الماتىدا ەر ادامنىڭ كۇزەتشىنى بىرنەشە مارتە كولىكپەن جانشىپ, اياۋسىزدىقپەن ولتىرگەن بەينەسى تاراپ، قازنەتتى شۋلاتتى. جەلى قولدانۋشىلاردىڭ جاپپاي دەرلىك كۇدىكتىنى ايىپتاپ وتىر. كوپ ۇزاماي ونىڭ كىم بولعاندىعى دا جاريالانا باستادى.
بۇل وقيعا تۇنگى ۋاقىتتا بولعان.
الماتىداعى «مەركۋر تاۋن» تۇرعىن ءۇي كەشەنىندەبولعان وقيعادان سوڭ 42 جاستاعى ازامات قازا تاپتى. مارقۇمنىڭ ارتىندا 3 بالاسى قالعان.
پوليتسيا مالىمەتىنشە «كىسى ءولتىردى» دەگەن كۇدىكپەن 45 جاستاعى ازامات ۇستالعان.
ال جەرگىلىكتى تۇرعىندار ازاماتتىڭ بىرنەشە جىلدار بويى اتا-اناسىمەن بىرگە «مەركۋر تاۋن» تۇرعىن ءۇي كەشەنىندە تۇراتىنىن ايتادى.
«اراشالاماي ما?»
كۋاگەرلەردىڭ ايتۋىنشا، وقىس وقيعا الماتىداعى «مەركۋر تاۋن» تۇرعىن ءۇي كەشەنىندە ناۋرىزدىڭ 28-ىنەن 29-ىنا اۋعان ءتۇنى بولعان. تارالعان ۆيدەو-مالىمەتتەردىڭ بىرىندە، ەگەر ۋاقىتى دۇرىس كورسەتىلسە، وقيعا تۇنگى 2:30 شاماسىندا بولعانعا ۇقسايدى.
كۇدىكتىنىڭ دە ۇزاق جىلدار بويى اتا-اناسىمەن بىرگە وسى تۇرعىن ءۇي كەشەنىندە تۇراتىنى ايتىلادى. وقيعانى تۇرعىن ءۇي كەشەنى تۇرعىندارى ۆيدەوعا دا تۇسىرگەن. تاراعان ۆيدەولاردا كۇدىكتىنىڭ كۇزەتشىنى بىرنەشە مارتە كروسسوۆەر كولىكپەن جانشىپ، ول قانسىراپ جاتقاندا اياق-قولمەن تاعى دا ۇرىپ، سوڭىنان كولىكتى تۇراققا قويعانى تۇسىرىلگەن. وقيعانىڭ باسىندا كۇزەتشىءنىڭ شلاگباۋمدى جاپقانى بايقالادى.
كادرلاردا ەر ادامنىڭ جەردە جاتقان ەس-ءتۇسسىز كۇزەتشىنى ۇرىپ-سوعىپ جاتقانى انىق كورىنەدى. وقيعا كەزىندە تۇرعىنداردىڭ ايقايلاپ اراشا شاقىرعانى بايقالادى، الايدا ەشكىم جەكە بارىپ ارا تۇسپەگەن. ۆيدەودا جابىرلەنۋشىنىڭ قانسىراپ قينالىپ جاتقان داۋسى دا ەستىلەدى.
جەلىنى شۋلاتقان سۇمدىق ۆيدەودا كۇدىكتى كۇزەتشىنى بىرنەشە مارتە كولىگىمەن جانىشتاپ، ارتىنشا شالاجانسار ادامدى تاعى دا اياۋسىز ۇرىپ، باسىنا سەكىرگەن. وقيعاعا كۋا بولعاندار كۇدىكتى مەن كۇزەتشىنىڭ اراسىنداعى قاقتىعىسقا اراشا بولماعان.
وقيعاسىنىڭ ۆيدەوسى تاراعان سوڭ جەلى قولدانۋشىلارى ونى قىزۋ تالقىلادى.
«اراشالاماي ما؟ قءازىر ادامدار ءولىپ جاتساڭ دا,قۇلاپ جاتساڭ دا, كومەك سۇراساڭ دا قاشادى.باسىمىزعا بالە جابادى دەپ كومەكتەسپەيدى»، - دەپ جازدى «رىسحان» اككاۋنتىمەن تىركەلگەن جەلى قولدانۋشىسى.
Facebook جانە Telegram جەلىلەرىندەگى اقپاراتتا كۇدىكتىنى «شەنەۋنىكتىڭ ۇلى» دەپ تانۋدا.
«الماتىدا بولعان جاعداي. وتكەن تۇندە قالاداعى داۋلەتتى كونتينگەنت تۇراتىن ۇيلەردىڭ بىرىندە كۇزەتشى كىسى قولىنان قازا تاپقان. كۇزەتشىنى اۋەلى كولىكپەن سوعىپ قۇلاتىپ، كەيىن سوققىعا جىققان ۆيدەوداعى ادام ۇستالعان. ءۇي تۇرعىندارىنىڭ ايتۋى بويىنشا 1979 جىلى تۋعان جەكە كاسىپكەر. اتى-ءجونىنە قاراساق, اۋەلى پروكۋرور كومەكشىسى, كەيىن دەپۋتات بولعان كىسىنىڭ بالاسى بولۋى ابدەن مۇمكىن! كۇزەتشى بالنىستە قازا تاپقان. بۇدان باسقا دا بىرنەشە ۆيدەوسى ءجۇر: اسقان ايۋاندىقپەن تەپكىلەگەن، ودان ءتىرى قالۋ مۇمكىن ەمەس ەدى...»، - دەپ جازدى جۋرناليست الماس التاي.
«بۇرىن ديسپەتچەر قىزدى ۇرعان»
دياس نۇراقىن جەلىدەگى جازباسىندا كۇدىكتىنىڭ تاعى بىرنەشە بۇزاقىلىعىن اشكەرەلەدى.
«قازىر قاماۋدا. جاسى شامامەن 45-تە ەكەن. اتى-ءجونى – اسحات تاستانديەۆ. بۇل مالىمەتتەردى وسى ۇيدە تۇراتىن تۇرعىندار جىبەردى. باسبۇزار بۇعان دەيىن دە وسى ۇيدەگى لەنا دەگەن ديسپەتچەر قىزدى ۇرىپ تاستاعان. ءتىپتى بىرنەشە رەت ناركولوگياعا جاتىپ شىققان دەيدى تانيتىندار. ءبىر سوزبەن ايتقاندا بايدىڭ ەركە بالاسى. ويتكەنى ەڭ قىمبات سانالاتىن "سامال" ىقشاماۋدانىنان اناۋ-مىناۋ پاتەر ساتىپ الا المايدى. ال، كىسى قولىنان ولگەن كۇزەتشى نەبارى 42 جاستا ەكەن. ارتىندا ءۇش بالاسى قالىپتى. مارقۇمنىڭ جاقىندارىنا سابىر تىلەيمىن! قاندىقول، قانىپەزەرلەر قاتاڭ جازالانۋى ءتيىس»، - دەلىنگەن Facebook جەلىسىندەگى جازبادا.
جەلىدە كۇدىكتىنىڭ اكەسى رەتىندە اتالىپ جۇرگەن سىلامعازى تاستانديەۆتىڭ 1948 جىلى تۋعانى، توقسانىنشى جىلدارعى جوعارعى كەڭەستىڭ ءحىىى شاقىرىلىمىنىڭ دەپۋتاتى بولعانى ايتىلادى. بۇرىنعى تالدىقورعان وبلىستىق پروكۋرورىنىڭ باس كومەكشىسى بولعان سياقتى.
«جازاسىن جەڭىلدەتۋ» جولىنداعى تالپىنىس
كۇدىككە ىلىنگەن ازاماتتىڭ وسى ارەكەتتەن سوڭ بيىكتەن سەكىرمەك بولعاندىعى ايتىلادى. كۇزەتشىنى اياۋسىزدىقپەن سوققىعا جىققان بەينەنىڭ ارتىنشا كۇدىكتىنىڭ 14 قاباتتان سەكىرۋگە «نيەتتەنگەن» دەگەنۆيدەوسى دا تارادى. بىراق ۆيدەودا كۇدىكتىنىڭ ءوزى مە، باسقا ما جانە ۆيدەونىڭ قاشان تۇسىرىلگەنى بەلگىسءىز.
باق-تا كۇدىكتىنىڭ ناشاقورلىققا سالىنۋى ءمۇمكىن ەكەنى جايلى دا مالىمەت بار. ال جەلى قولدانۋشىلارى كۇدىكتىنىڭ بۇل ارەكەتىن «جازاسىن جەڭىلدەتۋ» جولىنداعى تالپىنىس دەپ ەسەپتەيدى.
«سەكىرەتىن بولسا ويلانىپ وتىرماي سەكىرىپ كەتەر ەدى. بۇل ونىڭ ءوزىن اقتاپ الۋ ءۇشىن جاساعان ارەكەتى.ەرتەڭ سوتتا "مەن ىستەگەن ىسىمە وكىنەمىن، كۇيزەلىستە ءجۇردىم"-دەپ جازاسىن جەڭىلدەتۋ ءۇشىن جاساعانى عوي»، - دەگەن سارىندا پىكىرلەر كوپتەپ جازىلعان.
قازىر الماتى قالالىق پوليتسيا دەپارتامەنتى ادام ءولتىرۋ دەرەگى بويىنشا قىلمىستىق ءىس قوزعالعانىن مالىمدەدى. «الدىن الا مالىمەت بويىنشا، كۇزەتشى مەن تۇرعىن ءۇي كەشەنىنىڭ تۇرعىنى اراسىندا جانجال تۋىنداپ، ناتيجەسىندە 45 جاستاعى ەر ادام كۇزەتشىنىڭ ومىرىنە سايكەس كەلمەيتىن دەنە جاراقاتىن جاساعان. كۇدىكتى ۇستالىپ، ۋاقىتشا ۇستاۋ يزولياتورىنا قاماۋعا الىندى»،— دەلىنگەن حابارلامادا.
ال جەلى وقىرماندارى پوليتسيا مالىمدەمەسىمەن دە كەلىسپەي، قارسىلىق تانىتۋدا.
«وسىلاي جۇرە بەرەتىن بولساق, بايلار كەدەيلەردى قالاي بولسا سولاي ءولتىرىپ، تاپتاپ جۇرە بەرەتىن بولادى. سوت جۇيەسىنە وزگەرتۋلەر ەنگىزۋ كەرەك. مىنا جەردە تاعايىندالعان بابىنىڭ ءوزى كورسەتىپ تۇر عوي جازالانبايتىنىن. قايداعى "دەنە جاراقاتى", بۇل جەردە "قاساقانا ادام ءولتىرۋ" بابى بولىپ تۇر عوي» دەلىنگەن پىكىرلەردىڭ ءبىرىندە.
سىمبات ناۋحان
«ادىرنا» ۇلتتىق پورتالى
