باس پروكۋراتۋرا نۇرسۇلتان نازارباەۆتىڭ نەمەرە ءىنىسى، ۇلتتىق قاۋىپسىزدىك كوميتەتى توراعاسىنىڭ ەكس-ءبىرىنشى ورىنباسارى سامات ءابىشتىڭ نە سەبەپتى 8 جىلعا شارتتى مەرزىمگە سوتتالعانىن ءتۇسىندىردى، دەپ حابارلايدى «ادىرنا» ءتىلشىسى قازتاگ-قا سىلتەمە جاساپ.
«سوت سوتتالۋشىنىڭ ءوز كىناسىن مويىنداۋى مەن ونىڭ شىن جۇرەكتەن وكىنۋىن جازانى جەڭىلدەتەتىن ءمان-جايلار دەپ تانىدى. ءابىش قىلمىستىق قۇقىق بۇزۋشىلىقتى اشۋعا بەلسەندى ۇلەس قوستى. قىلمىسقا قاتىسى بار، الايدا كىناسىن مويىنداماعان باسقا دا ادامداردى اشكەرەلەدى»،—دەلىنگەن حابارلامادا.
بۇدان بولەك ەكس-شەنەۋنىكتىڭ كامەلەتكە تولماعان 5 بالاسىنىڭ بولۋى دا ەسكەرىلگەن.
باس پروكۋراتۋرا قىلمىستىق كودەكستىڭ 362-بابى بويىنشا شارتتى جازا قولدانىلمايدى دەگەن اقپاراتتىڭ قاتە ەكەنىن مالىمدەدى.
سوت سامات ءابىشتى قىلمىستىق كودەكستەگى «قىزمەتىن اسىرا پايدالانۋ» بابىمەن (362-باپتىڭ 4-تارماعى) ايىپتى دەپ تاۋىپ، 10 جىلعا لاۋازىمدى قىزمەت اتقارۋ قۇقىعىنان ايىرىپ، 8 جىلعا باس بوستاندىعىنان ايىرعان. ال قىلمىستىق كودەكستىڭ 63-بابىمەن («شارتتى تۇردە سوتتاۋ») شارتتى جازاعا اۋىستىرعان.
«ءابىش جاساعان قىلمىستان سىبايلاس جەمقورلىق فاكتىلەرى انىقتالمادى. سول سەبەپتى قىلمىستىق كودەكستىڭ 63-بابىن وسى قىلمىستىق ءىس بويىنشا قولدانۋعا زاڭنامالىق شەكتەۋلەر بولعان جوق. ايىپتاۋ ۇكىمىن شىعارۋ كەزىندە ءىستىڭ بارلىق ءمان-جاي زەردەلەندى»،—دەپ تولىقتىردى باس پروكۋراتۋرا.
ەسكە سالايىق، 19 ناۋرىزدا سامات ءابىشتىڭ جابىق سوت شەشىمىمەن شارتتى تۇردە سوتتالعانى بەلگىلى بولعان ەدى.