بۇگىن الماتىداعى ءال-فارابي داڭعىلىندا بولعان ادام ولىمىنە اكەلگەن جول اپاتى بويىنشا سوت وتىرىسىندا قازا تاپقان قىزدىڭ اناسى كۋالىك بەردى، دەپ حابارلايدى «ادىرنا» ءتىلشىسى.
اناسىنىڭ ايتۋىنشا، اپات بولاتىن كۇنى قىزى ءوز كولىگىمەن تاكسي قىزمەتىن اتقارىپ جۇرگەن. ول ۇيگە از ۋاقىتقا كەلىپ، تاماقتانىپ كەتكەن.
«وعان تاماق بەردىم. سول كۇنى نەسيەسىنىڭ تولەمىن جاساۋى كەرەك ەدى. قالعان سومانى تابۋ ءۇشىن تاعى جۇمىس ىستەپ كەلەتىنىن ايتتى. تاماقتانىپ بولعان سوڭ، اقشانى تاۋىپ، قايتا ورالاتىنىن ايتىپ كەتىپ قالدى»،– دەدى جابىرلەنۋشى.
كەشكى ساعات 23:00 شاماسىندا اناسى الاڭداپ، قىزىنا بەينەقوڭىراۋ شالعان. سول كەزدە قىزدىڭ كولىگىندە جولاۋشىلار بولعان.
«ول قارنى اشقانىن ايتتى. جولاۋشىلاردى جەتكىزىپ تاستاپ، تاماقتانىپ الىپ، ۇيگە قايتاتىنىن ايتتى»،– دەپ ەسكە الدى اناسى.
قىزىنىڭ Mercedes كولىگىنە قالاي وتىرعانىن اناسى تۇسىندىرمەدى. ونىڭ ايتۋىنشا، ءوزى ۇيىقتاپ قالعان، ال كەلەسى كۇنى تاڭعى ساعات 09:00-دە قىزىنىڭ كوز جۇمعانى تۋرالى حابار جەتكەن.
«قىزىمنىڭ ءمايىتحانادا جاتقانىنا سەنبەدىم. ونى كومادا شىعار دەپ ويلادىم»،– دەدى ايەل كوزىنە جاس الىپ.
جابىرلەنۋشى سوتتالۋشىدان ەشتەڭە تالاپ ەتپەيتىنىن ايتىپ، قىزىنىڭ ءومىرىن ەشكىم قايتارا المايتىنىن جەتكىزدى.
سوت بارىسىندا قورعاۋشى تاراپ جابىرلەنۋشىنىڭ جازباشا ءوتىنىشىن دە ۇسىندى. وندا ونىڭ ايىپتالۋشىمەن تولىق تاتۋلاسقانى، سوتتالۋشىنىڭ كىناسىن تولىق مويىنداپ، شىن جۇرەكتەن وكىنگەنى جانە كەشىرىم سۇراعانى ايتىلعان. وسىعان بايلانىستى جابىرلەنۋشى وعان شارتتى جازا تاعايىنداۋدى سۇرادى. سونداي-اق ادۆوكات قىزمەتىنەن باس تارتقانىن مالىمدەدى.
ەسكە سالا كەتەيىك، بۇگىن سوتتا Mercedes كولىگىندەگى جولاۋشى رەتىندە قازا تاپقان ەر ادامنىڭ تۋىستارى دا ءسوز سويلەدى. ولار دا سوتتالۋشىمەن تاتۋلاسقانىن ايتىپ، ونى باس بوستاندىعىنان ايىرماۋدى نەمەسە شارتتى جازا تاعايىنداۋدى ءوتىندى.
ايتا كەتەيىك، 28 مامىر كۇنى Zeekr كولىگىنىڭ جۇرگىزۋشىسى سوت الدىنا كەلىپ، قازا بولعانداردىڭ وتباسىلارىنا كوڭىل ايتىپ، ءوزىن ەشقاشان كەشىرە المايتىنىن مالىمدەگەن ەدى.
سوتتالۋشى الەكساندر پاك وزىنە تاعىلعان ايىپتى تولىق مويىندايتىنىن ايتقان. ول قىلمىستىق كودەكستىڭ 345-1-بابىنىڭ 4-بولىگى «الكوگولدىك ماساڭ كۇيدە جول ءجۇرىسى قاعيدالارىن بۇزۋ، ابايسىزدا ەكى نەمەسە ودان دا كوپ ادامنىڭ ولىمىنە اكەپ سوعۋ» بويىنشا ايىپتالىپ وتىر.
