فوتو: AFP 2024 / JEAN-SEBASTIEN EVRARD
تۇركيا، ازەربايجان، بولگاريا جانە گرۋزيا قارا تەڭىزدىڭ تۇبىمەن سۋاستى ەلەكتر جەتكىزۋ جەلىسىن تارتۋ جوباسىن تالقىلاپ جاتىر. بۇل تۋرالى تۇركيانىڭ ەنەرگەتيكا جانە تابيعي رەسۋرستار ءمينيسترى الپارسلان بايراكتار مالىمدەدى، دەپ “ادىرنا” ۇلتتىق پورتالى Anadolu Ajansı باسىلىمىنا سىلتەمە جاساپ حابارلايدى.
مينيستر تۇركيا، ازەربايجان، بولگاريا جانە گرۋزيا ۇكىمەتتەرى اراسىندا تازا ەنەرگەتيكا سالاسىنداعى ستراتەگيالىق ارىپتەستىك تۋرالى كەلىسىمگە قول قويىلۋىنا قاتىستى پىكىر ءبىلدىردى.
ونىڭ ايتۋىنشا، قول قويىلعان قۇجات اياسىندا گرۋزيا، ازەربايجان جانە بولگاريامەن بىرلەسىپ اۋقىمدى «جاسىل ەنەرگەتيكالىق ءدالىز» قۇرۋ جوسپارلانىپ وتىر. سونىمەن قاتار اتالعان ەلدەرمەن جانە رۋمىنيامەن قارا تەڭىزدىڭ ءتۇبى ارقىلى ەلەكتر جەتكىزۋ جەلىسىن سالۋ ماسەلەسى دە تالقىلانۋدا.
«بىزگە ەلەكتر ەنەرگياسىنىڭ ۇلكەن كولەمىن شىعىستان باتىسقا، سولتۇستىكتەن وڭتۇستىككە جەتكىزۋدى قامتاماسىز ەتۋ قاجەت»، – دەدى الپارسلان بايراكتار.
مينيستر تۇركيانىڭ ەنەرگەتيكالىق ينتەگراتسياعا باعىتتالعان ءىرى جوبالار بويىنشا باسقا دا بىرقاتار مەملەكەتپەن كەلىسسوز جۇرگىزىپ جاتقانىن اتاپ ءوتتى.
سونداي-اق انكارا COP31 حالىقارالىق كليماتتىق كونفەرەنتسياسىن وسى باستامالاردى الەمدىك دەڭگەيدە ىلگەرىلەتۋ جانە ناقتى جوبالاردى جۇزەگە اسىرۋ ءۇشىن پايدالانۋدى كوزدەپ وتىر.
«بۇگىن وسى كەلىسىمگە قول قويۋ ارقىلى ءبىز وسى باعىتتاعى مىندەتتەمەلەرىمىزدىڭ ءبىرىن ورىندادىق. بۇل جوبالار تۇركيانىڭ 2040 جىلعا دەيىنگى ەنەرگەتيكالىق ستراتەگياسى مەن ەلەكترلەندىرۋ ماقساتتارى اياسىندا قانداي ناقتى قادامدار جاساپ جاتقانىن، سونداي-اق جاھاندىق ەنەرگەتيكالىق كوشۋگە قالاي ۇلەس قوساتىنىن كورسەتەدى»، – دەدى مينيستر.
سونىمەن بىرگە بايراكتار ەنەرگەتيكالىق ترانسفورماتسيانى جۇزەگە اسىرۋ ءۇشىن شامامەن 300 ملرد اقش دوللارى كولەمىندە ينۆەستيتسيا قاجەت بولاتىنىن ايتتى.
ونىڭ سوزىنشە، بۇل قاراجات الداعى 14–15 جىل ىشىندە تارتىلۋى ءتيىس. وسىعان بايلانىستى دۇنيەجۇزىلىك بانك، حالىقارالىق قارجى كورپوراتسياسى (IFC), ەۋروپالىق قايتا قۇرۋ جانە دامۋ بانكى سياقتى حالىقارالىق قارجى ينستيتۋتتارىنىڭ قولداۋى ماڭىزدى.
بۇدان بولەك، تۇركياعا تىكەلەي شەتەلدىك ينۆەستيتسيا تارتۋ قاجەتتىگى دە ايتىلدى.
مينيستر تۇركياعا ينۆەستيتسيا سالۋدى جوسپارلاپ وتىرعان كومپانيالارعا ەلدىڭ الەۋەتى جوعارى ءارى قارقىندى دامىپ كەلە جاتقان نارىق ەكەنىن جەتكىزدى. ونىڭ ايتۋىنشا، ەل حالقىنىڭ سانى ءوسىپ، ۋربانيزاتسيا ۇدەرىسى جالعاسۋدا، ەكونوميكا دامىپ، ەكسپورت كولەمى ارتىپ كەلەدى.
ايتا كەتەيىك، بۇعان دەيىن گرۋزيانىڭ ۆيتسە-پرەمەرى، ەكونوميكا جانە تۇراقتى دامۋ ءمينيسترى ماريام كۆريۆيشۆيلي مۇنداي ەنەرگەتيكالىق ىنتىماقتاستىق ايماقتىڭ ەنەرگەتيكا سالاسىن دامىتۋعا جانە ەۋروپالىق وداق ەلدەرىنە ەلەكتر ەنەرگياسىن جەتكىزۋ كولەمىن ارتتىرۋعا جاڭا مۇمكىندىكتەر اشاتىنىن مالىمدەگەن بولاتىن.
