Qazan aıyn toımen ótkizdim.
Aldymen Oralda jýrnalıstıka jampozy Esenjol Qystaýbaevtyń 70-ke kelgen mereıtoıy, odan soń Atyraý, Nazarbek Kosshıev ini-dosymnyń Dýman ulyn aıaqtandyrǵan qýanyshy.
Nesin aıtasyń, ekeýi de dúrkirep ótti. Dese de, qudaıshylyǵyn aıtaıyn, qazirgi qalpynda qazaqtyń toıy sharshatady: bir sátke úzilmeıtin dańǵaza mýzyka, bir saǵat sóılep kelip "Aıtaıyn degenim bul emes edi" dep qaıta bastaıtyn kókeler... Dansta kersendeı quıryǵymen qaǵyp ótetin kelinder, pardon... Bir qoly qaltada, saǵan ómir súrýdi úıretip turatyn, Abaı qorqyp ketken " keıingi jas balalar".
Keshe Almatyda, Kóktóbede Ǵabdrahım Jańbyrbaev aǵamyz ben Aqushtap Bahtygereeva jeńgemizdiń otaý qurǵanyna 50 jyl tolý saltanaty ótti.
Jazıra, Ǵazıza jáne Tahmına ata-analarynyń altyn toıyn ótkizýde jalpy toı saltanatynyń súıkimdi standartyn kórsetti.
"Abaı" rest-tiń shaǵyndaý banket zaly... 80 jastan nyshan tastaıtyn 80 qadirli qonaq... qazaqtyń sút betindegi úlpikerleri... baıaý oınaǵan relaks mýzyka... jáıimen yrǵalǵan tango, vals...
Roza men Maqpal, Jubanysh Jeksen kezektesip án aıtty. Ásirese Maqpal 4-5 ándi qatar jiberip, dans kórigin qyzdyrdy. Shynym, jandy daýystaǵy konertterge barýdy qoıyp, mýzykany ıýtýbtan jaqsy naýshnıkpen tyńdap júrgennen be eken, myndaǵy "jıvoı" vokaldardan onsha lázzat ala qoımadym. Qaıta Dosym Súleev aǵamyzdyń saksynyń daýsyn estigim kelgen, biraq ol kisi ortaǵa shyqpady.
Aqushtap apaı Roza Qýanyshqyzy men Maqpaldy eki jaǵyna alyp otyrdy. Mańaıdaǵy biletin kisiler "Ekeýiniń bir ústelde otyrýy sırek" desip jatty. Bilmedik o jaǵyn, áıteý Maqpal Rozany álpeshtep bı alańyna shyǵarǵanyn kórdik.
Biletinimiz : kezdesse "Ótkendegi jazǵanyń jyp-jyly eken"dep qol qysyp quttyqtap jatatyn jazýshylar ortasynda ondaı kórealmaýshylyqtyń joq ekendigi, bolsa da azdyǵy. Biz -- Ótegen Oralbaıuly Ótekeń, Ulyqbek Esdáýletov - Ulaǵań, Júsipbek Qorǵasbek - Júkeń, Ámirjan Qosan - Ámir jáne Ádil Qoıtan bolyp qaýqyldasyp, bir jasap qaldyq.
Mundaı altyn, gaýhar toılarda eń kóp aıtylatyn tilek -- osynshama ýaqyt bir shańyraq astynda turyp kele jatqan ekeýdi eńbek erine teńeý, tańdaný, tańyrqaný. Ie, aıtsa aıtqandaı, ushaqta úsh saǵat qatar otyrǵan kórshińnen jalyǵyp ketesiń, al sonsha uzaq jyl terpıla bolý...bul endi erlik qoı. Mundaı kisilerge jáne árqaısysy ózinshe shyǵarmashylyq tulǵa adamdarǵa keýde músinin qoısa da artyqtyq etpeıtin shyǵar.
Qazaqtyń toıy - qonaǵy azańdaý bolsa da sharshatpaıtyn jaqsy toıy bitpesin, enshalla.
Maqsat Táj-Murat
