فوتو: مونتسامە
موڭعوليادا موڭعول مەملەكەتىنىڭ قۇرىلعانىنا – 2235 جىل، ۇلى موڭعول يمپەرياسىنىڭ قۇرىلعانىنا – 820 جىل، ۇلتتىق ەگەمەندىك پەن تاۋەلسىزدىكتىڭ قالپىنا كەلتىرىلگەنىنە – 115 جىل، حالىق رەۆوليۋتسياسىنىڭ جەڭىسىنە – 105 جىل جانە دەموكراتيالىق رەۆوليۋتسيانىڭ جەڭىسىنە 36 جىل تولۋىنا ارنالعان ۇلتتىق ناادام مەرەكەسى باستالدى.
ەل استاناسىنىڭ ورتالىق ستاديونىندا ناادامنىڭ سالتاناتتى اشىلۋ ءراسىمى ءوتىپ، وندا موڭعوليا پرەزيدەنتى ۋحنااگين حۇرەلسۇح قۇتتىقتاۋ ءسوز سويلەدى.
بيىلعى ناادامنىڭ اشىلۋ سالتاناتىنا قۇرمەتتى قوناق رەتىندە جۇبايى كيم حە گيونمەن بىرگە كورەيا رەسپۋبليكاسىنىڭ پرەزيدەنتى لي چجە ميون قاتىستى. ول موڭعوليا پرەزيدەنتى ۋحنااگين حۇرەلسۇحتىڭ شاقىرۋىمەن ەلگە مەملەكەتتىك ساپارمەن كەلدى.
پرەزيدەنت ۋحنااگين حۇرەلسۇح ءوز سوزىندە اتا-بابالار قۇرعان عۇن يمپەرياسىنان باستاۋ الاتىن موڭعولدىڭ ناادام مەرەكەسى مەملەكەت ءداستۇرىن، تاريحي جانە مادەني مۇرانى، موڭعول حالقىنىڭ بىرلىگى مەن ىنتىماعىن، ەلدىڭ تاۋەلسىزدىگى مەن وركەندەۋىن ايشىقتايتىن ۇلى ۇلتتىق مەرەكە ەكەنىن اتاپ ءوتتى.
«موڭعول مەملەكەتى تاريحىنداعى ايتۋلى داتالارعا ارنالعان، الەمدە تەڭدەسى جوق ۇلتتىق ناادام مەرەكەسىمەن بارشا موڭعول حالقىن جانە قادىرلى قوناقتاردى قۇتتىقتايمىن»، – دەدى مەملەكەت باسشىسى.
بيىلعى رەسمي اشىلۋ راسىمىنە كاسىبي شىعارماشىلىق ۇجىمدار، جەكە ستۋديالار، پروديۋسەرلىك كومپانيالار مەن تاۋەلسىز ونەر قايراتكەرلەرىنەن قۇرالعان ەكى مىڭنان استام ونەرپاز قاتىستى.
مەرەكەلىك باعدارلامانىڭ شارىقتاۋ شەگى 11-13 شىلدە ارالىعىندا ءحۇي دولوون حۋداگ وڭىرىندە وتەتىن دۇنيەجۇزىلىك جىلقى كۇنىنە ارنالعان ءىس-شارالار بولماق. بۇل كۇن موڭعوليا پرەزيدەنتىنىڭ باستاماسىمەن بىرىككەن ۇلتتار ۇيىمىنىڭ قولداۋىمەن بەكىتىلگەن. ونىڭ ماقساتى – جىلقى شارۋاشىلىعى مادەنيەتىن، كوشپەلى ءومىر سالتىن جانە موڭعول حالقىنىڭ داستۇرلەرىن ساقتاۋ، سونداي-اق جىلقىعا قاتىستى باي مادەني مۇرانى حالىقارالىق دەڭگەيدە ناسيحاتتاۋ.
