ورال قالاسىندا جاساندى ينتەللەكت تەحنولوگيالارىنا نەگىزدەلگەن جاڭا فورماتتاعى تسيفرلىق كەڭسە اشىلدى. زاماناۋي ورتالىق مەملەكەتتىك قىزمەتتەردىڭ قولجەتىمدىلىگىن ارتتىرۋعا، تۇرعىنداردىڭ ۋاقىتىن ۇنەمدەۋگە جانە تسيفرلىق مۇمكىندىكتەردى كەڭىنەن پايدالانۋعا باعىتتالعان. سالتاناتتى شاراعا وبلىس اكىمى ناريمان تورەعاليەۆ، «ازاماتتارعا ارنالعان ۇكىمەت» مەملەكەتتىك كورپوراتسياسى» كەاق باسقارما توراعاسى ارمان كەنجەعاليەۆ قاتىستى.
مەملەكەت باسشىسى قاسىم-جومارت توقاەۆ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى جولداۋىندا تسيفرلىق ەكونوميكانى قالىپتاستىرۋ جانە وزىق تەحنولوگيالاردى حالىق يگىلىگىنە پايدالانۋ مىندەتىن ايقىندادى. پرەزيدەنت جاريالاعان تسيفرلاندىرۋ جانە جاساندى ينتەللەكت جىلى اياسىندا وڭىردە بۇل باعىتتاعى جۇمىستار جۇيەلى جالعاسۋدا.
جىل باسىنان بەرى وبلىستا 3 ميلليون 203 مىڭعا جۋىق مەملەكەتتىك قىزمەت كورسەتىلىپ، ونىڭ 98 پايىزى ەلەكتروندى فورماتتا جۇزەگە اسىرىلدى. ال «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ وبلىستىق فيليالى ۇسىنعان 629 مىڭنان استام قىزمەتتىڭ 60 پايىزعا جۋىعى ونلاين كورسەتىلدى.
جاڭا كەڭسە ءۇش نەگىزگى فۋنكتسيونالدىق ايماقتان تۇرادى. ەكسپرەسس-ايماقتا تۇرعىندار انىقتامالار مەن قاراپايىم قىزمەتتەردى ءوز بەتىنشە جەدەل الا الادى. تسيفرلىق ايماقتا ەلەكتروندىق تسيفرلىق قولتاڭبا راسىمدەۋ، تۋ، نەكە قيۋ، تۇرعىلىقتى جەرى بويىنشا تىركەلۋ جانە الەۋمەتتىك تولەمدەرگە قاتىستى قىزمەتتەر ونلاين ۇسىنىلادى. ساراپتامالىق ايماقتا ماماندار كاسىبي كومەك كورسەتەدى. سونداي-اق ازاماتتاردىڭ تسيفرلىق ساۋاتتىلىعىن ارتتىرۋعا ارنالعان ارنايى وقۋ ايماعى قاراستىرىلعان.
– تسيفرلاندىرۋدىڭ باستى ولشەمى – تەحنولوگيانىڭ كۇردەلىلىگى ەمەس، ونىڭ ادام ومىرىنە اكەلەتىن ناقتى پايداسى. جاساندى ينتەللەكت جاس ەرەكشەلىگىنە، تۇرعىلىقتى جەرىنە نەمەسە تسيفرلىق داعدىلارىنا قاراماستان، ءار ازاماتقا زاماناۋي مەملەكەتتىك قىزمەتتەردى ەركىن پايدالانۋعا جول اشادى، – دەدى ناريمان تورەعاليەۆ.
وڭىردە تسيفرلىق ينفراقۇرىلىمدى جەتىلدىرۋ جانە مەملەكەتتىك باسقارۋعا وزىق تەحنولوگيالاردى ەنگىزۋ جۇمىستارى جالعاسادى.
