جاكىشەۆ بۇگىن بوساي ما؟

206

بۇگىن وسكەمەندەگى شىعىس قازاقستان وبلىستىق سوتىندا تۇرمەدە وتىرعان "قازاتومونەركاسىپ" كومپانياسىنىڭ بۇرىنعى جەتەكشىسى مۇحتار جاكىشەۆتىڭ اپەللياتسيالىق شاعىمىن قاراي باستادى. سوتتا ادۆوكات نۇرلان بەيسەكەەۆ بارلىق سۋدياعا سەنىمسىزدىك تانىتتى.

ادۆوكات سۋديادان وتىرىسقا مۇحتار جاكىشەۆتىڭ قاتىسۋىن قامتاماسىز ەتۋدى تالاپ ەتتى. بىراق سۋديا جاكىشەۆتى ۆيدەوكونفەرەنتسيامەن قوسۋعا "تەحنيكالىق مۇمكىندىك جوعىن" ايتتى. وسىدان كەيىن ادۆوكات سوتتى كەيىنگە قالدىرۋدى تالاپ ەتتى. بىراق سۋديا ادۆوكات شاعىمىن قاناعاتتاندىرمادى. بەيسەكەەۆ شىعىس قازاقستان وبلىستىق سوتىنىڭ بارلىق سۋدياسىنا سەنىمسىزدىك تانىتتى.

24 شىلدە كۇنى سەمەي قالاسىنىڭ №2 سوتى تۇرمەدە وتىرعانىنا 10 جىلدان اسقان 56 جاستاعى مۇحتار جاكىشەۆتىڭ مەرزىمىنەن بۇرىن شارتتى بوستاندىققا شىعارۋ تۋرالى ءوتىنىشىن قاناعاتتاندىرۋدان باس تارتقانكەيىن ول اپەللياتسيالىق شاعىم بەرگەن.

10 قىركۇيەكتە وسكەمەندە سوت اپەللياتسيالىق شاعىمدى قاراپ جاتقان ساتتە الماتىدا بەلسەندىلەر بيلىكتەن جاكىشەۆتى بوساتۋدى تالاپ ەتتى. مۇنداي شارالار ەلدە ءبىر ايدان بەرى ءوتىپ كەلەدى.

Freedom House حالىقارالىق قۇقىق قورعاۋ ۇيىمى دا مالىمدەمە جاساپ، قازاقستان بيلىگىنەن جاكىشەۆتى دەرەۋ بوساتۋدى سۇراعان.

مۇحتار جاكىشەۆ "ۆەنادا (اۆستريا) "قازاتومونەركاسىپ" كومپانياسىنىڭ زاڭسىز وكىلدىگىن اشۋ ارقىلى پايدا تاپتى، استىرتىن كاسسا ۇستادى، كۇزەتشىسىنە قوسىمشا ەڭبەكاقى تولەپ كەلگەن" دەگەن ايىپپەن 14 جىلعا سوتتالعان. تۇرمەدە وتىرعان كەزدە ءۇشىنشى توپ مۇگەدەكتىگىن العان جاكىشەۆ وزىنە تاعىلعان ايىپتارمەن كەلىسپەيدى.

قازاقستاندا بىرنەشە ايدان بەرى بيلىكتەن مۇحتار جاكىشەۆتى بوساتۋدى تالاپ ەتكەن پيكەتتەر مەن نارازىلىق شارالارى ءوتىپ كەلەدى. قازاقستانداعى قۇقىق قورعاۋشىلار جاكىشەۆتى "ساياسي تۇتقىندار" تىزىمىنە قوسقان.

"ازاتتىق" راديوسى

پىكىرلەر