بۇرىنعى توتەنشە جاعدايلار ءمينيسترى يۋري يلين قىزمەتتىك مىندەتتەرىنە نەمقۇرايلىلىعى مەن سالعىرتتىعى ءۇشىن تەكسەرىلۋدە. بۇل تۋرالى ىشكى ىستەر ءمينيسترى مارات احمەتجانوۆ ايتتى، دەپ حابارلايدى “ادىرنا” ۇلتتىق پورتالى.
پرەزيدەنت باس پروكۋراتۋراعا تاپسىرما بەرگەن، سونىڭ نەگىزىندە تەكسەرىس جۇرەدى. ورماننىڭ ورتەنۋى – توتەنشە جاعداي، ادام شىعىنى بولدى، سوندىقتان قىلمىستىق ءىس كەزىندە تەكسەرىس بولىپ، نەگە ۋاقىتىلى شارا قابىلدانباعانى، سالعىرتتىق، قىزمەتىن دۇرىس اتقارماۋ فاكتىلەرى تەكسەرىلەدى، – دەدى سەيسەنبى كۇنى جۋرناليستەردىڭ سۇراعىنا جاۋاپ بەرگەن ىشكى ىستەر ءمينيسترى مارات احمەتجانوۆ.
سونداي-اق، مينيستر اباي وبلىسىنداعى ءورتتىڭ شىعۋىنا وت قويۋ، سالعىرتتىق نەمەسە نايزاعاي سەبەپ بولۋى مۇمكىن ەكەنىن ايتتى. مينيسترلىككە بۇل جاعدايدى تەرگەپ-تەكسەرۋگە ەكى اي ۋاقىت بەرىلگەن.
ەسكە سالايىق، اباي وبلىسىنداعى ورمان ءورتى 60 مىڭ گەكتار جەردى شارپىپ، 14 ورمانشى قازا تاپتى. قازىر تاعى ءبىر ادام ىزدەستىرىلىپ جاتىر. توتەنشە جاعدايلار مينيسترلىگى ءورت اۋماعى 60 مىڭ گەكتاردان 43 مىڭ گەكتارعا ازايعانىن حابارلادى. ءورت شارپۋى مۇمكىن دەگەن اۋىلداردىڭ تۇرعىندارى سەمەي قالاسىنا ەۆاكۋاتسيالاندى.
