قر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگ بارىسىندا شقو اكىمى دانيال احمەتوۆ اۋىل ءومىرىن جانداندىرىپ، شەكارا ماڭىندا ورنالاسقان اۋىلدارداعى ماسەلەلەر مەن تۇرعىندار سانىنىڭ ازايۋىن شەشۋگە باسا نازار اۋدارۋ قاجەتتىگىن اتاپ ءوتتى.
اعىمداعى جىلى ءتورتىنشى دەڭگەيلى بيۋدجەتكە كوشكەن اۋدان ورتالىقتارى مەن 100 اۋىلدىق وكرۋگتە اۋقىمدى اباتتاندىرۋ جۇمىستارى جۇرگىزىلدى. وسى ماقساتتا 4,2 ملرد تەڭگە ءبولىندى. وعان اۋلالاردى كوركەيتۋ، ساياباقتار مەن دەمالىس ورىندارىن، سونداي-اق بالالارعا ارنالعان ويىن الاڭدارى مەن سپورت الاڭدارى سالىندى.
سونىمەن قاتار "اۋىل - ەل بەسىگى" باعدارلاماسىنىڭ اياسىندا 4 تىرەك ەلدى مەكەن گلۋبوكوە، كوكپەكتى، كۇرشىم، ءۇرجار اۋىلدارىندا جالپى سوماسى 3,5 ملرد تەڭگەنى (ونىڭ ىشىندە 1,9 ملرد تەڭگە رەسپۋبليكالىق بيۋدجەت ەسەبىنەن) قۇرايتىن 8 جوبا جۇزەگە اسىرىلۋدا.
كۇرشىم مەن ءۇرجار اۋىلدارىنداعى كوشەلەرگە ورتاشا جوندەۋ جۇمىستارى جۇرگىزىلىپ، جابىق باسسەيندەر سالىنۋدا. گلۋبوكوە كەنتىندە مادەنيەت ءۇيىنىڭ قۇرىلىسى جۇرگىزىلۋدە. ال كوكپەكتى اۋىلىندا دەنە شىنىقتىرۋ جانە ساۋىقتىرۋ كەشەنى سالىنۋدا. وسىلايشا، 26,5 مىڭ تۇرعىن جاڭادان بوي كوتەرەتىن عيماراتتارمەن قامتاماسىز ەتىلمەك.
2026 جىلعا دەيىن وڭىردەگى 116 تىرەك اۋىلدا اۋقىمدى جۇمىستار جۇرگىزىلەدى. اۋىلداردى كوركەيتۋگە كاسىپورىندار مەن بيزنەسمەندەر دە ۇلەس قوسۋدا. "تۋعان جەر" باعدارلاماسى اياسىندا قۇنى 1,7 ملرد تەڭگەنى قۇرايتىن 258 الەۋمەتتىك جوبا ىسكە اسىرىلۋدا. ونىڭ ىشىندە 162-ءسى "الەۋمەتتىك كارتالار باستاماسى" اتتى رەسپۋبليكالىق ينتەراكتيۆتى پلاتفورماسىنا وزگەرىستەر ەنگىزبەك. وسى ماقساتتا 230 كوپبالالى وتباسىعا 558,5 ملن تەڭگە; وبلىس ورتالىعىنداعى مەندەلەەۆ كوشەسىن قايتا جاراقتاۋعا 260 ملن تەڭگە; كۋرچاتوۆتاعى جابىق باسسەيندى سالۋعا 117 ملن تەڭگە; تارباعاتاي اۋدانى، اقجار اۋىلىنداعى ساياباق قۇرىلىسىنا 20 ملن تەڭگە; سەمەيدەگى فۋتبول الاڭىن سالۋعا 15 ملن تەڭگە جۇمسالادى. ايماق باسشىسىنىڭ ايتۋىنشا، قازىرگى كۇنى "رۋحاني جاڭعىرۋ" باعدارلاماسىنىڭ "اۋىل - ەل بەسىگى" اتتى ارنايى جوباسى اياسىندا كۇرشىم، تارباعاتاي، كاتونقاراعاي، زايسان، ءۇرجار سياقتى شەكارالىق اۋدانداردا بەس جىلدىق باعدارلاما ازىرلەنۋدە. جوسپارعا سايكەس اۋىل شارۋاشىلىعىنداعى ينفراقۇرىلىم دامىپ، ءبىلىم بەرۋ مەن دەنساۋلىق ساقتاۋ، كاسىپكەرلىك سالالارى وركەندەپ، جاڭا جۇمىس ورىندارى اشىلادى.
وسى ماقساتتا ەڭ الدىمەن اۋىلدارداعى الەۋمەتتىك ورتانى دامىتۋ ماقساتىندا "اۋىل - ەل بەسىگى" باعدارلاماسى اياسىندا ءتيىستى جۇمىستار اتقارىلۋدا.
«ادىرنا» پورتالى
