ەلىمىزدە قۇمار ويىنعا اۋەس ازاماتتارعا نەسيە بەرۋگە تىيىم سالىنادى، دەپ حابارلايدى «ادىرنا» ۇلتتىق پورتالى.
Stan.kz اقپارات اگەنتتىگىنىڭ مالىمەتىنە سايكەس، قارجى نارىعىن رەتتەۋ اگەنتتىگى قۇمار ويىندارعا ارنالعان نەسيەنى شەكتەمەك. بۇدان بىلاي زاڭدا «قۇمار ويىنعا اۋەس» تۇسىنىگى پايدا بولادى. مۇنداي ساناتقا سوڭعى التى اي ىشىندە ويىن بيزنەسىن ۇيىمداستىرۋشىعا 300 مىڭ تەڭگەدەن استام سوماعا كەمى ءۇش رەت تولەم جاساعان ادامدار جاتقىزىلماق. قارىز الۋشىنىڭ ءجيى وينايتىنى انىقتالسا، مەرزىمى وتكەن نەسيەسى نەمەسە ميكروكرەديتى بولسا، اقشا بەرىلمەيدى.
سونىمەن قاتار ءباس تىگۋگە تاۋەلدىلەرگە 0,25 پايىز دەڭگەيىندەگى قارىز جۇكتەمەسىنىڭ ەڭ جوعارى مولشەرى ەنگىزىلەدى. سول ارقىلى قۇمار ويىندارعا قاتىسۋ ءۇشىن قارىز بەرۋدى قاتاڭداتۋ جوسپارلانىپ وتىر.
پسيحولوگتاردىڭ پىكىرىنشە، ويىنعا اۋەستەرگە ەشقانداي شەكتەۋ توقتام بولا المايدى. ءتىپتى، قاماپ ۇستاساڭ دا، امالىن تاباتىنىن ايتادى. سوندىقتان بىلىكتى مامانداردىڭ كومەگىنە جۇگىنىپ، ەمدەلۋى قاجەت.
«كورىپ قويىپ، اقشا سالىپ قويا بەرەمىن دەپ مويىندايتىن بولسا، بۇل – العاشقى قادام. دەمەك بۇل تاۋەلدىلىكتەن ايىعۋعا ءارى ەمدەلۋگە مۇمكىندىك بار. ەگەر اي سايىن ءبىر رەت 300 مىڭ سالاتىن ادامعا ونى بۇعاتتامايمىز دەۋ ماسەلەنى شەشپەيدى. ول ءبارىبىر باسقا جولىن تابادى»، – دەدى پسيحولوگ جاننۇر داۋرەنبەكوۆا.
سونداي-اق مەملەكەت شەكتەۋ شارالارىنان بولەك، پسيحولوگيالىق مادەنيەت پەن ساۋاتتىلىقتى ارتتىرۋعا كۇش سالعانى ءجون دەيدى. ايتۋىنشا، ءباس تىگۋگە تاۋەلدى كىسى الدىمەن ءوزى ءۇشىن ويىن قۇمار ەكەنىن مويىنداۋى قاجەت.
«ادىرنا» ۇلتتىق پورتالى
