بۇگىن باتىس قازاقستان وبلىسىنىڭ اكىمى ناريمان تورەعاليەۆ قازاقستاننىڭ ەڭبەك ەرى، «وتان»، «پاراسات» وردەندەرىنىڭ يەگەرى، حالىقارالىق شىڭعىس ايتماتوۆ جانە جامبىل اتىنداعى سىيلىقتاردىڭ لاۋرەاتى، قازاقستاننىڭ جانە قىرعىزستاننىڭ ەڭبەك سىڭىرگەن قايراتكەرى، قازاقستان كوركەمسۋرەت اكادەمياسىنىڭ اكادەميگى، جازۋشى، كومپوزيتور، ونەرتانۋشى، سۋرەتشى ءىليا جاقانوۆتى قابىلدادى.
ءوڭىر باسشىسى بەلگىلى ونەرتانۋشىعا العىسىن ءبىلدىردى. ودان ءارى قاراي «اتامەكەن» ونەر ورداسىندا ءىليا جاقانوۆتىڭ شىعارماشىلىعىنا ارنالعان رەسپۋبليكالىق «ەدىل-جايىق» سۋرەتشىلەر سيمپوزيۋىمىنىڭ اشىلۋ سالتاناتى ءوتتى.
ايتا كەتەيىك، ءىليا جاقانوۆ 1936 جىلى 6 مامىردا جامبىل وبلىسى سارىسۋ اۋدانىنداعى اقتوعاي اۋىلىندا جارىق دۇنيەگە كەلگەن. ول 1959 جىلى س. كيروۆ اتىنداعى قازاق مەملەكەتتىك ۋنيۆەرسيتەتىن بىتىرگەن. ال 1959-1963 جىلدارى «قازاقستان پيونەرى» (قازىرگى «ۇلان») گازەتىندە ادەبيەت جانە ونەر ءبولىمىنىڭ مەڭگەرۋشىسى بولعان. سونداي-اق 1963-1984 جىلدار ارالىعىندا قازاق كسر مينيسترلەر كەڭەسىنىڭ تەلەۆيزيا جانە راديوحابار جونىندەگى مەملەكەتتىك كوميتەتى جۇيەسىندە ادەبي رەداكتور، قازاق راديوسىنىڭ مۋزىكالىق رەداكتسياسىندا باس رەداكتور قىزمەتتەرىن اتقاردى.
