«تۋعان جەر، ساعان مىڭ تاعزىم!»

8176
Adyrna.kz Telegram

«ادىرنا» ۇلتتىق-ەتنوگرافيالىق بىرلەستىگى مەن ازاماتتىق باستامالاردى قولداۋ ورتالىعى جاريالاعان «تۋعان جەر» شىعارماشىلىق بايقاۋىنىڭ اياقتالۋىنا دا ساناۋلى كۇندەر قالدى. وسى كۇنگە دەيىن 500-دەن استام كەلىپ تۇسكەن ەڭبەكتەر ءالى دە تولاستار ەمەس. ايتا كەتەيىك، قاتىسۋشىلار «ۇزدىك ماقالا»، «ۇزدىك پوەزيا»، «ۇزدىك بەينەلەۋ ونەرى»، «ۇزدىك ونەرتابىس»، «ۇزدىك بەينەروليك» جانە «ۇزدىك ءداستۇرلى مۋزىكا ورىنداۋشىسى» نوميناتسيالارى بويىنشا باقتارىن سىناۋدا. تۋعان جەرىنىڭ قادىر-قاسيەتىن ۇعىنىپ، قىمبات ەكەندىگىن جۇرەكپەن سەزىنگەن جاستاردىڭ ەڭبەگىن كورگەن كەزدە تاڭ قالماۋ مۇمكىن ەمەس. تۋعان جەرگە جاساعان تاعزىمىن ءبىرى سوزبەن جەتكىزسە، ال ءبىرى ولەڭىنە قوسۋدا. جاستاردىڭ ءبىرى جۇرەكپەن ءان شىرقاسا، ال وزگە جاستار سۋرەتپەن، بەينەلى ونەرلەرىمەن سەزىمىن جەتكىزۋدە. ەندى ءبىرى تۋعان جەردىڭ اسەم كورىنىسىن بەينەروليك ارقىلى تاماشالاۋعا مۇمكىندىك تۋعىزۋدا. اقىن قاسىم امانجولوۆ:
شىقشى تاۋعا قاراشى، كەڭ دالاعا،
ءماز بولاسىڭ ۇقسايسىڭ جاس بالاعا.
ول شەتىمەن بۇل شەتىنە جۇگىرسەڭ،
شارشايسىڭ با، قۇمارىڭ ءبىر قانا ما؟،-
دەپ تەككە جىرلاماسا كەرەك-ءتى. رۋحتى جاستارىمىزدىڭ قاتارى ارتىپ، وتانىمىزدىڭ، كەڭ دالانىڭ تابيعاتىن بەينەلەۋگە ات سالىسۋدا. مۇنىڭ ءوزى تۋعان جەردىڭ كوركەيۋىنە ءبىرشاما ۇلەس دەپ ويلايمىز. ەلىمىزدىڭ كوركەم بايلىقتارىمەن ماقتانا، جارىسا جىرلاعان جاستار دا تاپ وسىلاي تۋعان جەرىن ناسيحاتتايتىنى ءسوزسىز. ەندەشە، تۋعان جەردىڭ دامۋىنا ۇلەسىن قوسىپ جاتقان قاتىسۋشىلارعا ساتتىلىك تىلەيمىز! تالاپتارىڭىز شىڭدالىپ، ەڭبەكتەرىڭىز جانا بەرسىن!

«ادىرنا» ۇلتتىق-ەتنوگرافيالىق بىرلەستىگى

پىكىرلەر