وزبەكستاننىڭ تۇڭعىش پرەزيدەنتى يسلام كاريموۆتىڭ قىزىنىڭ قاماۋعا الىنعانىنا 10 جىلدان استى. سوت ۇكىمىنەن كەيىن تۇرمەدە جازاسىن وتەپ جاتقانىنا 9 جىلعا جۋىقتادى. تۇرمەدە قوزعالعان تاعى ءبىر ءىس بويىنشا ول ۇزاق مەرزىمگە سوتتالعالى بىرنەشە جىل بولدى. سوڭعى جازاسىن وتەۋ مەرزىمى 2033 جىلى اياقتالادى. تۇرمەدەگى گۇلنارا كاريموۆا قازىر جازاسىن قالاي وتەپ جاتىر؟
وزبەكستاننىڭ تۇڭعىش پرەزيدەنتىنىڭ قىزى 52 جاستاعى گۇلنارا كاريموۆا العاش 2013 جىلى قاماۋعا الىنىپ، قازىر تاشكەنت وبلىسىنىڭ زاڭگى-اتا اۋدانىنداعى ايەلدەر كولونياسىندا جازاسىن وتەۋدە. ول مەكەمە باسشىلىعى ءۇشىن "باس اۋرۋىنا" اينالدى، دەپ حابارلايدى وزودليققا سىلتەمە جاساپ «گولوس نارودا».
2015 جىلى 18 جەلتوقساندا گۇلنارا كاريموۆانى تاشكەنت قالالىق سوتى – 10 جىلعا، ال 2020 جىلى 18 ناۋرىزدا جاڭا قىلمىستىق ءىس شەڭبەرىندە 13 جىلعا باس بوستاندىعىنان ايىردى. وعان قاستاندىق، بوپسالاۋ، جىمقىرۋ جانە توناۋ قىلمىستارىن جاسادى دەپ ايىپ تاعىلدى.
«ول ءوزىن جامان سەزىنبەيدى»
VIP-تۇتقىن گۇلنارا كاريموۆانىڭ تۇرمەدەگى بۇلىگى تۋرالى باق-تىڭ حابارلامالارىنا تۇسىنىكتەمە بەرە وتىرىپ، مەكەمە وكىلى انونيمدىك شارتتارمەن باسىلىممەن سۇحباتتاسقان. وزبەكستانداعى جالعىز ايەلدەر تۇرمەسى – زاڭگى-اتا اۋدانىنداعى №21 كولونيا قىزمەتكەرى "مەكەمە باسشىلارى گۇلنارا كاريموۆانىڭ مىنەز-قۇلقى مەن باسقا تۇتقىندارعا قاتىستى ارانداتۋشىلىقتارى تۋرالى جوعارى باسشىلىققا بىرنەشە رەت جۇگىنۋگە ءماجبۇر بولدى" دەيدى.
تاشكەنت وبلىسىنىڭ زاڭگى-اتا اۋدانىنداعى ايەلدەر كولونياسىنىڭ بۇرىنعى تۇتقىندارىنىڭ ءبىرى بلوگەر كيريلل التمانعا بەرگەن سۇحباتىندا گۇلنارا كاريموۆانىڭ تۇرمەدە "بۇلىك شىعارعانى" تۋرالى ايتقان.
«ءبىر كۇنى بىلاي بولدى. ول جۇمىسقا شىعادى. سول كۇنى ول بۇلىك شىعارادى. سوندا ونى 2,5 ساعاتتاي تىڭداپ تۇرىپ قالادى. مۇمكىن ول ءوزىن قالاي سوتتاعانىن ايتقان شىعار. ونى بۇل جەرگە وتىرعىزباۋ كەرەك ەدى، بىراق قاماعاننان كەيىن، مەنىڭ ويىمشا، رەجيمدى ازداپ ساقتاعانى دۇرىس بولار ەدى. بىراق ول ونى ورىندامايدى»، - دەيدى بۇرىنعى تۇتقىن.
ايەلدەر كولونياسىندا جازاسىن وتەگەن بۇرىنعى تۇتقىن التمانمەن اڭگىمەلەسۋ بارىسىندا گۇلنارا كاريموۆانىڭ نارازىلىق اكتسياسىنىڭ ۋاقىتى مەن كۇنىن ايتپادى. بۇرىنعى سوتتالۋشى بلوگەردىڭ سۇراقتارىنا جاۋاپ بەرە وتىرىپ، گۇلنارا كاريموۆا ءۇشىن تۇرمەدە VIP-شارتتار جاسالماعانىن، كەرىسىنشە، ول جالپى وتريادتا جازاسىن وتەپ جاتقانىن اتاپ ءوتتى.
«الايدا ونىڭ اينالاسىن جايمامەن قورشاپ تاستاعان ءتورت توسەگى بار. ول كادىمگى اسحانادان تاماق ىشپەيدى، وزىنە سىرتتان جەكە تاماق اكەلەدى. وعان كوپتەپ سالەمدەمە كەلەدى. ەشكىم جوق كەزدە الدەبىر كولىكتەر كەلىپ، ونىڭ كەرەگىن 5-10 كيلولاپ ەمەس، مولىنان اكەلىپ بەرەدى. ەگەر ول بىردەڭەنى قالاسا، وعان قول جەتكىزە الادى. بىردە ول ءبىر سوتتالۋشىنى كورگىسى كەلگەن. سونى باسقا وتريادتان شاقىرتىپ الدى. ءبىر سوزبەن ايتقاندا، ول ءوزىن جامان سەزىنبەيدى»، - دەيدى بۇرىنعى تۇتقىن. باسىلىم سويلەسكەن ايەلدەر كولونياسىنىڭ باسقا بۇرىنعى تۇتقىندارى دا جاعدايدى وسىلاي سيپاتتادى.
بەلگىسىز مالىمەتتەر جانە بۇلىكشىل تۇتقىن
2023 جىلدىڭ كۇزىندە گۇلنارا كاريموۆانىڭ ءۇي قاماعىنا الىنعانى تۋرالى بەيرەسمي اقپارات پايدا بولعان ەدى. مۇنداي دەرەكتىڭ تاراۋىنا قىزى يماننىڭ ۇلىبريتانيادان وزبەكستانعا ءجيى كەلۋى سەبەپ بولدى.
كەزىندە دەرەككوزدەر گۇلنارا كاريموۆا ۋاقىتىنىڭ كوپ بولىگىن ۇيدە وتكىزەتىنىن جانە قاجەت بولعان جاعدايدا عانا تۇرمەگە كەلەتىنىن مالىمدەگەن. الايدا بۇل حابار رەسمي راستالعان جوق.
جۋرناليسپەن سويلەسكەندە اتى-ءجونىن اتاعىسى كەلمەگەن №21 ايەلدەر كولونياسى قىزمەتكەرىنىڭ ايتۋىنشا، گۇلنارا كاريموۆانىڭ ماسەلەسى وسى مەكەمە اكىمشىلىگى ءۇشىن ناعىز باس اۋرۋىنا اينالعان. الايدا، سۇحباتتاسۋشى گۇلنارا كاريموۆانىڭ ءۇي قاماعىنا الىنعاندىعى تۋرالى حابارلاماعا جاۋاپ بەرگەن جوق.
ايەلدەر كولونياسى قىزمەتكەرىنىڭ ايتۋىنشا، گۇلنارا كاريموۆانىڭ تۋىستارىمەن كەزدەسۋىندە ەشقانداي ارتىقشىلىق جوق. وعان زاڭدى تۇردە تۋىستارىمەن كەزدەسۋگە رۇقسات ەتىلگەن. بىراق كەزدەسۋ ۋاقىتىندا ونى كورۋگە ەشكىم كەلمەگەن.
"مەكەمە باسشىلارى گۇلنارا كاريموۆانىڭ مىنەز-قۇلقى مەن باسقا تۇتقىندارعا قاتىستى ارانداتۋشىلىقتارى تۋرالى بىرنەشە رەت جوعارى باسشىلىققا جۇگىنۋگە ءماجبۇر بولدى. بىزگە، جەدەل قىزمەتكەرلەرگە، ونى ۇستاۋدا ساق بولۋدى تاپسىردى. سونداي-اق، "وعان ەرەكشە قاراماۋ" كەرەكتىگى دە ەسكەرتىلدى»، - دەيدى زاڭگى-اتاداعى ايەلدەر كولونياسىنىڭ قىزمەتكەرى.
باسقا دا دەرەككوزدەر وزبەكستاننىڭ تۇڭعىش پرەزيدەنتى يسلام كاريموۆتىڭ قىزى تۇرمەدە ءجيى نارازىلىق اكتسيالارىن وتكىزەتىنى تۋرالى اقپاراتتى راستادى. سوندايدا مەكەمە باسشىلارى بىرنەشە رەت جازانى ورىنداۋ دەپارتامەنتىنە جانە ارنايى پروكۋراتۋراعا جۇگىنۋگە ءماجبۇر بولعان.
وزبەكستاننىڭ قىلمىستىق-اتقارۋ كودەكسىنىڭ تالاپتارىنا سايكەس، قازىرگى ۋاقىتتا گۇلنارا كاريموۆانى باسقا كولونياعا اۋىستىرۋ نەمەسە شارتتى تۇردە مەرزىمىنەن بۇرىن بوساتۋ مەرزىمدەرى ءوتىپ كەتتى.
مالىمەتتەرگە قاراعاندا، گۇلنارا كاريموۆا مەملەكەت پەن ازاماتتاردىڭ مۇددەلەرىنە 1 ترلن 270 ملرد 200 ملن سومدى، 1 ملرد 651,8 ملن اقش دوللارىن، 26,1 ملن ەۋرونى قۇرايتىن زالال كەلتىرگەن. ول 2019 جىلدىڭ كوكتەمىنەن باستاپ تاشكەنت وبلىسىنىڭ زاڭگى-اتا اۋدانىنداعى №21 ايەلدەر كولونياسىندا جازاسىن وتەپ جاتىر.
