قىرعىزستان مۇقك بۇرىنعى توراعاسى قامشىبەك تاشيەۆتىڭ ءىسى سوتقا جولداندى. بۇل تۋرالى ادۆوكات يكراميدين ايتقۇلوۆ ايتتى، دەپ حابارلايدى «ادىرنا» ءتىلشىسى.
ەلدىڭ باس پروكۋراتۋراسى ەكس-توراعاعا قاتىستى قىلمىستىق ءىس بويىنشا ايىپتاۋ اكتىسىن بەكىتكەن. ول بيلىكتى كۇشپەن باسىپ الۋعا دايىندالدى جانە قىزمەتتىك وكىلەتتىگىن اسىرا پايدالاندى دەپ ايىپتالۋدا.
ءىس پەرۆوماي اۋداندىق سوتىنىڭ قاراۋىنا جىبەرىلگەن.
«قىلمىستىق ءىس قۇپيالانعان. بۇل بارلىق سوت وتىرىسى جابىق فورماتتا وتەتىنىن بىلدىرەدى. تەرگەۋ مەن سوت ماتەريالدارىن جاريالاۋعا ەشكىمنىڭ قۇقىعى جوق»، – دەدى ادۆوكات.
تاشيەۆ توڭىرەگىندەگى ساياسي داعدارىس بيىلعى جىلدىڭ اقپان ايىندا قىرعىزستان پرەزيدەنتى سادىر جاپاروۆ اتىنا جولدانعان اشىق ۇندەۋدەن كەيىن باستالعان ەدى. وندا پرەزيدەنت سايلاۋىن 2027 جىلدىڭ قاڭتارىندا ەمەس، 2026 جىلى وتكىزۋ ۇسىنىلعان. حاتقا بۇرىنعى دەپۋتاتتار، مينيسترلەر، شەنەۋنىكتەر جانە قوعام قايراتكەرلەرىن قوسا العاندا 75 ادام قول قويعان.
كەلەسى كۇنى تاشيەۆ مينيسترلەر كابينەتى توراعاسىنىڭ ورىنباسارى جانە مۇقك توراعاسى قىزمەتىنەن بوساتىلدى. ول كەزدە گەرمانيادا بولعان.
وسىدان كەيىن بيلىك وكىلدەرى سادىر جاپاروۆ پەن قامشىبەك تاشيەۆ اراسىنا جىك سالۋ ارەكەتتەرى بولعانىن مالىمدەدى. پرەزيدەنتتىڭ ءباسپاسوز حاتشىسى اسحات الاگوزوۆ قىزمەتتەن بوساتۋ «بىرلىكتى ساقتاۋ ءۇشىن» قاجەت بولعانىن ايتقان.
كەيىن تاشيەۆتىڭ ءۇش ورىنباسارى دا قىزمەتتەرىنەن بوساتىلىپ، بىرنەشە بۇرىنعى جوعارى لاۋازىمدى شەنەۋنىك، ونىڭ ىشىندە ەكس-ىشكى ىستەر ءمينيسترى كۋرسان اسانوۆ ۇستالدى. ال سادىر جاپاروۆ مەرزىمىنەن بۇرىن سايلاۋ وتكىزۋ ناۋقانىن ۇيىمداستىرۋشىلار «حالىقتى شاتاستىرا باستادى» دەپ مالىمدەگەن بولاتىن.
