تالعار قالاسىنىڭ اكىمى باقىت كۇرىشبەكوۆ پەن ونىڭ ورىنباسارى ماتان ساعىندىق ءوز مىندەتتەرىن تيىسىنشە ورىنداماعانى ءۇشىن قىزمەتىنەن بوساتىلدى. بۇل تۋرالى بۇگىن تالعار اۋدانى اكىمدىگى مالىمدەدى، دەپ حابارلايدى “ادىرنا” ۇلتتىق پورتالى.
“تالعار قالاسىنىڭ اكىمى كۇرىشبەكوۆ باحىت كۋاتبەكوۆيچ، تالعار قالاسى اكىمىنىڭ ورىنباسارى ماتان ساعىندىق ءوز مىندەتتەرىن ءتيىستى دەڭگەيدە اتقارماعانى ءۇشىن اتقارىپ وتىرعان لاۋازىمدارىنان بوساتىلدى”، — دەپ جازىلعان رەسمي اقپاراتتا.
كۇرىشبەكوۆ تالعاردى 2022 جىلدىڭ جازىنان بەرى باسقارىپ كەلەدى. سايلاۋ الدىندا "امانات" پارتياسى تالعار اۋداندىق فيليالىنىڭ جاۋاپتى حاتشىسى قىزمەتىن اتقارعان.
ايتا كەتەيىك، 4 قازان كۇنى تالعاردا 16 جاسار شەرزات بولات ەسىمدى ءجاسوسپىرىم 15 ادامنىڭ قولىنان قايتىس بولعان ەدى.
ءجاسوسپىرىمنىڭ قازاسىنان كەيىن شەرزاتتىڭ تۋىستارى ءىستىڭ اشىق تەرگەلۋىن تالاپ ەتتى.
ودان كەيىن مارقۇم شەرزاتتىڭ ءۇيىن الدەكىمدەر ورتەپ كەتتى. بۇل قوعامدا ۇلكەن رەزونانس تۋدىرۋدا.
