قۇرىلتاي دەپۋتاتى سنەجاننا يماشەۆا جانە ورتالىق مەملەكەتتىك ورگان وكىلدەرى وڭىرگە جۇمىس ساپارىمەن كەلدى. رەسمي دەلەگاتسيا قازاقستان يننوۆاتسيالىق جانە تەلەكوممۋنيكاتسيالىق جۇيەلەر ۋنيۆەرسيتەتىنىڭ ۇجىمىمەن، ستۋدەنتتەرمەن، مادەنيەت، سپورت، دەنساۋلىق ساقتاۋ سالاسىنىڭ وكىلدەرى كەزدەستى. باسقوسۋدا مەملەكەت باسشىسى قاسىم-جومارت توقاەۆتىڭ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى حالىققا جولداۋىنان تۋىنداعان ماقسات-مىندەتتەر كەڭىنەن تالقىلاندى.
سنەجاننا يماشەۆا باعدارلامالىق قۇجاتتا بارلىق سالاعا تسيفرلىق شەشىمدەر مەن جاساندى ينتەللەكتىنى ەنگىزۋ ۇدەرىسىن جەتىلدىرۋ، جاڭا تەحنولوگيالاردى يگىلىككە اينالدىرۋ جونىندە ماڭىزدى مىندەتتەر جۇكتەلگەنىن اتاپ ءوتتى. وسى تۇرعىدا ول ۋنيۆەرسيتەت ۇجىمى مەن ستۋدەنتتەردىڭ تىڭ جوبالارىن جوعارى باعالاپ، كاسىبي كادرلار مەن زاماناۋي تەحنولوگيالاردى جەتىك مەڭگەرگەن جاستاردىڭ ەل دامۋىنداعى ەرەكشە رولىنە توقتالدى.
پرەزيدەنت جولداۋىندا ەلدىڭ ەكونوميكالىق دامۋى ءاربىر تۇرعىننىڭ ءال-اۋقاتىنىڭ جاقسارۋىمەن كورىنىس تابۋى تۋرالى ايتىلدى. ۇلتتىق ەكونوميكا ۆيتسە-ءمينيسترى باۋىرجان وماربەكوۆ كەلەر جىلى ەڭ تومەنگى جالاقى مولشەرىن 85 مىڭ تەڭگەدەن 110 مىڭ تەڭگەگە كوتەرۋ، شاعىن بيزنەستى تەكسەرۋگە موراتوري مەرزىمىن ءۇش جىلعا ۇزارتۋ، سالىق زاڭناماسىن جەتىلدىرۋ، فەرمەرلەردى ۇزاقمەرزىمدى قارجىلاندىرۋ تەتىكتەرىن ەنگىزۋ، جەرگىلىكتى تاۋار وندىرۋشىلەردىڭ ءونىمىن وتكىزۋ ماسەلەسىن رەتتەۋ جانە تاعى باسقا ناقتى شارالاردىڭ تۇپكى ماقساتى حالىقتىڭ تۇرمىس ساپاسىن ارتتىرۋ ەكەنىن اتاپ ءوتتى.
ەنەرگەتيكا ۆيتسە-ءمينيسترى قايىرحان تۇتقىشباەۆ پرەزيدەنت تاپسىرمالارىنا سايكەس ەلىمىزدە «ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسى جۇزەگە اسىرىلىپ جاتقانىن جەتكىزدى. ۆەدومستۆو وكىلى بۇل باعىتتا باتىس قازاقستان وبلىسىندا اۋقىمدى جۇمىستار اتقارىلعانىن تىلگە تيەك ەتتى.
قازاقستان حالىق كەڭەسىنىڭ مۇشەسى مۇرات مۇقاەۆ جاڭا كونستيتۋتسيالىق ورگاننىڭ ماقسات-مىندەتتەرىنە توقتالدى. ول دەلەگاتسيا مۇشەلەرىنە ءوڭىردىڭ وزەكتى ماسەلەلەرى بويىنشا ۇسىنىستارىن ايتتى.
باسقوسۋعا قاتىسۋشىلار باعدارلامالىق قۇجاتتاعى نەگىزگى باسىمدىقتارعا قاتىستى جان-جاقتى پىكىر الماستى.
