25 قازان - رەسپۋبليكا كۇنى مەملەكەت بويىنشا اتالىپ ءوتتى. الايدا تۇڭعىش پرەزيدەنت نۇرسۇلتان نازارباەۆ بوي كورسەتىپ، حالىقتى مەرەكەمەن قۇتتىقتامادى.
دەگەنمەن، مەملەكەتتىك ناگرادالار مەن سىيلىقتار تاپسىرۋعا ارنالعان سالتاناتتى ءراسىم كەزىندە توقاەۆ نازارباەۆتىڭ “تاريحي ءرولى” جايلى ايتا كەتتى.
ءبىز تاريحي ادىلدىك جولىن بەرىك ۇستانۋىمىز كەرەك. وسى ورايدا تۇڭعىش پرەزيدەنت نۇرسۇلتان نازارباەۆتىڭ تاريحي ءرولىن اتاپ وتكەن ءجون. سەبەبى ول ەلىمىزدىڭ تاۋەلسىز مەملەكەت اتانىپ، تۇعىرىن بەكەمدەۋگە وراسان زور ەڭبەك ءسىڭىردى، دەگەن ەدى مەملەكەت باسشىسى.
تۇڭعىش پرەزيدەنتتىڭ سايتىنان نازارباەۆتىڭ قۇتتىقتاۋ ءسوزىن ىزدەدىك. الايدا، سوڭعى جازبا 11 ماۋسىم كۇنى جاريالانعان. ەل كوزىنە ول سوڭعى اباي وبلىسىنداعى ورتتەن قازا تاپقان ورمان شارۋاشىلىعى قىزمەتكەرلەرىنىڭ وتباسىنا كوڭىل بىلدىرگەندە شىققان.
ايتا كەتەيىك، سوڭعى كەزدە نازارباەۆقا قاتىستى اتاۋلار قىسقارىپ جاتىر.
اقپان ايى قاسىم-جومارت توقاەۆ «قازاقستان رەسپۋبليكاسىنىڭ تۇڭعىش پرەزيدەنتى – ەلباسى تۋرالى» قازاقستان رەسپۋبليكاسى كونستيتۋتسيالىق زاڭىنىڭ كۇشi جويىلدى دەپ تانۋ تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا قول قويدى. ءبىر سوزبەن ايتقاندا، ەلباسى تۋرالى زاڭنىڭ رەسمي تۇردە كۇشى جويىلدى.كونستيتۋتسيالىق رەفورما كەزىندە وسى تيتۋل نەگىزگە زاڭنان دا الىنىپ تاستاعان.
ەلباسى تۋرالى زاڭ كۇشىن جويعاننان كەيىن نازارباەۆتىڭ سايتى ءوز ادرەسىن وزگەرتتى. قازاقستاننىڭ ەكس-پرەزيدەنتى نۇرسۇلتان نازارباەۆتىڭ سايتى وسى كەزگە دەيىن elbasy.kz اتالىپ كەلسە، كەيىننەن nazarbayev.kz دەگەن دومەنگە يە بولدى.
4 شىلدە كۇنى مەملەكەت باسشىسى بۇرىنعى پرەزيدەنتكە قاتىستى جاڭا زاڭعا قول قويدى. زاڭدا نازارباەۆتى ءوز اتىنداعى وقۋ ورىندارى قامقورشىلىق كەڭەسىنىڭ باسشىسى مارتەبەسىنەن ايىرۋ قاراستىرىلعان ەدى.
ال 2 كۇن بۇرىن نازارباەۆ كىتاپحاناسىنان دا ايىرىلعان ەدى. استاناداعى تۇڭعىش پرەزيدەنتتىڭ اتىنا بەرىلگەن نازارباەۆ كىتاپحاناسى ەندى ورتالىق رەتىندە جۇمىس ىستەيدى.
الايدا وبلىس ورتالىقتارىنداعى باستى كوشەلەر مەن ءانۇراندا ءالى اتى بار.
سونداي-اق، 1 جەلتوقسان تۇڭعىش پرەزيدەنت كۇنى رەتىندە قالدى. بىراق ءوزى باردا قىزىل كۇن بولىپ، دۇركىرەپ تويلاناتىن مەرەكە - قازىر جاي اتاۋلى كۇنگە اينالدى.
