اقش بيلىگىنىڭ يراننىڭ اسكەري تۇرعىدان جەڭىلدى دەگەن رەسمي مالىمدەمەلەرى امەريكالىق بارلاۋ قىزمەتىنىڭ دەرەكتەرىمەن سايكەس كەلمەيدى. بارلاۋ مالىمەتتەرىنە سۇيەنسەك، يسلام رەسپۋبليكاسى ەل اۋماعىنداعى ءموبيلدى ۇشىرۋ قوندىرعىلارىنىڭ شامامەن 70%-ىنا ءالى دە يەلىك ەتىپ وتىر جانە سوعىسقا دەيىنگى زىمىران ارسەنالىنىڭ شامامەن 70%-ىن ساقتاپ قالعان. بۇل تۋرالى The New York Times جازدى، دەپ حابارلايدى «ادىرنا» ءتىلشىسى.
اتالعان ارسەنالعا وڭىردەگى باسقا ەلدەرگە سوققى بەرە الاتىن بالليستيكالىق زىمىراندار دا، سونداي-اق قىسقا قاشىقتىقتاعى جەرۇستى جانە تەڭىز نىساندارىنا قولدانىلاتىن ازداعان قاناتتى زىمىراندار دا كىرەدى.
«ەڭ الاڭداتاتىن جايتتاردىڭ ءبىرى — يراننىڭ ورمۇز بۇعازى بويىنا ورنالاستىرىلعان 33 زىمىران كەشەنىنىڭ 30-ىن قايتادان جاۋىنگەرلىك دايىندىققا كەلتىرگەنى تۋرالى دەرەكتەر. بۇل اقش اسكەري كەمەلەرى مەن مۇناي تانكەرلەرى ءۇشىن قاۋىپ ءتوندىرۋى مۇمكىن»،- دەلىنگەن حابارلاماپادا
اسكەري بارلاۋ مالىمەتتەرىندە يراننىڭ ەل اۋماعىنداعى جەر استى زىمىران قويمالارى مەن ۇشىرۋ قوندىرعىلارىنىڭ شامامەن 90%-ىنا قايتا قول جەتكىزگەنى ايتىلعان. قازىرگى باعالاۋ بويىنشا ولار ءىشىنارا نەمەسە تولىق جاۋىنگەرلىك دايىن كۇيدە تۇر.
وسىعان ۇقساس دەرەكتەردى وتكەن اپتادا The Washington Post باسىلىمى دا كەلتىرىپ، يراننىڭ ءموبيلدى ۇشىرۋ قوندىرعىلارىنىڭ شامامەن 75%-ىن جانە سوعىسقا دەيىنگى زىمىران ارسەنالىنىڭ 70%-ىن قالپىنا كەلتىرگەنىن حابارلاعان.
ايتا كەتەيىك، بۇل دەرەكتەر اقش پرەزيدەنتى دونالد ترامپ پەن قورعانىس ءمينيسترى پيت حەگسەتيراننىڭ اسكەري الەۋەتى «جويىلدى» نەمەسە «ەندى قاۋىپ توندىرمەيدى» دەگەن مالىمدەمەلەرىنە قايشى كەلەدى.
