رەسەي «سارمات» قۇرلىقارالىق بالليستيكالىق زىمىرانىن سىناقتان ءساتتى وتكىزدى. بۇل تۋرالى ەلدىڭ ستراتەگيالىق ماقساتتاعى زىمىران اسكەرلەرىنىڭ قولباسشىسى سەرگەي كاراكاەۆايتتى، دەپ حابارلايدى «ادىرنا» ءتىلشىسى.
ول پرەزيدەنت ۆلاديمير پۋتين الدىندا جاساعان بايانداماسىندا «سارمات» نەگىزگى سيپاتتامالارى بويىنشا ءوزىنىڭ الدىنداعى «ۆوەۆودا» زىمىران كەشەنىنەن اسىپ تۇسەتىنىن مالىمدەدى. اتاپ ايتقاندا، ۇشۋ قاشىقتىعى، جۇك كوتەرگىشتىگى جانە زىمىرانعا قارسى قورعانىس جۇيەلەرىن ەڭسەرۋ مۇمكىندىگى جوعارى.
سونداي-اق كاراكاەۆ «سارمات» قۇرلىقارالىق بالليستيكالىق زىمىرانىنا ارنالعان ۇشىرۋ قوندىرعىلارى ستراتەگيالىق يادرولىق كۇشتەردىڭ الەۋەتىن ەداۋىر ارتتىراتىنىن جەتكىزدى. ودان بولەك، «سارمات» كەشەنىمەن قارۋلانعان العاشقى زىمىران پولكى 2026 جىلدىڭ سوڭىنا دەيىن جاۋىنگەرلىك كەزەكشىلىككە قويىلاتىنى ايتىلدى.
ازىرگە باتىستىڭ تاۋەلسىز دەرەككوزدەرى رەسەيلىك زىمىراننىڭ ۇشىرىلۋىنا قاتىستى پىكىر بىلدىرگەن جوق. سونداي-اق ونىڭ ۇشۋ تراەكتورياسى دا بەلگىسىز كۇيىندە قالىپ وتىر.
ايتا كەتەيىك، بۇل — جاڭا اۋىر بالليستيكالىق زىمىراننىڭ ەكىنشى ءساتتى سىناعى. العاشقى ۇشىرىلىم 2022 جىلى وتكەن بولاتىن. 2024 جىلى پلەسەتسك عارىش ايلاعى اۋماعىندا زىمىراندى ۇشىرۋ ارەكەتى كەزىندە اپات بولىپ، ۇشىرۋ شاحتاسى قيراعان ەدى.
جاريالانعان سيپاتتامالارعا سۇيەنسەك، «سارمات» — الەمدەگى ەڭ ءىرى قۇرلىقارالىق بالليستيكالىق زىمىرانداردىڭ ءبىرى. CSIS جانىنداعى Missilethreat جوباسىنىڭ باعالاۋىنشا، زىمىراننىڭ پايدالى جۇك سالماعى 10 تونناعا جەتەدى.
