان سايكەس كەلمەگەن. مىسالى، ول كونسپەكت جازۋعا كوپ ۋاقىت كەتەتىنىن بايقاپ، دايىن ماتەريالدى وقىپ، بىردەن تەست تاپسىرعاندى ءجون كورىپتى. نۇرعانات دايىندىق كەزەڭىنە قايتا ورالسا، وقۋ مەن تىنىعۋدىڭ تەپە-تەڭدىگىن ساقتاۋعا كوبىرەك كوڭىل بولەتىنىن ايتتى.

«وقۋشىعا شامادان تىس كۇش تۇسكەن كەزدە ول ەموتسيونالدى تۇردە شارشايدى، بۇل ونىڭ ۇلگەرىمىنە دە كەرى اسەرىن تيگىزۋى مۇمكىن. سوعان جول بەرمەۋ ءۇشىن وقۋ مەن جەكە ءومىردى قاتار الىپ ءجۇرۋدى باستى ورىنعا قويار ەدىم. ۇبت-عا دايىندىقتى باستاماس بۇرىن مەن سپورتپەن شۇعىلداناتىمىن، كەيىن حوببيىمنان ۋاقىتشا باس تارتۋعا تۋرا كەلدى»، - دەيدى.

فوتودا نۇرعانات قاناتتى ماراپاتتاۋ ءساتى

 نۇرعانات دايىندالعان ءبىلىم بەرۋ ورتالىعى وعان جوعارى ناتيجە كورسەتكەنى ءۇشىن پاتەر، كولىك نەمەسە 50 ملن تەڭگە كولەمىندە سىياقىنىڭ ءبىرىن تاڭداۋدى ۇسىندى. سونىمەن قاتار نۇرعانات قاناتتىڭ اتا-اناسىنا سىي رەتىندە 3 ميلليون تەڭگە تابىستاعان.

فوتودا نۇرعانات قاناتتىڭ پاتەر كىلتىن العان ءساتءى

«140 بالعا جەتكىزگەن تەمىردەي ءتارتىپ»

جاندوس نۇرباەۆ ۇبت-عا 10-سىنىپتىڭ جەلتوقسانىندا كىرىسسە دە، 3 ايدان كەيىن شىدامسىزدىق تانىتىپ، دايىندىقتى توقتاتقان. تەك تامىز ايىندا ءوزىن قايتا قولعا الىپتى.

فوتودا جاندوس نۇرباەۆ

ول قاڭتارداعى ۇبت-عا ۇزدىكسىز دايىندالىپ، 135 بالل جيناعان. بۇل كورسەتكىشتىڭ ءوزى جوعارى سانالسا دا، جاندوستىڭ كوڭىلىن كونشىتپەپتى. ونىڭ ارمانى – 140 بالل ەدى.

«قاتەمەن جۇمىس ىستەي وتىرىپ، كەلەسى ۇبت-دان 138 بالل الدىم. وكىنىشكە قاراي، ول كەزدە وقۋ ساۋاتتىلىعى پانىنەن ءوزىمنىڭ مۇقياتسىزدىعىمنان قاتە كەتتى»، - دەيدى جاندوس.

وسىدان كەيىن ول كۇن سايىن دايىندىققا كەمىندە 8-10 ساعات بولگەن. جاندوس نەگىزگى ۇبت الدىندا جاڭا ماتەريال مەڭگەرىپ قانا قويماي، بۇرىنعى قاتەلەرىن قايتالاماۋعا تىرىسقانىن ايتادى.

«ناعىز ۇبت-عا كەلگەندە دايىندىعىمدى كۇشەيتتىم، سەبەبى بۇل مەنىڭ ەكى جىلدىق ەڭبەگىمنىڭ اقتالاتىن كەزى ەدى. ايتا كەتەيىن، مامىر ايىندا وقۋشىلاردىڭ ءبىراز بولىگى پسيحولوگيالىق قىسىم سەزۋى مۇمكىن، ويتكەنى بۇل مەكتەپتەگى 11 جىلدىڭ سوڭعى ايى. مەن كوپتەگەن وتىرىس پەن جيىنداردان باس تارتىپ، ۋاقىتىمدى ءتيىمدى جۇمسادىم. وسى قارقىننىڭ ارقاسىندا مامىر ايىنىڭ سوڭىندا 140-تان 140 الدىم»، - دەيدى.

ءبىر قىزىعى، جاندوس 140 بالل العان ساتتە بىردەن قۋانباعان. ونىڭ ايتۋىنشا، باستاپقىدا ەكى جىلعا سوزىلعان دايىندىقتىڭ اياقتالعانىنا سەنۋدىڭ ءوزى قيىن بولعان.

«ەكى جىل بويى ۇزبەي دايىندالعاننان كەيىن، ءومىرىمنىڭ بۇل بولىگى اياقتالعانىنا سەنە المادىم. ءوز ماقساتىما جەتكەنىمدى ءبىر-ەكى اپتادان كەيىن عانا ءتۇسىنىپ، قابىلداي باستادىم»، - دەدى جاندوس.

ونىڭ ەڭبەگى باعالى سىيلىقپەن ماراپاتتالدى. 140 بالل جيناعاننان كەيىن دايىندىق كۋرسى وعان استانادان ەكى بولمەلى پاتەر سىيلاعان. دەگەنمەن جاندوس ءوز جەتىستىگىنىڭ باستى سەبەبىن ماتەريالدىق ىنتالاندىرۋدان ىزدەمەيدى.

«ەشقانداي قۇپيا ءادىس جوق. ەڭ باستىسى – تۇراقتى ەڭبەك، تەمىر ءتارتىپ پەن ايقىن ماقسات»،- دەدى ول.

جاندوس تالاپكەرلەرگە ءار پانگە جەتكىلىكتى كوڭىل ءبولۋدى ۇسىنادى. ونىڭ ايتۋىنشا، ءبىر ءپاندى جاقسى مەڭگەرەمىن دەپ باسقالارىن نازاردان تىس قالدىرۋ – ەمتيحان ناتيجەسىنە كەرى اسەر ەتۋى مۇمكىن.

«جوعارى بالل جيناعىسى كەلەتىن تۇلەكتەرگە ايتارىم: بىرىنشىدەن، جوسپارمەن جۇمىس جاساۋ ارقىلى ۋاقىتتى ۇنەمدەۋ كەرەك. ەكىنشىدەن، بولمايتىن ىستەرگە ەكى-ءۇش ساعات كەتىرۋدى قويۋ قاجەت. ۇشىنشىدەن، ءار پانگە ۋاقىت ارناپ، بالانستى ساقتاۋ كەرەك»، - دەيدى جاندوس.

 «جاتتاۋدان بۇرىن ءتۇسىنىپ، ەستە ساقتاۋ كەرەك»

پاۆلودار قالاسىنداعى جالپى ورتا ءبىلىم بەرەتىن مەكتەپتىڭ تۇلەگى ءالتايىر اسەت ۇبت-عا دايىندىقتى 11 سىنىپتىڭ قىركۇيەگىندە باستاعان. گەوگرافيا جانە ماتەماتيكا باعىتى بويىنشا تەست تاپسىرىپ، 140 بالل جيناعان وقۋشىنىڭ اقپاراتتى ەستە ساقتاۋدا ءوز ءتاسىلى بار.

فوتودا ءالتايىر اسەت

ءالتايىر كولەمدى كونسپەكت جازۋدىڭ ورنىنا وقۋلىقتاعى ماڭىزدى اقپاراتتى بەلگىلەپ، ستيكەرگە جازادى. ونىڭ ايتۋىنشا، تاقىرىپتى قايتالاعان كەزدە بۇل ستيكەرلەردىڭ پايداسى كوپ. كەيدە ءبىر-ەكى ساعات وتكەن سوڭ ەسىندە قالعان مالىمەتتى قاعازعا تۇسىرەدى. كەيىن جازعانىن كىتاپتاعى اقپاراتپەن سالىستىرىپ، قانداي تۇستاردى ۇمىتقانىن انىقتايدى.

سونىمەن قاتار ءالتايىر كۇندىز وقىعان ماتەريالىن كەشكە ءوز سوزىمەن مازمۇنداۋدى ادەتكە اينالدىرعان.

«اتاپ وتكەن تاسىلدەردىڭ ءبارى وقۋشىعا ناقتى قاي تاقىرىپقا زەيىن سالۋ كەرەك ەكەنىن انىق كورسەتەدى. دايىندىق كەزىندە ماتەريالدى وقىپ قانا قويۋ ازدىق ەتەدى، سول ءۇشىن وتكەن تاقىرىپتاردى قايتالاپ، ءوزىڭدى تىزگىندەپ وتىرۋ قاجەت»، - دەيدى.

ءالتايىر اسەت قاتارلاستارى سەكىلدى دايىندىق كۋرسىنا قاتىسقانىمەن، ورتالىقتىڭ تاپسىرمالارىمەن شەكتەلىپ قويماعان. ونىڭ ناتيجەسى بىرتىندەپ ءوسىپ، قاڭتاردا 120, ناۋرىزدا 131, ال العاشقى نەگىزگى ۇبت-دا 140 بالعا جەتتى.

ونىڭ ايتۋىنشا، دايىندىق بارىسىندا اتا-انا مەن بالا اراسىنداعى قارىم-قاتىناسقا دا ءمان بەرۋ كەرەك.

«ۇبت كەزىندە اتا-اتام مەنىڭ ەرتەڭىم جايلى ءسال ۋايىمداعانى بولماسا، قاتتى قىسىم جاساعان جوق. شەشىمدى ءوزىم قابىلداپ، ماماندىعىم مەن دايىندىق ورتالىعىن ءوزىم تاڭدادىم. وسى كەزەكتە ايتاتىنىم، بالا ءوز بەتىمەن دايىندالىپ، جاۋاپكەرشىلىك الاتىن بولسا، وعان تيىسپەگەن دۇرىس. ۇبت-عا زەيىن سالعان بالالار ءوز ماقساتىن ايقىن بىلەدى جانە وسى جولدا تىنباي ەڭبەك ەتۋگە دايىن»، - دەيدى.

 ءالتايىر اسەت تە 140 بالل جيناعاننان كەيىن پاتەر يەسى اتاندى. ونىڭ ايتۋىنشا، ءوز پاتەرىنە ورالعان سايىن ەڭبەگى اقتالعانىن ءتۇسىنىپ، كوڭىلىن قۋانىش كەرنەيدى ەكەن.

«دوسىممەن جارىسىپ، 140 بالل جينادىم»

كەلەسى رەكوردسمەن تۇركىستاندىق جاسۇر نىشانباەۆ سىنىپتاسىمەن ساباقتى جارىسىپ وقىعان. ەڭ قىزىعى، جاسۇر دا، ونىڭ سىنىپتاسى ايسۇلتان دا 140 بالل يەگەرى اتاندى. ەكى دوس جاتاقحانادا بىرگە تۇرىپ، دۇنيەجۇزى تاريحى مەن اعىلشىن ءتىلى پاندەرىنە قاتار دايىندالعان.

فوتودا جاسۇر نىشانباەۆ

«جاتاقحانادا وقۋدان باسقا ەشتەڭە الاڭداتپادى. ءبىز ءبىر جىل بويى جارىسىپ وقىدىق. ايسۇلتان ءوز-وزىنە سەنىمدى بولدى، ال مەن سوڭىنا دەيىن ۋايىمدادىم»، - دەيدى جاسۇر.

 جاسۇردىڭ ۋايىمى 140 بالل جيناعان كەزدە عانا سەيىلگەن. ونىڭ تاجىريبەسى دايىندىقتاعى باسەكەنىڭ تاعى ءبىر قىرىن اشادى. جارىس ءاردايىم بىرەۋدى باسىپ وزۋ ءۇشىن عانا قاجەت ەمەس. كەيدە قاسىڭداعى ادامنىڭ ەڭبەگى وزىڭە دە قوسىمشا ىنتا بەرەدى.

دايىندىققا ءوزى اقشا تاۋىپ، 2 رەت 140 بالل جيناعان ەراسىل

فوتودا ەراسىل سايلاۋوۆ

اباي وبلىسىنداعى بورودۋليحا اۋىلى مەكتەبىنىڭ تۇلەگى ەراسىل سايلاۋوۆ باسىندا ۇبت-دان جوعارى بالل جينايتىنىنا مۇلدە سەنبەگەن. كەيىن ول تەستىلەۋدەن ەكى رەت 140 ۇپاي جيناپ، بويىنداعى كۇماندى سەيىلتتى.

«باستاپقىدا اۋىل مەكتەبىنىڭ وقۋشىسى 140 بالل جيناي المايدى دەگەن ويدىڭ ارباۋىندا ءجۇردىم. دەگەنمەن ءار سىناق تەستىنەن كەيىن ەڭبەگىمنىڭ جەمىسىن كورىپ، وزىمە دەگەن سەنىمىم ارتا ءتۇستى»، - دەيدى.

ەراسىل ۇبت-عا دايىندالۋعا كۋرس ساتىپ الۋ ءۇشىن قاراجاتتى ءوزى تاپقان.  جازعى كانيكۋلدا «جاسىل ەل» باعدارلاماسىنا قاتىسىپ، اقشا جيناپتى.

«اتا-انام دايىندىعىما شامامەن 150 مىڭ تەڭگە بەردى. ال قالعان شىعىندى ءوزىم وتەگىم كەلدى. سول ءۇشىن جازدا جۇمىس ىزدەۋگە كىرىستىم»، - دەپ ەسكە الدى ستۋدەنت.

الايدا، ول جوعارى بالل جيناۋ ءۇشىن مىندەتتى تۇردە اقىلى كۋرسقا قاتىسۋ قاجەت دەگەن پىكىرمەن كەلىسپەيدى. ونىڭ ويىنشا، ءوز بەتىنشە دايىندالعان وقۋشىلار دا جاقسى ناتيجە كورسەتە الادى.

ەراسىل ءۇشىن دايىندىق كەزىندە ەڭ كۇردەلى ءپان قازاقستان تاريحى بولىپتى. سوندىقتان ول تاقىرىپتاردى ءوز بەتىنشە زەرتتەپ، ماتەريالدى بىرنەشە رەت قايتالاپ وتىرعان. ەراسىل اقپاراتتى ەستە ساقتاۋدا ينتەرۆالدى قايتالاۋ ءادىسىن قولدانعانىن ايتادى. ماسەلەن، بۇگىن وتكەن تاقىرىبىن كەلەسى كۇنى، ءۇش كۇننەن كەيىن جانە بەلگىلى ءبىر ۋاقىت وتكەن سوڭ قايتا قاراپ وتىرعان. ال دايىندىق كەزىندە كونسپەكت جازۋ ەراسىلدىڭ دا ۋاقىتىن الىپتى.

«ۇبت-عا دايىندالىپ جۇرگەن وقۋشىلارعا كونسپەكت جازۋعا 3-4 ساعات ۋاقىت جۇماساماي، بۇل ارادا باسقا ماڭىزدى تاقىرىپتارعا زەيىن سالۋ كەرەك ەكەنىن جەتكىزگىم كەلەدى»، - دەيدى ەراسىل.

139 بالل جيناعان كەزدە ول سىيلىققا MacBook السا، ەكى رەت 140 بالل يەگەرى اتانعانى ءۇشىن 2 ميلليون تەڭگە قانجىعالاعان. سونىمەن قاتار دايىندىق كۋرسى ەراسىلعا شەتەلگە جولداما تارتۋ ەتتى. ءبىر قىزىعى، ول اقشالاي سىيلىقتىڭ 80 پايىزىن اتا-اناسىنا بەرىپ، قالعان بولىگىنە وزىنە جاڭا سمارتفون ساتىپ العان. قازىر ەراسىل MNU جاتاقحاناسىندا تۇرادى.

«بىلىممەن قوسا پسيحولوگيالىق كۇي دە ماڭىزدى»

فوتودا نازەركە سارسەنباي

جامبىل وبلىسى قۇلان اۋىلىنىڭ تۋماسى نازەركە سارسەنباي ۇبت-عا دايىندىق كەزىندە تاڭعى بەستە تۇرىپ، چەك-ليست تولتىرىپ، پسيحولوگپەن جۇمىس ىستەۋدى ادەتكە اينالدىرعان. نازەركە ناقتى 140 بالل جيناۋدى ماقسات ەتپەسە دە، ۇبت-دان جوعارى ناتيجە كورسەتە الاتىنىن سەزگەنىن ايتادى.

«ومىرىمدە بولىپ جاتقان كەيبىر وقيعالار ماعان 140 بالل جينايتىنىمدى الدىن الا سەزدىرگەندەي بولدى. مىسالى، SAT ەمتيحانىنان 1450 بالل العان كەزدە اپكەم مەنى قۇتتىقتاپ، «140 بالل العانىڭمەن!» دەگەن ەدى. سول ءسوزى ءالى كۇنگە دەيىن ەسىمدە»، - دەيدى.

باستاپقىدا نازەركە تاپسىرمالاردى ورىنداۋعا قانشا ۋاقىت بولەتىنىن پاراققا جازىپ، كۇنىن جوسپارلاپ وتىرعان. IELTS-قا كۇنىنە ءبىر جارىم ساعات ارناسا، SAT, NUET جانە ۇبت-عا ازىرلىك كەزىندە كۇنىنە 17 ساعات بويى دايىندالعانىن ايتادى. كەيىن اتالمىش جۇكتەمەنىڭ دەنساۋلىعىنا زيان كەلتىرۋى مۇمكىن ەكەنىن تۇسىنگەن نازەركە پسيحولوگتىڭ كومەگىنە جۇگىنۋدى ءجون كورگەن.

«بۇل جولدا پسيحولوگپەن جۇمىس ىستەۋدىڭ ماڭىزى زور بولدى. ول ماعان قولداۋ كورسەتىپ، باعىت-باعدار بەرىپ، بويىمداعى سەنىمدىلىكتى ارتتىرۋعا كومەكتەستى. دايىندىق بارىسىندا تەك ءبىلىمدى تولىقتىرۋ عانا ەمەس، پسيحولوگيالىق تۇرعىدان دا دايىن بولۋ ماڭىزدى ەكەنىن ءتۇسىندىم»، - دەيدى ستۋدەنت.

 پسيحولوگپەن جۇمىستانعان وقۋشى كۇن سايىن «ماعان ساباق وقىعان ۇنايدى» دەپ ايتىپ، ءوزىن ىنتالاندىرىپ وتىرعان.

«ۋاقىت وتە كەلە وقۋعا دەگەن كوزقاراسىم دا وزگەرىپ، دايىندالۋ جەڭىلدەي ءتۇستى»، - دەيدى نازەركە.

نازەركە ءۇشىن وقۋداعى ەڭ ءتيىمدى ءادىس – قايتالاپ وقۋ. ول دۇنيەجۇزى تاريحىنىڭ بارلىق كەزەڭدەرىن قامتيتىن كىتاپتى 5-6 رەت وقىپ شىققان.

«قيىن تاقىرىپتاردى دا قايتا-قايتا وقىپ، تولىق مەڭگەرۋگە تىرىستىم. كونسپەكت جازۋ مەن ءۇشىن اسا ءتيىمدى بولمادى، سوندىقتان وزىمە قولايلى ءادىستى تاڭدادىم. ال بولاشاق تالاپكەرلەرگە كۇن ءتارتىبىن ساقتاۋعا جانە چەك-ليست تولتىرۋعا قاتىستى كەڭەس بەرەر ەدىم. وزىمدە وزگەلەر بىلمەيتىن ەرەكشە قۇپيا ءادىس بار دەپ ايتا المايمىن. بۇل تاسىلدەردىڭ كوبىن مەن دە باسقا ادامداردان ەستىپ، تاجىريبەمدە قولدانىپ كوردىم، - دەدى 140 بالل يەگەرى.

نازەركە ەڭبەگىنىڭ جەمىسى رەتىندە ءبىر ميلليون تەڭگە يەلەنىپ، شەتەلگە جولداما العان.

«ارمانداعاندا ءبارىن ەلەستەتۋ كەرەك»

فوتودا كاۋسار التىنسارى

قىزىلوردالىق كاۋسار التىنسارى ۇبت-عا دايىندىق كەزىندە الدىنا ەرەكشە ماقسات قويعان. ول جوعارى ناتيجەسىنىڭ ارقاسىندا پاتەر يەلەنۋدى ارمانداپ، بولاشاق ۇيىندەگى ارلەنۋ ۇستەلىنە دەيىن كوز الدىنا ەلەستەتكەنىن ايتادى. ياعني ەگجەي-تەگجەيلى ۆيزۋاليزاتسيا جاساعان.

كاۋسار التىنسارىنىڭ ەگىزى گاۋھار دا ۇبت-دان 139 بالل جيناپ، ءبىلىم بايگەسىندە توپ جاردى. بۇگىندە ەكەۋى دە ماقسۇت نارىكباەۆ ۋنيۆەرسيتەتىندە وقيدى.

كاۋسار كۇنىنە 7-8 ساعات وقىپ، پومودورو ءادىسىن پايدالانعان. ول ءوزىنىڭ بولاشاق پاتەرىن، ارلەنۋ ۇستەلىنە دەيىن ناقتى ارمانداسا دا، تەك بۇل ادىسكە سەنىپ، دايىندىقتى ەكىنشى ورىنعا ىسىرىپ قويۋعا بولمايتىنىن ايتادى.

«ۇبت كەزىندە ساتتىلىكتىڭ دە ءرولى بولۋى مۇمكىن. دەگەنمەن جۇلدىزىم وڭىنان تۋسا ەكەن دەپ قول قۋسىرىپ وتىرۋعا دا بولمايدى. ەڭ باستىسى – ءتارتىپ پەن تۇراقتى دايىندىق. ءبىر ءىستى كۇن سايىن قايتالاساڭ، ول بىرتىندەپ ادەتكە اينالادى. مەنىڭ ويىمشا، جوعارى بالل جيناۋ ءۇشىن تەك كوپ وقىپ قانا قويماي، دايىندىقتى جۇيەلى تۇردە جالعاستىرۋ كەرەك»، - دەيدى ول. 

كاۋساردىڭ جوعارى ناتيجەگە جەتۋىنە وتباسىنىڭ قولداۋى دا اسەر ەتكەن.

«اتا-انامنىڭ قولداۋىن ەرەكشە اتاپ وتكىم كەلەدى. ولار ماقساتقا جەتەمىن دەپ ءوزىمدى شامادان تىس قيناماۋ كەرەكتىگىن ايتاتىن. ساباق وقىپ وتىرىپ، تۇسكى نە كەشكى اس ىشۋگە ۇلگەرمەي قالاتىن كەزدەرىم بولدى. سوندايدا اكەم جانىما جەمىس-جيدەك تۋراپ اكەلىپ، باسقا دا قاجەت نارسەلەرىمدى دايىنداپ بەرەتىن. جاقىندارىڭنىڭ قولداۋى وتە ماڭىزدى ەكەنىنە كوزىم جەتتى»، - دەيدى ستۋدەنت.

ارماندار كارتاسىنداعى 140 بالل

فوتودا ىڭكار قىدىربەك

ال ىڭكار قىدىربەك ءۇشىن 140 بالل تەك ەمتيحان ناتيجەسى ەمەس، الدىن الا كوز الدىنا ەلەستەتكەن ماقساتتارىنىڭ ءبىرى بولعان. ول 10-سىنىپتا اعىلشىن ءتىلىن تەرەڭدەتىپ وقىپ، IELTS ەمتيحانىنان 8.0 بالل العان. ال ۇبت-عا تولىققاندى دايىندىقتى 11-سىنىپتا باستاپتى. تاڭداۋ پاندەرى – اعىلشىن ءتىلى مەن دۇنيەجۇزى تاريحى.

ىڭكار قاڭتار جانە ناۋرىز ايلارىنداعى سىناق ۇبت-لاردان جوعارى بالل جيناعان.

«135, 139 بالل جيناي السام دا، «ەندى دايىندالماي-اق قويسام بولادى» دەگەن ەرىنشەكتىك بولمادى. ماقساتىما جەتۋ ءۇشىن 1-اق بالل قالدى. مەن مۇنى سوڭىنا دەيىن اپارۋىم كەرەك، ەڭبەگىمنىڭ اقتالعانىن قالايمىن دەگەن ويلار عانا بويىمدى بيلەدى»، – دەيدى ول.  

ىڭكار دايىندىق كەزىندە الەۋمەتتىك جەلىلەردى ءوشىرىپ تاستاعان.

«ويتكەنى ول مەنىڭ بار نازارىمدى الىپ قويىپ ءجۇردى. ال ولاردى ءوشىرىپ تاستاعاندا، تەك ساباققا فوكۋس قويدىم. ءبىر جول بويى TikTok, Instagram, ءتىپتى Shorts كورىپ قويام با دەپ الاڭداپ، YouTube-تى دا ءوشىرىپ تاستادىم. سونداي-اق قىدىرۋلاردان دا باس تارتتىم. بۇل شەكتەۋلەر ماعان قاتتى كومەكتەستى»، - دەدى ىڭكار.

ىڭكاردىڭ دايىندىقتاعى تاعى ءبىر ەرەكشەلىگى – تاريح پاندەرىنە دەگەن قىزىعۋشىلىعى. كوپتەگەن وقۋشى قازاقستان جانە دۇنيەجۇزى تاريحىنداعى داتالاردى جاتتاۋدان قينالسا، ىڭكار بۇل پاندەردى ءسۇيىپ وقىعان. كەيدە دۇنيەجۇزى تاريحىنا كۇنىنە 10 ساعاتقا دەيىن ۋاقىت ءبولىپ، ءبىر كۇندە تۇتاس كىتاپتى وقىپ اياقتاعان كەزدەرى بولعان ەكەن.

ول ارنايى ارماندار كارتاسىن جاساپ، بۇكىل قالاۋىن سوندا جازىپ قويىپتى.

«مەنىڭ ارماندار كارتامدا پاتەر، 140/140, شەت ەلگە جولداما بولعان. ەندى قاراپ وتىرسام، ونىڭ ءبارى ورىندالىپتى»، - دەيدى ىڭكار.

سونداي-اق وسىنداي ناتيجە ءۇشىن دايىندىق كۋرسى تاراپىنان رەكوردسمەننىڭ اتا-اناسىنا 3 ملن تەڭگە سىيلىق جانە وزىنە پاتەردەن بولەك، 4 جىل بويى ايىنا 140 مىڭ تەڭگە شاكىرتاقى بەرىلىپ وتىرادى.

ىڭكاردىڭ بولاشاق تالاپكەرلەرگە ايتار كەڭەسى قىسقا: وزىڭە سەنۋ. ونىڭ پىكىرىنشە، كەيدە وقۋشى دۇرىس جاۋاپتى بىلسە دە، سەنىمسىزدىكتىڭ سالدارىنان قاتەلەسۋى مۇمكىن. سوندىقتان ءبىلىمدى تولىقتىرۋمەن قاتار ءوز شەشىمىڭە سەنۋدى دە ۇيرەنۋ قاجەت.

140 بالل الۋدىڭ ورتاق فورمۋلاسى بار ما؟

بيىلعى رەكوردسمەندەردىڭ ۇشتەن ەكىسىنىڭ م. نارىكباەۆ ۋنيۆەرسيتەتىن تاڭداۋىنا نە سەبەپ بولدى؟ مۇنى ءبىز MNU پروۆوستى انار باۋىرجانقىزىنان سۇراپ بىلدىك. ونىڭ پىكىرىنشە، تالاپكەرلەر ءۇشىن وقۋ ورنىنىڭ حالىقارالىق اككرەديتتەلۋى مەن تۇلەكتەردىڭ جۇمىسقا ورنالاسۋ كورسەتكىشتەرى ماڭىزدى.

فوتودا MNU پروۆوستى انار باۋىرجانقىزى

«بۇل كەزدەيسوق تاڭداۋ ەمەس. تالاپكەرلەر مەن ولاردىڭ اتا-انالارى ۋنيۆەرسيتەتتەردى جان-جاقتى زەرتتەيدى. ماسەلەن، وتكەن جىلى «اتامەكەن» رەيتينگىندە ءبىزدىڭ قۇقىق، حالىقارالىق قۇقىق جانە شەتەل فيلولوگياسى باعدارلامالارىمىز ءبىرىنشى ورىن الدى»، - دەيدى پروۆوست.

140 بالل العان 8 ستۋدەنتتىڭ بارلىعى دەرلىك حالىقارالىق قاتىناستار ماماندىعىندا وقيدى. انار باۋىرجانقىزى بۇل باعدارلامانىڭ تارتىمدىلىعىن ۋنيۆەرسيتەتتىڭ حالىقارالىق مۇمكىندىكتەرىمەن بايلانىستاردى.

«ستۋدەنتتەر حالىقارالىق كومپانيالاردا، سىرتقى ىستەر مينيسترلىگىندە تاجىريبەدەن ءوتىپ، ەلشىلىكتەردە جۇمىس ىستەي الادى. سونىمەن قاتار ەكىنشى شەت ءتىلىن مەڭگەرۋ مىندەتتى، ال ساباقتاردى تاجىريبەلى ماماندار جۇرگىزەدى. مەنىڭ ويىمشا، تالاپكەرلەردى وسىنداي مۇمكىندىكتەر قىزىقتىرادى، - دەيدى ول.

ءبىر ناتيجە، سەگىز ءتۇرلى جول. ۇبت-دان 140 بالل جيناعان تۇلەكتەردىڭ ارقايسىسى بيىك مەجەگە وزىندىك تاسىلمەن جەتتى. ءبىرى قاتاڭ جوسپارعا سۇيەنسە، ەندى ءبىرى ۇزدىكسىز قايتالاۋ مەن تەمىردەي تارتىپكە سۇيەنگەن. ال ەندى ءبىرى پسيحولوگيالىق كۇيىمەن جۇمىس جاساعان. ولاردىڭ دايىندىق ادىستەرى ءارتۇرلى بولعانىمەن، بارلىعىنا ءتان ورتاق قاسيەت – تاباندىلىق پەن تۇراقتى ەڭبەك.

8 تۇلەكتىڭ تاجىريبەسى جوعارى بالل جيناۋدىڭ امبەباپ فورمۋلاسى جوق ەكەنىن كورسەتەدى. ناتيجەگە جەتۋدە جەكە ىزدەنىسپەن قاتار وتباسىنىڭ قولداۋى مەن دامۋشى وقۋ ورتاسى دا ماڭىزدى ءرول اتقارعان.

داريا عۇماروۆا

جانەركە دوسكەلدى

 

پىكىرلەر