ورالدا «زاڭ مەن ءتارتىپ» قاعيداتى اياسىندا الەۋمەتتىك ارىپتەستىك سالاسىنداعى ىنتىماقتاستىق فورۋمى ۇيىمداستىرىلدى. ءىس-شارا وڭىردەگى ەڭبەك قاتىناستارىن تۇراقتاندىرۋ جانە ەڭبەك داۋلارىنىڭ الدىن الۋ ماسەلەلەرىنە ارنالدى.
فورۋمعا وبلىس پروكۋرورى نۇربەك ۇلاسبەكۇلى، وبلىس اكىمىنىڭ ورىنباسارى قايىرجان مەڭدىعاليەۆ، «كپو ب.ۆ.» كومپانياسىنىڭ باس ديرەكتورى ماركو مارسيلي، ءبورلى اۋدانىنىڭ اكىمى ەركەبۇلان يحسانوۆ جانە بيزنەس-قوعامداستىق وكىلدەرى قاتىستى.
فورۋمدا ەڭبەك قاتىناستارى سالاسىنداعى احۋال كەڭىنەن تالقىلانىپ، ەڭبەك زاڭناماسىنىڭ ساقتالۋىن قامتاماسىز ەتۋ، جۇمىسشىلاردىڭ قۇقىعىن قورعاۋ جانە الەۋمەتتىك جاۋاپكەرشىلىكتى ارتتىرۋ باعىتىنداعى ناقتى ءىس-شارالار تۋرالى باياندالدى.
وبلىس اكىمىنىڭ ورىنباسارى وڭىردە ەڭبەك قاۋىپسىزدىگىن قامتۋعا باعىتتالعان جۇمىستارعا توقتالدى. بۇگىندە ايماقتاعى 183 كاسىپورىن حالىقارالىق ستاندارتتاردى ەنگىزىپ، «Vision Zero» تۇجىرىمداماسى مەن «حالىقتىق باقىلاۋ» جوبالارى قارقىندى جۇزەگە اسىرىلۋدا. ەڭبەك نارىعىن تسيفرلاندىرۋ بويىنشا ەلەكتروندىق ەڭبەك شارتتارىن ەسەپكە الۋ جوسپارى 94%-عا ورىندالعان. بىلتىر وبلىس بويىنشا ەڭبەك زاڭناماسىنا قاتىستى 203 ءوتىنىش تىركەلىپ، ءتيىستى تەكسەرۋلەر ناتيجەسىندە انىقتالعان كەمشىلىكتەر بويىنشا نۇسقامالار بەرىلدى.
- ءبىز ءۇشىن جالاقى بەرەشەگىن بولدىرماۋ – باستى باسىمدىق. قازىرگى تاڭدا بىرقاتار كاسىپورىنداعى بەرەشەكتى وتەۋ ءۇشىن زاڭ اياسىندا شارالار قابىلدانۋدا. بۇل ماسەلەلەر وبلىس اكىمدىگى جانىنداعى ۇشجاقتى كوميسسيانىڭ تىكەلەي باقىلاۋىندا، – دەدى قايىرجان مەڭدىعاليەۆ.
فورۋم قورىتىندىسىندا الەۋمەتتىك ارىپتەستىكتى دامىتۋ، ەڭبەك داۋلارىنىڭ الدىن الۋ جانە ەڭبەك ۇجىمدارىنداعى الەۋمەتتىك شيەلەنىستى تومەندەتۋ باعىتىندا تورتجاقتى كەلىسىمگە قول قويىلدى.
قۇجات ەڭبەك زاڭناماسىنىڭ ساقتالۋىن قامتاماسىز ەتۋگە، قىزمەتكەرلەردىڭ قۇقىقتارى مەن زاڭدى مۇددەلەرىن قورعاۋعا، جۇمىس بەرۋشى مەن جۇمىسكەر اراسىنداعى ءوزارا جاۋاپكەرشىلىك پەن اشىقتىق قاعيداتتارىن نىعايتۋعا باعىتتالعان.
