باتىس قازاقتان وبلىسىنىڭ اكىمى ناريمان تورەعاليەۆ وڭىرگە ينۆەستيتسيا تارتۋ ماسەلەسى بويىنشا جيىن وتكىزدى.
باتىس قازاقستان وبلىسى كاسىپكەرلىك باسقارماسىنىڭ مالىمەتىنە سايكەس، وڭىرگە ينۆەستيتسيالار تارتۋ اياسىندا وتكەن جىلى 45 جوبا ىسكە قوسىلعان. وسىنىڭ اياسىندا 1 مىڭ جاڭا جۇمىس ورنى اشىلعان. جالپى العاندا 2023 جىلدىڭ قورىتىندىسى بويىنشا نەگىزگى كاپيتالعا سالىنعان ينۆەستيتسيالار كولەمى 16,4%-عا ءوسىپ 645,6 ملرد تەڭگەنى قۇراعان. ونىڭ باسىم بولىگى قاراشىعاناق كەن ورنى ارقىلى تارتىلعان ينۆەستيتسيالار.
ال، وبلىسقا قاراستى قالالار مەن اۋداندار، باسقارمالار تاراپىنان ينۆەستيتسيا تارتۋ باعىتىنداعى جۇمىس باياۋ جۇرگىزىلۋدە. ماسەلەن، اۋدانداردىڭ جارتىسىنان كوبى جالپى قۇنى 1 ملرد. تەڭگەگە جەتپەيتىن ينۆەست جوبالار ۇسىنسا، ونىڭ ىشىندە بوكەي ورداسى، قاراتوبە، كازتالوۆ، شىڭعىرلاۋ اۋداندارى ۇسىنعان جوبالاردىڭ جالپى قۇنى تومەن دەڭگەيدە (205 ملن. تەڭگەدەن تومەن).
وبلىس اكىمى ناريمان تورەعاليەۆ ينۆەستيتسيا تارتۋ جۇمىستارىنىڭ ماڭىزدىلىعىن ايتا كەلە، بۇل باعىتتاعى جۇمىستاردى كۇشەيتۋدى تاپسىردى.
«مەملەكەت باسشىسى قاسىم-جومارت كەمەلۇلى توقاەۆ ەلىمىزدىڭ مىقتى ونەركاسىپتىك نەگىزىن قالىپتاستىرۋ جانە ءار وڭىردە ءتيىمدى ينۆەستيتسيالىق جوبالاردى ىسكە اسىرۋدى تاپسىرعان بولاتىن.
سوندىقتان، وبلىس ەكونوميكاسىن ودان ءارى ءارتاراپتاندىرۋ، سونىڭ ىشىندە ينۆەستيتسيا تارتۋ باعىتىندا ناقتى ىستەردى قولعا الۋىمىز قاجەت» - دەدى ناريمان تورەعاليەۆ.
ورال قالاسى وبلىس ورتالىعى بولعانىنا قاراماستان 2023 جىلدىڭ قورىتىندىسى بويىنشا نەگىزگى كاپيتالعا سالىنعان جەكە ينۆەستيتسيالار كولەمى 6,8%-عا (83 ملرد.تگ) تومەندەگەن. سونداي-اق، بىرقاتار اۋدانداردا دا كورسەتكىشتەر كوڭىلدەن شىقپايدى.
وبلىس باسشىسى ءار اۋدان اكىمىنىڭ، ءار باسقارما باسشىنىڭ جۇمىسى تىكەلەي ينۆەستيتسيا تارتۋمەن بايلانىستى بولۋى كەرەك ەكەنىن ەسكەرتتى.
«ينۆەستيتسيا تارتۋ بويىنشا جۇمىس جۇرگىزبەسەڭدەر ورىندارىڭدى بوساتاسىڭدار. مەن كادرلىق شەشىم قابىلدايتىن بولامىن. ناقتى جوبالار كەرەك. ناتيجە كەرەك» - دەپ اتاپ ءوتتى ايماق باسشىسى.
