پاكىستان اقش پەن يران اراسىنداعى كەلىسسوزدەردە دەلدال بولىپ، يراننىڭ اسكەري ۇشاقتارىن ءوز اۋماعىنداعى اۋە بازالارىندا جاسىرىن ورنالاستىرۋى مۇمكىن دەگەن اقپارات تارادى، دەپ حابارلايدى "ادىرنا" ۇلتتىق پورتالى CBS News-كە سىلتەپ.
مالىمەتكە سايكەس، ءساۋىر ايىنىڭ باسىندا، اقش پرەزيدەنتى ترامپ اتىستى توقتاتۋ تۋرالى مالىمدەمە جاساعاننان بىرنەشە كۇن وتكەن سوڭ، بىرنەشە يراندىق ۇشاق پاكىستانداعى نۇر-حان اسكەري اۋە بازاسىنا جىبەرىلگەن. ولاردىڭ قاتارىندا يران اسكەري-اۋە كۇشتەرىنە تيەسىلى RC-130 بارلاۋ ۇشاعى بولعانى ايتىلدى. بۇل ۇشاق تاكتيكالىق اسكەري-كولىك ۇشاعىنىڭ بارلاۋ نۇسقاسى سانالادى.
الايدا پاكىستان بيلىگى بۇل اقپاراتتى جوققا شىعاردى. رەسمي وكىلدەردىڭ ايتۋىنشا، نۇر-حان بازاسى قالا ورتالىعىندا ورنالاسقاندىقتان، وندا كوپتەگەن ۇشاقتى قۇپيا ۇستاۋ مۇمكىن ەمەس.
سونىمەن قاتار اقپارات كوزدەرى يران ازاماتتىق اۆياتسياسىنىڭ بىرقاتار ۇشاقتارى كورشىلەس اۋعانستان اۋماعىنا دا ۋاقىتشا ورنالاستىرىلعانىن حابارلادى.
كەيىن پاكىستان ناۋرىز ايىندا كابۋل ماڭىنا اۋە سوققىلارىن جاساعاننان كەيىن، جەرگىلىكتى بيلىك ۇشاقتاردى يران شەكاراسىنا جاقىن ورنالاسقان گەرات اۋەجايىنا كوشىرگەن. الايدا «تاليبان» قوزعالىسى ەل اۋماعىندا يراندىق ۇشاقتاردىڭ بارىن تەرىسكە شىعاردى.
باسىلىمنىڭ جازۋىنشا، يسلاماباد سوعىس باستالعالى بەرى ۆاشينگتون مەن تەگەران اراسىنداعى كەلىسسوزدەردە دەلدالدىق ءرول اتقارىپ كەلەدى.
