ينۆەستيتسيا – اۋىل ەكونوميكاسىنىڭ قوزعاۋشى كۇشى. ال كاسىپكەرلىككە قولداۋ كورسەتۋ مەن جاڭا وندىرىستەرگە جول اشۋ – ءوڭىردىڭ تۇراقتى دامۋىنىڭ كەپىلى.
مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋىندا ايقىندالعان مىندەتتەر اياسىندا باتىس قازاقستان وبلىسىنىڭ كازتالوۆ اۋدانىندا «KAZTALOV-INVEST» II اۋداندىق ينۆەستيتسيالىق فورۋمى ءوتتى. باسقوسۋدىڭ باستى ماقساتى – اۋداننىڭ ەكونوميكالىق الەۋەتىن ءتيىمدى پايدالانۋ، كاسىپكەرلىك باستامالاردى قولداۋ جانە اۋىلعا جەكە ينۆەستيتسيا تارتۋ ارقىلى جاڭا مۇمكىندىكتەرگە جول اشۋ.
فورۋمعا باتىس قازاقستان وبلىسى اكىمىنىڭ ورىنباسارى قاليار ايتمۇحامبەتوۆ، اۋدان اكىمى اسلانبەك سارقۇلوۆ، اۋدان پروكۋرورى ەرلان گايپوۆ، وبلىستىق اۋىل شارۋاشىلىعى باسقارماسى باسشىسىنىڭ ورىنباسارى رۇستەم زۇلقاشەۆ، «AQJAIYQ» الەۋمەتتىك-كاسىپكەرلىك كورپوراتسياسى توراعاسىنىڭ ورىنباسارى جاننا بەكقاليەۆا، «دامۋ» كاسىپكەرلىكتى دامىتۋ قورىنىڭ وبلىستىق فيليالىنىڭ باسشىسى تاراس شالىگا، «اگرارلىق نەسيە كورپوراتسياسى» وبلىستىق فيليالىنىڭ ديرەكتورى مارات سارسەەۆ، «تەحنوپاركالگوريتم» جشس ديرەكتورى ايسۇلۋ امانعاليەۆا، اۋىلدىق وكرۋگ اكىمدەرى، كاسىپكەرلەر، شارۋا قوجالىقتارىنىڭ جەتەكشىلەرى مەن بۇقارالىق اقپارات قۇرالدارىنىڭ وكىلدەرى قاتىستى.
جيىندا ينۆەستيتسيا تارتۋ ماسەلەسى ەكونوميكالىق ءوسىمنىڭ عانا ەمەس، اۋىلدىڭ بولاشاعىن ايقىندايتىن ستراتەگيالىق مىندەت رەتىندە قاراستىرىلدى. ويتكەنى ينۆەستيتسيا – جاڭا كاسىپورىن، جاڭا جۇمىس ورنى، تۇراقتى تابىس پەن تۇرعىنداردىڭ تۇرمىس ساپاسىن جاقسارتۋعا باستايتىن ناقتى مۇمكىندىك.
فورۋمنىڭ اشىلۋىندا ءسوز سويلەگەن وبلىس اكىمىنىڭ ورىنباسارى قاليار ايتمۇحامبەتوۆ مەملەكەت باسشىسىنىڭ جولداۋىندا كوتەرىلگەن مىندەتتەردىڭ ءوڭىر ءۇشىن ماڭىزىنا توقتالىپ، ينۆەستيتسيالىق احۋالدى جاقسارتۋ باعىتىنداعى جۇمىستاردى اتاپ ءوتتى.
– مەملەكەت باسشىسى قاسىم-جومارت توقاەۆ 2026 جىلعى 28 قازانداعى قازاقستان حالقىنا جولداۋىندا ينۆەستيتسيا تارتۋ جۇيەسىن جەتىلدىرۋ مەن جەكە ينۆەستيتسيالاردى ىنتالاندىرۋعا نازار اۋدارىپ، سونىڭ ىشىندە اۋىل شارۋاشىلىعى ونىمدەرىن تەرەڭ وڭدەۋدى دامىتۋدىڭ جانە زاماناۋي تەحنولوگيالاردى ەنگىزۋدىڭ ماڭىزدىلىعىن اتاپ ءوتتى. بۇل باعىتتا باتىس قازاقستان وبلىسىندا دا جۇيەلى جۇمىستار جۇرگىزىلۋدە. 2025 جىلى نەگىزگى كاپيتالعا سالىنعان ينۆەستيتسيالار كولەمى 893,4 ملرد تەڭگەنى قۇراپ، جوسپاردان 52,4 ملرد تەڭگەگە ارتىق ورىندالدى. ال 2026 جىلدىڭ العاشقى توعىز ايىندا بۇل كورسەتكىش 539,5 ملرد تەڭگەگە جەتتى. ءبىزدىڭ ماقساتىمىز – ينۆەستيتسيا كولەمىن ۇلعايتۋمەن قاتار، جاڭا وندىرىستەر اشۋ، تۇراقتى جۇمىس ورىندارىن قۇرۋ جانە ءوڭىر ەكونوميكاسىنىڭ الەۋەتىن ارتتىرۋ، – دەدى قاليار شاديارۇلى.
وبلىس اكىمىنىڭ ورىنباسارى اتاپ وتكەندەي، كازتالوۆ اۋدانىنىڭ ينۆەستيتسيالىق مۇمكىندىكتەرى مول. اسىرەسە، مال شارۋاشىلىعى، ەت پەن ءسۇت ءوندىرۋ، مال ازىعىن دايىنداۋ، اۋىل شارۋاشىلىعى ونىمدەرىن ساقتاۋ باعىتتارى جاڭا جوبالاردى جۇزەگە اسىرۋعا قولايلى. بۇل سالالارعا زاماناۋي تەحنولوگيالاردى ەنگىزۋ ءوندىرىس تيىمدىلىگىن ارتتىرىپ قانا قويماي، اۋىل شارۋاشىلىعى ونىمدەرىنىڭ قوسىلعان قۇنىن ۇلعايتۋعا مۇمكىندىك بەرەدى.
كازتالوۆ اۋدانى ءۇشىن ينۆەستيتسيا تارتۋ – ەكونوميكانى ءارتاراپتاندىرۋدىڭ، كاسىپكەرلىك بەلسەندىلىكتى ارتتىرۋدىڭ جانە اۋىل تۇرعىندارىنا جاڭا مۇمكىندىكتەر ۇسىنۋدىڭ ماڭىزدى تەتىگى. اۋداننىڭ نەگىزگى الەۋەتى اۋىل شارۋاشىلىعىمەن تىعىز بايلانىستى بولعاندىقتان، بۇل سالادا ءوندىرىستى ۇلعايتىپ قانا قويماي، ءونىمدى تەرەڭ وڭدەۋ، ساقتاۋ جانە دايىن تاۋارعا اينالدىرۋ باعىتتارىنا باسىمدىق بەرۋ قاجەت.
فورۋم بارىسىندا اۋدان پروكۋرورى ەرلان گايپوۆ كاسىپكەرلىك سالاسىنا قاتىستى ماسەلەلەردى قوزعادى. اۋدان اكىمىنىڭ ورىنباسارى راشيت ناسىپقاليۇلى كازتالوۆ اۋدانىندا كاسىپكەرلىكتى دامىتۋ باعىتىندا اتقارىلىپ جاتقان جۇمىستار مەن الداعى مىندەتتەردى باياندادى.
سونداي-اق وبلىستىق اۋىل شارۋاشىلىعى باسقارماسى باسشىسىنىڭ ورىنباسارى رۇستەم مۇلكايۇلى وڭىردەگى اگرارلىق سالانىڭ بۇگىنگى جاعدايى مەن دامۋ جوسپارلارىنا توقتالدى. «AQJAIYQ» اكك» اق توراعاسىنىڭ ورىنباسارى جاننا پالاتقىزى كاسىپكەرلەرگە كورسەتىلەتىن قولداۋ شارالارىن تۇسىندىرسە، «دامۋ» كاسىپكەرلىكتى دامىتۋ قورىنىڭ وبلىستىق فيليالىنىڭ باسشىسى تاراس ياروسلاۆۇلى كاسىپكەرلىك باستامالاردى قولداۋدىڭ قارجىلىق تەتىكتەرى تۋرالى ايتتى.
ال «اگرارلىق نەسيە كورپوراتسياسى» اق وبلىستىق فيليالىنىڭ ديرەكتورى مارات ەرمەكۇلى اۋىل شارۋاشىلىعى سالاسىنداعى جەڭىلدەتىلگەن نەسيەلەندىرۋ مەن ينۆەستيتسيالىق قارجىلاندىرۋدىڭ مۇمكىندىكتەرىن تانىستىردى.
فورۋمدا تاجىريبەلى كاسىپكەرلەر دە ءسوز الىپ، ءوز جۇمىستارىنىڭ قىر-سىرىن ورتاعا سالدى. «مۋسليم» شارۋا قوجالىعىنىڭ جەتەكشىسى ماحامبەت امانعاليۇلى مەن «باۋىرلار نارم» شارۋا قوجالىعىنىڭ جەتەكشىسى نۇرلىباي جولدىبايۇلى اۋىل شارۋاشىلىعى سالاسىنداعى تاجىريبەلەرىمەن ءبولىستى.
فورۋمنىڭ باستى ناتيجەسى – اۋدان ەكونوميكاسىن دامىتۋعا باعىتتالعان ناقتى كەلىسىمدەر. باسقوسۋ اياسىندا جالپى قۇنى 2 ملرد تەڭگەنى قۇرايتىن 26 جوبا بويىنشا مەموراندۋمدارعا قول قويىلدى.
بۇل كازتالوۆ اۋدانىنىڭ ينۆەستيتسيالىق الەۋەتىن ارتتىرۋعا، جاڭا وندىرىستەردى قالىپتاستىرۋعا جانە جۇمىس ورىندارىن اشۋعا باعىتتالعان ماڭىزدى قادام. الايدا ينۆەستيتسيالىق كەلىسىمدەردىڭ شىنايى قۇنى ولاردىڭ قاعاز جۇزىندە قالماي، ناقتى ىسكە اسۋىمەن ولشەنەدى. سوندىقتان الداعى كەزەڭدە جوبالاردىڭ جۇزەگە اسۋىن قامتاماسىز ەتۋ، كاسىپكەرلەرگە قولداۋ كورسەتۋ جانە بەلگىلەنگەن مىندەتتەردىڭ ورىندالۋىن جۇيەلى باقىلاۋ ەرەكشە ماڭىزعا يە.
اۋدان اكىمى اسلانبەك سارقۇلوۆ فورۋمنىڭ قورىتىندىسىندا ينۆەستيتسيا تارتۋ مەن كاسىپكەرلىكتى قولداۋ اۋدان دامۋىنىڭ باسىم باعىتتارىنىڭ ءبىرى ەكەنىن اتاپ ءوتتى
– بۇگىنگى «KAZTALOV-INVEST» II اۋداندىق ينۆەستيتسيالىق فورۋمى ءوز ماقساتىنا جەتىپ، ناقتى ناتيجەلەرگە جول اشتى دەپ سەنىممەن ايتا الامىز. فورۋم اياسىندا اۋدان ەكونوميكاسىن ىلگەرىلەتۋگە باعىتتالعان جالپى قۇنى 2 ملرد تەڭگەنى قۇرايتىن 26 جوباعا قول قويىلدى. بۇل – اۋدانىمىزدىڭ ينۆەستيتسيالىق الەۋەتىن ارتتىرۋعا، جاڭا جۇمىس ورىندارىن اشۋعا جانە تۇرعىنداردىڭ ءال-اۋقاتىن جاقسارتۋعا مۇمكىندىك بەرەتىن ماڭىزدى قادام. مەملەكەت باسشىسى اتاپ وتكەندەي، اۋىلدىق اۋماقتاردى دامىتۋدا جەكە ينۆەستيتسيا تارتۋ مەن كاسىپكەرلىكتى قولداۋدىڭ ماڭىزى زور. وسى باعىتتاعى جۇمىسىمىزدىڭ ناتيجەسى بۇگىنگى قول قويىلعان كەلىسىمدەرمەن عانا ولشەنبەيدى. ەڭ باستىسى – باستامالاردىڭ ناقتى ىسكە اسۋى، جوبالاردىڭ جۇزەگە اسۋى جانە ەل يگىلىگىنە قىزمەت ەتۋى! اۋداننىڭ وركەندەۋى – ورتاق جاۋاپكەرشىلىكتىڭ جەمىسى. سوندىقتان كاسىپكەرلەرمەن ارىپتەستىكتى نىعايتىپ، ينۆەستيتسيالىق جوبالاردى جۇيەلى قولداۋعا جانە ولاردىڭ ورىندالۋىنا باسا ءمان بەرەمىز. بۇگىنگى فورۋمعا قاتىسىپ، اۋداننىڭ دامۋىنا ۇلەس قوسۋعا نيەت بىلدىرگەن بارشا كاسىپكەرلەر مەن ينۆەستورلارعا العىس ايتامىن. بىرلەسكەن ەڭبەگىمىزدىڭ ناتيجەسىندە كازتالوۆ اۋدانىنىڭ ەكونوميكاسى نىعايىپ، جاڭا مۇمكىندىكتەرگە جول اشىلادى دەپ سەنەمىن، – دەدى اۋدان اكىمى.
كەلەلى باسقوسۋدا اۋدانىمىزدىڭ ينۆەستيتسيالىق الەۋەتىن ارتتىرۋعا ۇلەس قوسقان ازاماتتار اۋدان اكىمىنىڭ العىس حاتىمەن ماراپاتتالدى.
فورۋم اياسىندا مەملەكەتتىك باعدارلامالاردىڭ يگىلىگىن كورىپ وتىرعان ازاماتتاردىڭ جانە ءوز قاراجاتى ەسەبىنەن اۋىل شارۋاشىلىعىنىڭ دامۋىنا ۇلەس قوسىپ جۇرگەن كاسىپكەرلەردىڭ ونىمدەرى كورمەگە قويىلدى. كورمە جەرگىلىكتى ءوندىرىستىڭ مۇمكىندىكتەرىن تانىستىرىپ، اۋىل كاسىپكەرلەرىنىڭ ەڭبەگى مەن ىزدەنىسىن كورسەتۋگە مۇمكىندىك بەردى.
اۋىلدىڭ وركەندەۋى تەك بيۋدجەت قاراجاتى مەن مەملەكەتتىك باعدارلامالارعا عانا بايلانىستى ەمەس. وعان جەكە كاسىپكەردىڭ باستاماسى، تۋعان جەرگە دەگەن جاناشىرلىعى، جاڭا ءىس باستاۋعا دەگەن باتىلدىعى دا تىكەلەي ىقپال ەتەدى. سوندىقتان اۋىلعا ينۆەستيتسيا تارتۋ – ەكونوميكالىق كورسەتكىشتەردى ارتتىرۋمەن قاتار، جەرگىلىكتى حالىقتىڭ الەۋەتىن اشۋعا، جاستاردى جۇمىسپەن قامتۋعا جانە اۋىلدىڭ كەلەشەگىنە سەنىم قالىپتاستىرۋعا باعىتتالعان ءىس.
مەملەكەت باسشىسىنىڭ جولداۋىندا كوتەرىلگەن مىندەتتەردى جۇزەگە اسىرۋدا وسىنداي جەرگىلىكتى باستامالاردىڭ ورنى ەرەكشە. ينۆەستيتسياعا قولايلى جاعداي جاساۋ، كاسىپكەرلەردىڭ قۇقىقتارى مەن مۇددەلەرىن قورعاۋ، قارجىلاندىرۋ تەتىكتەرىنىڭ قولجەتىمدىلىگىن ارتتىرۋ جانە وندىرىستىك جوبالاردىڭ ىسكە اسۋىنا قولداۋ كورسەتۋ – ورتاق ماقساتقا باستايتىن ماڭىزدى قادامدار.
«KAZTALOV-INVEST» II اۋداندىق ينۆەستيتسيالىق فورۋمى وسى باعىتتاعى جۇمىستى جاڭا دەڭگەيگە كوتەرۋگە نەگىز قالادى.
2027 جىلعا جوسپارلانعان ينۆەستيتسيالىق جوبالار اۋىل شارۋاشىلىعى، مال شارۋاشىلىعى ونىمدەرىن ءوندىرۋ جانە وڭدەۋ، ساۋدا مەن قىزمەت كورسەتۋ، قوعامدىق تاماقتاندىرۋ، تۋريزم، سپورت جانە ينفراقۇرىلىمدى دامىتۋ باعىتتارىن قامتيدى.
اتاپ ايتقاندا، مال بورداقىلاۋ الاڭدارىن سالۋ، مال سويۋ جانە ەت وڭدەۋ نىساندارىن اشۋ، ءىرى قارا مال باسىن كوبەيتۋ، بالىق شارۋاشىلىعىن دامىتۋ، جەمشوپ داقىلدارىن ەگۋ، ناۋبايحانا اشۋ، ساۋدا ورتالىعى مەن ساۋدا ءۇيىن سالۋ، بيزنەس ورتالىعىن اشۋ، كافە، اسحانا، مەيرامحانا جانە قوناق ءۇي قىزمەتتەرىن ۇيىمداستىرۋ، جاعاجاي دەمالىس ورنىن قۇرۋ، سپورت كەشەنى مەن قوعامدىق مونشا سالۋ، سونداي-اق اۆتوبولشەكتەر ساۋداسىن دامىتۋ كوزدەلگەن. ەندىگى مىندەت – وسى باستامالاردى جۇيەلى جۇزەگە اسىرىپ، ينۆەستيتسيانى جاڭا جۇمىس ورىندارىنا، ءوندىرىس كولەمىنىڭ وسۋىنە جانە حالىقتىڭ ءال-اۋقاتىنىڭ ارتۋىنا اينالدىرۋ.
اسىلبەك ناسىپقاليۇلى
