داۋلەت تولەۋتايۇلى دينارا ساتجانعا بەرگەن سۇحباتىندا قازاقتىڭ توي دەسە ىشكەن اسىن جەرگە قويىپ، قاتتى شاشىلاتىنى تۋرالى ايتتى، دەپ حابارلايدى “ادىرنا” ۇلتتىق پورتالى.
جۇما سايىن قايىرىمدىلىق جاساپ، باسپانا سىيعا تارتىپ، ودان قالسا، باسپاناعا الۋعا باعىت بەرىپ جۇرگەن داۋلەت ءوزىنىڭ 4 پاتەرى بار ەكەنىن اشىپ ايتتى.
ء“بىرىنشى كەزەكتە وزىنەن اياماۋ كەرەك. بىراق وزىڭنەن اياماۋ كەرەك ەكەن دەپ، قارىزعا، Kaspi ءبولىپ تولەۋگە كيىم الۋ دۇرىس ەمەس. ءوزىڭ ومىرگە ءبىر-اق رەت كەلگەننەن كەيىن، جاقسىنى كورۋگە ۇمتىلۋ كەرەك. بىراق ونىڭ دا شەگى بولادى.
پاندەميا كەزىندە تالاي ادامدى كوردىم. وتكەندە ءبىر تانىسىم، تانىمال ادام ءۇيى جوق ءالى كۇنگە دەيىن، بىراق ول “Dior-دىڭ 800-900 مىڭ تەڭگە تۇراتىن سومكەسى بار” دەپ ماقتانادى. Dior-ىڭ قۇرىسىن دەدىم، ءۇيىڭ جوق، نەسىنە ماقتاناسىڭ؟ ءبارىن جاساپ ال، ءارى قاراي برەند قۋاسىڭ با، ءوزىڭ بىلەسىڭ”، – دەيدى داۋلەت.
قازاقتىڭ داۋلەتى اتتى لاقاپ اتپەن تانىلعان ول بار جيعان-تەرگەنىن تويعا شاشاتىن حالىقتى تۇسىنبەيتىنىن ايتتى.
“توي دا سولاي. 5 ساعاتتىق تويعا 5 جىل تولەيتىن كرەديت الادى. ودان كەيىن ەكى جاس اجىراستى، دەيدى.
جاعدايىڭ بار ما، نۇر-سۇلتاندا 30 مىڭ ادامدىق ستاديون بوس تۇر، سوندا توي جاسا. جاعدايىڭ جوق پا، كورپەڭە قاراي كوسىل. ۇيات بولادى دەگەننىڭ ءبارى بوس ءسوز.
ەرتەڭگى كۇنى نەسيە تولەي الماي وتىرعاندا ۇياتتىڭ كوكەسى سوندا بولادى. توي ءوتتى، ەلدىڭ ءبارى جەدى، پاكەتكە سالدى، ىسىراپ جاسادى، كەتتى. ال ەرتەڭگى كۇنى ەكى جاس قينالعان كەزدە، سول تويعا كەلگەن ادامنىڭ بىرەۋى “قينالىپ قالىپسىڭدار، كرەديتتەرىڭدى تولەپ بەرەيىن” دەپ كەلە مە؟
توي بولۋ كەرەك، بىراق اركىمنىڭ شاماسىنا قاراي. توي – ءتاڭىردىڭ قازىناسى. تويدىڭ ارقاسىندا ءبىز قازاقتىعىمىزدى جوعالتپاي وتىرمىز. بىراق ميكروكرەديتتىك ۇيىمداردان 2 ملن كرەديت الىپ، سونى 5 ملن ەتىپ قايتارىپ وتىرعان ادامدار بار. ودان دا ەكى جاقتان كەتكەن اقشانى قوسىپ، باستاپقى جارنا رەتىندە جاستارعا بەرىپ، ءۇي الۋعا بولادى”، – دەدى تولەۋتايۇلى.
باسپانالى بولعىسى كەپ جۇرگەن ادامدارعا ەڭ العاش جاساۋ كەرەك قاداممەن دە ءبولىستى.
“ەڭ ءبىرىنشى كەڭەس، ءتىرى ادام تىرشىلىگىن جاساۋ كەرەك. وتىرساق وتىرا بەرەمىز. اناۋ قىمبات، مىناۋ قىمبات، زامان سونداي دەپ نەگاتيۆتىڭ ءبارىن بويىمىزعا جيناپ الاتىن بولساق، ەنەرگيامىزدى جوعالتىپ، ءالسىز ادامعا اينالامىز. ال ەگەر دە “جوق جاسايمىن، قولىمنان كەلەدى، اينالامدى وزگەرتەمىن، سوعان قاراي تالپىنامىن” دەيتىن بولسا، ول ادام كۇش-قۋات جينايدى. ال ادامنىڭ بويىنداعى ەنەرگيا تۇبىندە اقشاعا الىپ كەلەدى”، – دەيدى بلوگەر.
”ادىرنا” ۇلتتىق پورتالى
