Bas prokuratura Nūrsūltan Nazarbaevtyŋ nemere ınısı, Ūlttyq qauıpsızdık komitetı töraǧasynyŋ eks-bırınşı orynbasary Samat Äbıştıŋ ne sebeptı 8 jylǧa şartty merzımge sottalǧanyn tüsındırdı, dep habarlaidy «Adyrna» tılşısı QazTAG-qa sılteme jasap.
«Sot sottaluşynyŋ öz kınäsın moiyndauy men onyŋ şyn jürekten ökınuın jazany jeŋıldetetın män-jailar dep tanydy. Äbış qylmystyq qūqyq būzuşylyqty aşuǧa belsendı üles qosty. Qylmysqa qatysy bar, alaida kınäsın moiyndamaǧan basqa da adamdardy äşkereledı»,—delıngen habarlamada.
Būdan bölek eks-şeneunıktıŋ kämeletke tolmaǧan 5 balasynyŋ boluy da eskerılgen.
Bas prokuratura Qylmystyq kodekstıŋ 362-baby boiynşa şartty jaza qoldanylmaidy degen aqparattyŋ qate ekenın mälımdedı.
Sot Samat Äbıştı Qylmystyq kodekstegı «Qyzmetın asyra paidalanu» babymen (362-baptyŋ 4-tarmaǧy) aiypty dep tauyp, 10 jylǧa lauazymdy qyzmet atqaru qūqyǧynan aiyryp, 8 jylǧa bas bostandyǧynan aiyrǧan. Al Qylmystyq kodekstıŋ 63-babymen («Şartty türde sottau») şartty jazaǧa auystyrǧan.
«Äbış jasaǧan qylmystan sybailas jemqorlyq faktılerı anyqtalmady. Sol sebeptı Qylmystyq kodekstıŋ 63-babyn osy qylmystyq ıs boiynşa qoldanuǧa zaŋnamalyq şekteuler bolǧan joq. Aiyptau ükımın şyǧaru kezınde ıstıŋ barlyq män-jai zerdelendı»,—dep tolyqtyrdy Bas prokuratura.
Eske salaiyq, 19 nauryzda Samat Äbıştıŋ jabyq sot şeşımımen şartty türde sottalǧany belgılı bolǧan edı.
