قازان ايىن تويمەن وتكىزدىم.
الدىمەن ورالدا جۋرناليستيكا جامپوزى ەسەنجول قىستاۋباەۆتىڭ 70-كە كەلگەن مەرەيتويى، ودان سوڭ اتىراۋ، نازاربەك كوسشيەۆ ءىنى-دوسىمنىڭ دۋمان ۇلىن اياقتاندىرعان قۋانىشى.
نەسىن ايتاسىڭ، ەكەۋى دە دۇركىرەپ ءوتتى. دەسە دە، قۇدايشىلىعىن ايتايىن، قازىرگى قالپىندا قازاقتىڭ تويى شارشاتادى: ءبىر ساتكە ۇزىلمەيتىن داڭعازا مۋزىكا، ءبىر ساعات سويلەپ كەلىپ "ايتايىن دەگەنىم بۇل ەمەس ەدى" دەپ قايتا باستايتىن كوكەلەر... دانستا كەرسەندەي قۇيرىعىمەن قاعىپ وتەتىن كەلىندەر، پاردون... ءبىر قولى قالتادا، ساعان ءومىر ءسۇرۋدى ۇيرەتىپ تۇراتىن، اباي قورقىپ كەتكەن " كەيىنگى جاس بالالار".
كەشە الماتىدا، كوكتوبەدە عابدراحيم جاڭبىرباەۆ اعامىز بەن اقۇشتاپ باحتىگەرەەۆا جەڭگەمىزدىڭ وتاۋ قۇرعانىنا 50 جىل تولۋ سالتاناتى ءوتتى.
جازيرا، عازيزا جانە تاھمينا اتا-انالارىنىڭ التىن تويىن وتكىزۋدە جالپى توي سالتاناتىنىڭ سۇيكىمدى ستاندارتىن كورسەتتى.
"اباي" رەست-ءتىڭ شاعىنداۋ بانكەت زالى... 80 جاستان نىشان تاستايتىن 80 قادىرلى قوناق... قازاقتىڭ ءسۇت بەتىندەگى ۇلپىكەرلەرى... باياۋ ويناعان رەلاكس مۋزىكا... جايىمەن ىرعالعان تانگو، ۆالس...
روزا مەن ماقپال، جۇبانىش جەكسەن كەزەكتەسىپ ءان ايتتى. اسىرەسە ماقپال 4-5 ءاندى قاتار جىبەرىپ، دانس كورىگىن قىزدىردى. شىنىم، جاندى داۋىستاعى كونتسەرتتەرگە بارۋدى قويىپ، مۋزىكانى يۋتۋبتان جاقسى ناۋشنيكپەن تىڭداپ جۇرگەننەن بە ەكەن، مىنداعى "جيۆوي" ۆوكالداردان ونشا ءلاززات الا قويمادىم. قايتا دوسىم سۇلەەۆ اعامىزدىڭ ساكسىنىڭ داۋسىن ەستىگىم كەلگەن، بىراق ول كىسى ورتاعا شىقپادى.
اقۇشتاپ اپاي روزا قۋانىشقىزى مەن ماقپالدى ەكى جاعىنا الىپ وتىردى. ماڭايداعى بىلەتىن كىسىلەر "ەكەۋىنىڭ ءبىر ۇستەلدە وتىرۋى سيرەك" دەسىپ جاتتى. بىلمەدىك و جاعىن، ايتەۋ ماقپال روزانى الپەشتەپ بي الاڭىنا شىعارعانىن كوردىك.
بىلەتىنىمىز : كەزدەسسە "وتكەندەگى جازعانىڭ جىپ-جىلى ەكەن"دەپ قول قىسىپ قۇتتىقتاپ جاتاتىن جازۋشىلار ورتاسىندا ونداي كورەالماۋشىلىقتىڭ جوق ەكەندىگى، بولسا دا ازدىعى. ءبىز -- وتەگەن ورالبايۇلى وتەكەڭ، ۇلىقبەك ەسداۋلەتوۆ - ۇلاعاڭ، جۇسىپبەك قورعاسبەك - جۇكەڭ، ءامىرجان قوسان - ءامىر جانە ءادىل قويتان بولىپ قاۋقىلداسىپ، ءبىر جاساپ قالدىق.
مۇنداي التىن، گاۋھار تويلاردا ەڭ كوپ ايتىلاتىن تىلەك -- وسىنشاما ۋاقىت ءبىر شاڭىراق استىندا تۇرىپ كەلە جاتقان ەكەۋدى ەڭبەك ەرىنە تەڭەۋ، تاڭدانۋ، تاڭىرقانۋ. يە، ايتسا ايتقانداي، ۇشاقتا ءۇش ساعات قاتار وتىرعان كورشىڭنەن جالىعىپ كەتەسىڭ، ال سونشا ۇزاق جىل تەرپيلا بولۋ...بۇل ەندى ەرلىك قوي. مۇنداي كىسىلەرگە جانە ارقايسىسى وزىنشە شىعارماشىلىق تۇلعا ادامدارعا كەۋدە ءمۇسىنىن قويسا دا ارتىقتىق ەتپەيتىن شىعار.
قازاقتىڭ تويى - قوناعى ازاڭداۋ بولسا دا شارشاتپايتىن جاقسى تويى بىتپەسىن، ەنشاللا.
ماقسات ءتاج-مۇرات
