ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ بۇرىنعى توراعاسى قايرات قوجامجاروۆقا قاتىستى سوتقا دەيىنگى تەرگەۋ باستالدى، دەپ حابارلايدى "ادىرنا" ۇلتتىق پورتالى.
بۇل تۋرالى باس پروكۋراتۋرا حابارلادى.
رەسمي مالىمەتكە سايكەس، ول لاۋازىمدىق وكىلەتتىگىن اسىرا پايدالاندى جانە ءتۇرلى كەزەڭدەردە قىلمىستىق جولمەن الىنعان قاراجاتتى زاڭداستىردى دەگەن كۇدىككە ىلىنگەن.
«بارلىق ىستەر بويىنشا ارنايى پروكۋرورلاردىڭ جەتەكشىلىگىمەن جەدەل-تەرگەۋ توپتارى قۇرىلدى»، – دەلىنگەن باس پروكۋراتۋرانىڭ حابارلاماسىندا.
الايدا قر قىلمىستىق-پروتسەستىك كودەكسىنىڭ 201-بابىنا سايكەس وزگە اقپارات جاريا ەتۋگە جاتپايدى.
بۇعان دەيىن باس پروكۋراتۋرا قوجامجاروۆتىڭ اتىشۋلى «قورعاس ىسىنە» قاتىسى بارىن راستاعان ەدى.
ەسكە سالساق، 2011 جىلدىڭ سوڭىندا الماتى وبلىسىنداعى كەدەن بەكەتتەرىندە ءىرى كولەمدەگى ۇرلىق دەرەكتەرى انىقتالعان. ول جەردە 100-دەن استام ادامنان قۇرالعان ۇيىمداسقان قىلمىستىق توپتىڭ جۇمىس ىستەگەنى بەلگىلى بولدى.
قايرات قوجامجاروۆ بىرقاتار جوعارى مەملەكەتتىك قىزمەتتى اتقارعان. ول ەكونوميكالىق جانە سىبايلاس جەمقورلىق قىلمىستارعا قارسى كۇرەس اگەنتتىگىنىڭ (قارجى پوليتسياسى) توراعاسى، انتيكوررۋپتسيالىق قىزمەتتىڭ (ۇلتتىق بيۋرو) باسشىسى، اقمولا وبلىسىنىڭ اكىمى، قاۋىپسىزدىك كەڭەسىنىڭ حاتشىسى جانە قازاقستان رەسپۋبليكاسىنىڭ باس پروكۋرورى (2017-2019) بولدى.
