Almatyda er adamnyń kúzetshini birneshe márte kólikpen janshyp, aıaýsyzdyqpen óltirgen beınesi tarap, Qaznetti shýlatty. Jeli qoldanýshylardyń jappaı derlik kúdiktini aıyptap otyr. Kóp uzamaı onyń kim bolǵandyǵy da jarııalana bastady.
Bul oqıǵa túngi ýaqytta bolǵan.
Almatydaǵy «Merkýr Taýn» turǵyn úı keshenindebolǵan oqıǵadan soń 42 jastaǵy azamat qaza tapty. Marqumnyń artynda 3 balasy qalǵan.
Polıııa málimetinshe «kisi óltirdi» degen kúdikpen 45 jastaǵy azamat ustalǵan.
Al jergilikti turǵyndar azamattyń birneshe jyldar boıy ata-anasymen birge «Merkýr Taýn» turǵyn úı kesheninde turatynyn aıtady.
«ARAShALAMAI MA?»
Kýágerlerdiń aıtýynsha, oqys oqıǵa Almatydaǵy «Merkýr Taýn» turǵyn úı kesheninde naýryzdyń 28-inen 29-yna aýǵan túni bolǵan. Taralǵan vıdeo-málimetterdiń birinde, eger ýaqyty durys kórsetilse, oqıǵa túngi 2:30 shamasynda bolǵanǵa uqsaıdy.
Kúdiktiniń de uzaq jyldar boıy ata-anasymen birge osy turǵyn úı kesheninde turatyny aıtylady. Oqıǵany turǵyn úı kesheni turǵyndary vıdeoǵa da túsirgen. Taraǵan vıdeolarda kúdiktiniń kúzetshini birneshe márte krossover kólikpen janshyp, ol qansyrap jatqanda aıaq-qolmen taǵy da uryp, sońynan kólikti turaqqa qoıǵany túsirilgen. Oqıǵanyń basynda kúzetshiniń shlagbaýmdy japqany baıqalady.
Kadrlarda er adamnyń jerde jatqan es-tússiz kúzetshini uryp-soǵyp jatqany anyq kórinedi. Oqıǵa kezinde turǵyndardyń aıqaılap arasha shaqyrǵany baıqalady, alaıda eshkim jeke baryp ara túspegen. Vıdeoda jábirlenýshiniń qansyrap qınalyp jatqan daýsy da estiledi.
Jelini shýlatqan sumdyq vıdeoda kúdikti kúzetshini birneshe márte kóligimen janyshtap, artynsha shalajansar adamdy taǵy da aıaýsyz uryp, basyna sekirgen. Oqıǵaǵa kýá bolǵandar kúdikti men kúzetshiniń arasyndaǵy qaqtyǵysqa arasha bolmaǵan.
Oqıǵasynyń vıdeosy taraǵan soń jeli qoldanýshylary ony qyzý talqylady.
«Arashalamaı ma? Qazir adamdar ólip jatsań da,qulap jatsań da, kómek surasań da qashady.Basymyzǵa bále jabady dep kómektespeıdi», - dep jazdy «Ryshan» akkaýntymen tirkelgen jeli qoldanýshysy.
Facebook jáne Telegram jelilerindegi aqparatta kúdiktini «sheneýniktiń uly» dep tanýda.
«Almatyda bolǵan jaǵdaı. Ótken túnde qaladaǵy dáýletti kontıngent turatyn úılerdiń birinde kúzetshi kisi qolynan qaza tapqan. Kúzetshini áýeli kólikpen soǵyp qulatyp, keıin soqqyǵa jyqqan vıdeodaǵy adam ustalǵan. Úı turǵyndarynyń aıtýy boıynsha 1979 jyly týǵan jeke kásipker. Aty-jónine qarasaq, áýeli prokýror kómekshisi, keıin depýtat bolǵan kisiniń balasy bolýy ábden múmkin! Kúzetshi bálniste qaza tapqan. Budan basqa da birneshe vıdeosy júr: asqan aıýandyqpen tepkilegen, odan tiri qalý múmkin emes edi...», - dep jazdy jýrnalıst Almas Altaı.
«BURYN DISPETChER QYZDY URǴAN»
Dıas Nuraqyn jelidegi jazbasynda kúdiktiniń taǵy birneshe buzaqylyǵyn áshkereledi.
«Qazir qamaýda. Jasy shamamen 45-te eken. Aty-jóni – Ashat Tastandıev. Bul málimetterdi osy úıde turatyn turǵyndar jiberdi. Basbuzar buǵan deıin de osy úıdegi Lena degen dıspetcher qyzdy uryp tastaǵan. Tipti birneshe ret narkologııaǵa jatyp shyqqan deıdi tanıtyndar. Bir sózben aıtqanda baıdyń erke balasy. Óıtkeni eń qymbat sanalatyn "Samal" yqshamaýdanynan anaý-mynaý páter satyp ala almaıdy. Al, kisi qolynan ólgen kúzetshi nebári 42 jasta eken. Artynda úsh balasy qalypty. Marqumnyń jaqyndaryna sabyr tileımin! Qandyqol, qanypezerler qatań jazalanýy tıis», - delingen Facebook jelisindegi jazbada.
Jelide kúdiktiniń ákesi retinde atalyp júrgen Silámǵazy Tastandıevtiń 1948 jyly týǵany, toqsanynshy jyldarǵy Joǵarǵy Keńestiń HIII shaqyrylymynyń depýtaty bolǵany aıtylady. Burynǵy Taldyqorǵan oblystyq prokýrorynyń bas kómekshisi bolǵan sııaqty.
«JAZASYN JEŃILDETÝ» JOLYNDAǴY TALPYNYS
Kúdikke ilingen azamattyń osy áreketten soń bıikten sekirmek bolǵandyǵy aıtylady. Kúzetshini aıaýsyzdyqpen soqqyǵa jyqqan beıneniń artynsha kúdiktiniń 14 qabattan sekirýge «nıettengen» degenvıdeosy da tarady. Biraq vıdeoda kúdiktiniń ózi me, basqa ma jáne vıdeonyń qashan túsirilgeni belgisiz.
BAQ-ta kúdiktiniń nashaqorlyqqa salynýy múmkin ekeni jaıly da málimet bar. Al jeli qoldanýshylary kúdiktiniń bul áreketin «jazasyn jeńildetý» jolyndaǵy talpynys dep esepteıdi.
«Sekiretin bolsa oılanyp otyrmaı sekirip keter edi. Bul onyń ózin aqtap alý úshin jasaǵan áreketi.Erteń sotta "men istegen isime ókinemin, kúızeliste júrdim"-dep jazasyn jeńildetý úshin jasaǵany ǵoı», - degen sarynda pikirler kóptep jazylǵan.
Qazir Almaty qalalyq polıııa departamenti adam óltirý deregi boıynsha qylmystyq is qozǵalǵanyn málimdedi. «Aldyn ala málimet boıynsha, kúzetshi men turǵyn úı kesheniniń turǵyny arasynda janjal týyndap, nátıjesinde 45 jastaǵy er adam kúzetshiniń ómirine sáıkes kelmeıtin dene jaraqatyn jasaǵan. Kúdikti ustalyp, ýaqytsha ustaý ızolıatoryna qamaýǵa alyndy»,— delingen habarlamada.
Al jeli oqyrmandary polıııa málimdemesimen de kelispeı, qarsylyq tanytýda.
«Osylaı júre beretin bolsaq, baılar kedeılerdi qalaı bolsa solaı óltirip, taptap júre beretin bolady. Sot júıesine ózgertýler engizý kerek. Myna jerde taǵaıyndalǵan babynyń ózi kórsetip tur ǵoı jazalanbaıtynyn. Qaıdaǵy "dene jaraqaty", bul jerde "qasaqana adam óltirý" baby bolyp tur ǵoı» delingen pikirlerdiń birinde.
Symbat Naýhan
«Adyrna» ulttyq portaly
