ەلىمىزدە 2019 جىلدان بەرى 24-26 تامىز - تۋعان جەر كۇنى اتاپ وتىلەدى، دەپ حابارلايدى "ادىرنا" ۇلتتىق پورتالى.
ۇلتتىق مەرەكەگە وراي ءاليحانتانۋشى-عالىم، حالىقارالىق جۋرناليست، فيلولوگيا عىلىمدارىنىڭ كانديداتى، "الاش" عىلىمي-زەرتتەۋ ينستيتۋتىنىڭ ديرەكتورى سۇلتان حان اققۇلى بارشا قازاقستاندىقتاردى مەرەكەمەن قۇتتىقتادى.
"سىزدەردى ۇلت قۇندىلىقتارىن ساقتاۋ مەن ناسيحاتتاۋعا باعىتتالعان قازاق كۇنتىزبەسىنىڭ ايشىقتى كۇنى 24-26 تامىز - تۋعان جەر كۇنىمەن قۇتتىقتايمىن!
1847 جىلى قازاق حاندىعى ءبىرجولا ىدىراپ، تاريح ساحناسىنان تۇسۋىنەن تۋرا 70 جىل وتكەن 1917 جىلدىڭ جەلتوقسانىندا الاش رەسپۋبليكاسى اتاۋىمەن تۋى قايتا كوتەرىلگەن قازاق ۇلتتىق مەملەكەتىنىڭ تەرريتورياسى 9 وبلىس، ءبىر گۇبەرنە، زاكاسپي وبلىسىنىڭ ماڭعىشلاق، التاي ءوڭىرىنىڭ بيسكى، زمەينوگور جانە بارناۋىل ويازدارىن قامتىپ، جالپى اۋماعى 3,45 ملن شارشى شاقىرىمدى قۇرادى.
قايتا جاڭعىرعان ۇلتتىق مەملەكەتتىڭ وسى جەرىن ءاليحان بوكەيحان ودان 7 جىل بۇرىن - 1910 جىلى سانكت-پەتەربوردا جارىق كورگەن ايگىلى «قازاقتار» اتتى تاريحي وچەركىندە ايقىنداپ قويعان بولاتىن. 1917 جىلدىڭ 12 جەلتوقسانىندا (قازىرگى كۇنتىزبە بويىنشا 25 جەلتوقسان) ءىى جالپىۇلتتىق قازاق-قىرعىز قۇرىلتايى وسى وبلىس-ويازداردى الاش رەسپۋبليكاسىنىڭ زاڭدى جەر اۋماعى دەپ جاريالادى.
الاش رەسپۋبليكاسىن جويىپ، ورنىنا قازاق اۆتونوميالىق كەڭەستىك سوتسياليستىك رەسپۋبليكاسى بولىپ قايتا قۇرىلاتىن 1920 جىلدىڭ تامىز ايىندا «الاش» ارىسى ءاليحان بوكەيحان احمەت بايتۇرسىنۇلى مەن ءالىمحان ەرمەكۇلىن العا سالىپ، كەڭەس وكىمەتىنىڭ كوسەمى ۆ.ي. لەنيننىڭ الدىندا وسى وبلىس-ويازدار قازاق حالقىنىڭ اتا-بابادان قالعان تاريحي مەنشىكتى جەرى ەكەنىن دالەلدەپ، تاۋەلسىز قازاقستان رەسپۋبليكاسىنىڭ قازىرگى جەر اۋماعىن – تەرريتورياسىن قورعاپ، بەكىتىپ الدى.
مىنە بيىل قازىرگى مەملەكەتتىك شەكارامىزدىڭ بەكىتىلگەنىنە 104 جىل تولىپ وتىر.
الاش ازاماتتارى! جەرىمىز تۇگەل، اسپانىمىز اشىق، ەلىمىز تىنىش بولسىن!" - دەدى ءوز قۇتتىقتاۋىندا.
